Dewa Krêdiye de problemê awe 

2022-07-16 14:33:29


	 

	ÊLIH - Dewa Krêdiye ya 120 keyeyî ci estê, problemê awe yeno ciwîyayîş û welatijê dewe bi bîdonan awe benê keye û mecbûr ê 350 TL zî tankerêke awe bigîrê. Welatijan dîyar kerdî ke ganî no problem bêro safîkerdiş.

	 

	Bi ameyîşê hamnanî dir germbîyayîşê Êlihî vejîya 50 dereceyî û welatijê ke bi serran o problemê awe ciwîyenê, pêwa pêro hewldayîşî problemê înan nîno safîkerdiş. Dewa Krêdiye ya 7 kîlometreyî dûrê Êlihî ya, her hamnanî problemê awe yeno ciwîyayîş. Dewe, 120 keyeyî ra yena meydan û awa dewe bi şebekeyê awa şaredarî yena peydakerdiş. La awe seba hetê wayîrê heywanan ra bi borîyê kaçax ameyê visnayîş, qîm nêkena. Dewijî bi serran o na rewşe selahîyetdaran rê neql kenê la tu safîkerdiş nêameyo kerdiş. Seba problemî xeylêk welatijî mecbûr emndî keyeyê xo terk bikerê û bar bikerê Êlih.

	 

	Bi bîdonan awe benê keye

	 

	

	Problemê awe ke her hamnanî yeno ciwîyayîş, dewijan mexdûr keno. Dewijî bi pesdewarî û ramitiş cuya xo dewam kenê, seba lazimîyê xo bi ca bîyarê, fabrîka û îstasyonê petrolî yê derûdorî bi tankeran û bîdonan awe anê keyeyê xo. Serê tankêrêke 300-350 TL pere danê.

	 

	Şaredarî de muxatab çin o

	 

	Dewa ke welatijî neêşkenê heywananê xo rê awe bîyarê,  hemverê çîyê ke yenê ciwîyayîş, selahîyetdarî bêvengîya xo pawenê. Dewijê ke bi serran o muracatê şaredarî kenê, bi vatiş sey ‘seba ke borî kaçax ameyê bicakerdiş, awe qîmê şima nêkena' waştişê înan verê çiman de nîno girewtiş. Bi xususî dewijî dîyar kenê ke dimayê  qeyûman ê muxatab nêvînenê.

	 

	Heto bîn ra zî vanayê awe zî teber de yê û xeylêk xirab asenê. Pêwa pêro heme zor û zehmetîyan dewijî wazenê ke ganî safîkerdişêk bibo.

	 

	Tankêrêke 350 TL qîmê rojêke kena

	 

	Rukiye Demîra ke 15 serrî yo dewe de ciwîyena, vana bi serran o nê problemî ciwîyenê û wina vat: "Ma bi pesdewarî dir eleqedar benê. Wext esto awe çin a ke ma bidê heywanan. Ma bi satilan awe anê. Ma bîrê fabrîkayê ke derûdor de yê bi tankêran awe gênê. Seba vayîya benzînî ma 350 TL danê tankêreke. Tankêra zî qîmê rojêke kena."

	 

	Ma wazenê vengê ma bêro eşnawitiş

	 

	Rukîye dîyar kerd ke dimayê tayînkerdişê qeyûman problemî hîn zêde bîyê û wina vat: "Ganî pêro rayaumumî vengê ma bieşnawo û selahîyetdarî wezîfeyê xo bi ca bîyarê."

	 

	‘Bila çareyêke bivînê'

	 

	Zekiye Demîr zî reaksîyon vera rewşe mojna û vat ke eke awe çinbo do senî cuya xo dewam bikerê û wina bale ant serê rewşe: "Ma bi bîdonan awe anê û lazimîyê xo bi ca anê. Dewa ma nêzdîyê merkezî ya. Pêwa nê ma problemê awe ciwîyenê. Ganî çareyek bêro vînayîş."