Şîrîn Demîr: Roja bêvengmendişî nîya 

2022-07-15 11:37:27


	 

	 

	Rojda Aydin

	 

	ŞIRNEX - Dayîka Celalettîn Demîro ke Zîndanê Tîpê Fyê Hûmara 1in ê Xarpêtî de tepişte yo Şîrîn Demîre dîyar kerd ke zîndanan de serê tutanê înan de teda û zulmêk pîl esto û venga pêro kesî kerd ke seba tepişteyan wurzê serê lingan û vat: "Roje ne roja bêvengmendişî ya."

	 

	Tecrîdo ke Îmraliî de serê Rayberê PKKyî Abdullah Ocalanî de yeno kerdiş, her ke şino pêro zîndanan de vila beno. Binpaykerdişê heqî zîndananê Tirkîya û Kurdistanî her ke şino zêde beno. Tepişteyê sîyasî ke bi keyeyê xo dir bi rayîrê telefonî qisey kenê, her roje qalê binpaykerdişê heqan ê newe kenê. Celalettîn Demîro ke Zîndanê Tîpê Fyê Hûmara 1in ê Xarpêtî de yeno tepiştiş, 2017î ra zîndan de yo û cezaya mûebetê giran û 54 serrî bînî ci rê ameya birnayîş.

	 

	Celalettîn ke 4ê Temmuze de bi rayîrê telefonî keyeyî xo dir pêvînayî kerd, vat ke zîndan de janêk vila bîyo û 60 tepişteyî zî bi nê janî kewtê. Xêrcê nê zî dîyar kerdibi ke zîndan de teda û binpaykerdişê heqan ê hemver înan zî dewam kenê.

	 

	Dayîke Celaletîn Demîr, Şîrîn Demîre, derheqê rewşa lajê xo û yê zîndanan de qisey kerd. 

	 

	Nêeşkenê şêrê pêvînayîş

	 

	Şîrîne, ard ziwan ke lajê aye 5 serrî verê seba xebatanê sîyasî ameyo tepiştiş û vat: "Cezaya mûebetî û 54 serrî cezaya zîndanî ci rê ameya birnayîş. Lajê mi demo ke ame tepiştiş, nêzdîyê 20 rojan zîndanê Şirnexî de mend û dima ra ey surgunê zîndanê  Xarpêtî kerdî. Ceza tena nêdayê lajê mi, dayê keyeyê ci zî. Merdimêk do senîn bieşko hende serrî zîndan de bimano. Seba ke zîndan dûrî yo, ma nêeşkenê tim şêrê. Tewr peyîn ez hîrê serrî verê şîbîya pêvînayîş û no roşan de reyna ez şîya pêvînayîş. Rewşa weşîya lajê mi baş nîya. Xeylêk kîlo dayo. Tena lajê mi ney, rewşa embazanê ey zî baş nîya."

	 

	‘Werd nêdanê înan'

	 

	Şîrîne, dîyar kerd ke teda û zulmêk pîl serê tepişteyan de esto û vat: "Demo ke tepişteyî nêweş kewenê, înan nêbenê nêweşxane û înan derman nêkenê. Werdê înan kêm kerdê û werd nêdanê înan. Hakêk anê danê hîrê tepişteyan. Tutanê ma veşan verdenê û wazenê bikişê. Îşkence û zulmêk pîl esto. Hem fîzîkî û hem zî hetê psîkolojî de teda înan rê yeno kerdiş. Tutanê ma biveşanî terbîye kenê û bi no hawa îşkence bi înan kenê."

	 

	‘Tutê ma nînê dermankerdiş'

	 

	Şîrîne dewam de wina vat: "Lajê mi bi rayîrê telefonî ma gêra û vat ke 60 tepişteyî reyke de nêweş kewtê. Îdarekarîyê zîndanî ra waştê ke înan berê nêweşxane. Labelê waştişê înan bi ca nêardê. Tena dermanê dejbirnaye dayê înan. Dimayê ke tepişteyêk rewşa ey giran beno, wedarnenê nêweşxane û vejêno werte ke janê korona kewto. Ê 60 tepişteyî pêro janê korona kewtê. Edalet çin o. Tutê ma bi mergî dir rî bi rî verdenê. Ma seba rewşa înan qesawt de yê."

	 

	‘Bi rayîrê telefonî zî nêeşkenê qalê zulmî bikerê'

	 

	Şîrîne bale ant serê tedayan û vat: "Demo ke ma şinê pêvînayîşê akerde, ma nêeşkenê nêzdîyê merdimanê xo bibê. Gardîyanî ma asteng kenê. Her het ra zulmêk pîl serê tepişteyan de esto. Demo ke telefon de qisey kenê, kîşte înan de vindenê û ê zî nêeşkenê zulmê ke înan rê yenê kerdiş qal bikerê. Ma wazenê heyetêk şêro zîndan û cigêrayîş bikero. Ewro bi hezaran dayîkî kezeba înan veşena. Ma roşan bi hesiran derbaz kerd. Lajê mi bi jan kewto û ma nêzanê çi rewşe de yo."

	 

	'Roja bêvengmendişî nîya'

	 

	Şîrîne tewr peyîn wina vat: "Roja bovengmendişî nîya. Ganî ma îşkenceyê serê înan de yeno kerdiş reaksîyon ramojnê. Tutê ma mîyanê çar dêsan de bi zulmêk pîlî dir rî bi rî yê. Dejê zerrîya ma  dayîkan yew o. Seba ke zerrîya ma hemine bi birîn a. Wa sere de zî dayîkî wurzê serê payan. Ganî ma wayîrê tepişteyan vejîyê."