'Bêvengî nîna qebulkerdiş' 

2022-07-16 13:57:14


	 

	Şehriban Aslan - Medya Uren

	 

	AMED - Nobeta Edaletî ya keyeyê tepişteyan ê nêweşan û  yê ke infazê înan ameyo veşnayîş, 8 mengî pey xo de verda. Merdimê tepişteyan û cinîyê ke tewrê nobete benê, bale antî serê bêvengîya şarî û selahîyetdaran û vatî: "Edaleto ke yeno waştiş, seba her kesî yo. La şar û selahîyetdarî zî pêro bêveng ê. Do na bêvengîye ma pêrune ver bi xirabî bera. ber bi xirabiyê ve bibe. Ganî reaksîyonêk pîl bêro ramojnayîş."

	 

	Tepişteyê sîyasî yê nêweşî û yê ke înfazê înan ameyo veşnayîş û nînê veradayîş, 16ê Teşrîna Peyêne 2021î de Baroyê Amedî de dest bi "Nobeta Edaletî" kerdî. Prosesê nobete de zî xeylêk cenazeyê tepişteyê nêweşî zîndanan ra vejîyayî û eynî wextî de zî bi bahaneyê înfazê ,nan ameyo veşnayîş, xeylêk tepişteyî nêameyî veradayîş. Keyeyê tepişteyan nobeta xo ya edaletî dimayê çend mengan verê berê dadgeha Amedî, Sazgehê Tipê Edlî (ATK) û Zîndanê Tîpê Dyê Amedî de dewam kerdî. Keyeyan 8 mengî pey xo de verda. Keyeyê tepişteyan û cinîyê ke seba paştdayîşî yenê nobeta edaletî seba bêvengîya şarî û selahîyetdaran reaksîyonê xo ramojnayî û venga beşdarbîyayîşê nobete kerdî.

	 

	'Înfazê lajê mi ame veşnayîş'

	 

	Tepişteyo sîyasî Azîz Turan ke Zîndanê Tîpê Dyê Amedî de yeno tepiştiş, 6 serrî ceza girewtib. Goreyê cezaya girewto lazim bi ke 10ê Temmuze de bêro veradayîş. Dayîka ey Aysel Turan dîyar kerd ke vernîya 3 rojan îdarekarê zîndanî agahîya veşnayîşê înfazê Azîzî dayê ci. Aysele seba vengê ci bêro eşnawitiş, beşdarê Nobeta Edaletî bî û vat: "Lajê mi eynî wextî de nêweş zî bi. Pêwa cezaya ey qedîyaya zî, o nêameyo veradayîş. Bi seyan embazê ey sey ey nêweş ê û nê probleman ciwîyenê. Bi bahaneyan cezaya ey derg kenê. No ne heq o û ne zî huqûq o. Tirkîya de derheqê ma kurdan de qerarê keyfî yenê girewtiş. Ne welatê mi azad o, ne zî ez azad a. Nika zî tutê mi, mi ra dûrî yê. Ma do ez o senî bizanî ke kam ci roje roşan o. Êdî bes o. Şima her ca ma rê kerd zîndan. Ma qebul nêkenê."

	 

	'Partîyê sîyasî serê sozê xo de nêvindenê'

	 

	Herdem Merwanî ke pîyê aye Abdulhalîm Kirtay yew tepişteyêko nêweş o, wina qal kerd: "Ma seba safîkerdişî da berê pêro partîyan ro. La tu kesî seba safîkerdişî game nêeşte û hetkarîyêke nêdayî ma. Pêwa nê zî ma veng danê ke seba game eştişî erey nîyo. Ganî wayîrê ma vejîyê. Eynî wextî de şar wayîr vejîyo. Çi heyf ke her kes ma tena verdeno. Ê pêruyî nê rojan de betlane de yê û ma zî kuçeyan de yê. Ma waştişanê xo de bi israr ê. Probelmê zîndanan problemêk pîl o. Çi beno wa bibo, ma do xoverdayîşê xo dewam bikerê."

	 

	'Ma bibê vengê tepişteyan'

	 

	Endama MEBYA-DERî Meryem Soylu ke seba paştdayîşî beşdarê nobeta edaletî bena wina vat: "Zîndanan de heqê merdiman yeno binpaykerdiş û bi hawayêke xidar yenê îşkencekerdiş. Nê ra zî tewr zêde tepişteyê nêweşî tesîr benê. Dîmenê ke ma peynî de dîyê, seba nînan nimûne yo. Tepişteyan tedawî nêkenê, nêbenê nêweşxane.Çi heyf zîndanan ra cenazeyî vejênê. Merdê ke nêweşê ganî bi dîqet bêrê tedawîkerdiş.Pêwa nê zî înfazê xeylêk tepiişteyan veşnayî. Zîndanî bîyê wareyê îşkenceyî.  Ganî şarê ma paştdayîş bido nobetan. Ma êdî nêwazenê cenazeyî zîndanan ra vejîyê."

	 

	'Paştdayîş qîm nêkeno'

	 

	Muşer Ulker ke seba paştdayîşî tewrê nobete bena wina vat: "Keyeyê tepişteyan bi waştişê edaletî, her ca de gêrayî. Xeylêk bajaran ra ver bi Anqara şî. Her kesî goş û çimanê xo pada. Wexto ke înan wina kerd, xeylêk tepişteyî dinyaya xo bedilnayî û înfazê înan veşnayî. No ne heq o û ne zî huqûq o. Demêk derg o keyyeê tepişteyan xo ver danê. Ganî hûmara ma ya paştdayîşî zêde bîne la eynî ya. Ganî ma hîsgêr bibê û paştdayîş bidê."