'Wazenê vernîya îradeyê ke vejîyayo bigîrê' 

2022-07-14 12:39:55


	 

	 

	WAN - Hemsereka HDPyî ya Wanî Handan Karakoyun reaksîyon vera raporê ke derheqê wedaritişê hemsereka pêroyî ya DBPyî Salîha Aydenîze de ameyo amadekerdiş de da û vat: "Îqtîdar hewl dano, vernîya îradeyo ke vejîyayo werte bigîro. Ma do têkoşînê cinîyan dewam bikerê."

	 

	12ê Hezîrane de bi waştişê azadîya fîzîkî ya Rayberê PKKyî Abdullah Ocalanî de Rayîr ra Şîyayîşê Gemlîkî bi ca ame û rayîr ra şîyayîş de pêwa parlamenteran xeylêk kesî ameyî derbkerdiş. Hemsereka pêroyî ya DBPyî Salîha Aydenîze hemverê şîdetê polîsan de pawitişê cewherî kerd û bi nê bahaneyî  wezîrê karê zereyî Suleyman Soylu, Salîha hedef girewt û derheqê aye de 5 fezlekeyî ameyî amadekerdiş. Komîsyonê amadekarî yê hetê Komîsyonê Edelet û Destûrê Bingehîn ê Meclîsî ra ame amadekerdiş, 5ê Temmuze de kombîyayîş kerd û pawitişê Salîha, Serekwekîla Koma HDPyî Meral Daniş Beştaşe kerd.

	 

	Komîsyonê Amadekarî  6ê Temmuze de kombîyayîş kerd û netîceyê kombîyayîşî de derheqê wedaritişê destnêdayîşê Salîha de qerarê amadekerdişê raporî girewt. Komîsyonê Amadekar pêwa şerhê muxalefetî, raporo ke do seba wedaritişê destnêdayîşî amade bikero, do pêşkêşê Komîsyonê Têmîyanî bikero.

	 

	Hemsereka HDPyî Wanî Handan Karakoyun derheqê raporo ke ameyo amadekerdiş de qisey kerd.

	 

	‘Îqtîdar hewl dano ke vernîya îradeyê ke vejîyayo bigîro'

	 

	Handane dîyar kerd ke bi amancê bale biancê tecrîdê serê Rayberê PKKyî Abdullah Ocalanî, Rayîr ra Şîyayîşê Gemlîkî kerdê û yê ke tewrê rayîr ra şîyayîşî bîyê rastê îşkence û destbendkerdişî ameyê. Handene wina qal kerd: "Polîsan kesê ke beşdarê çalakî bîbî, asteng kerd. No bêhuqûqî yo. Hemserekê ma, parlamenterê ma ameyî astengkerdiş û hetê polîsan ra ameyî derbkerdiş. Îqtîdar hewl dano ke vernîya îradeyê vejîyayo werte bigîro. Bi lezabez fezleke şawitê komîsyonê amadekar. Sey dîmenan de zî yeno vînayîş, Salîha Aydenîze hemverê reaksîyonan refleks mojnena. Amadekerdişê raporî û tesdîqkerdişê ci bêguman hemverê cinîyan de cîya nîno destgirewtiş."

	 

	'Ma îqtîdaro bîyaye zîhnîyetê xoserî ra bi dest nêgînê'

	 

	Handane dewam de wina vat: "Hemverê cinîyê ke ameyê weçînayîş, hewldayîşê pelçiqnayîşî esto. Îqtîdar vano ke do bi fezlekeyan vernîya têkoşînê cinîyan bigîrê. Ez tîya ra reyke bîn veng dana; cinî nîmeyê komelî yê û pêwa heme teda û polîtîkayê pelçiqnayîşî do têkoşînê xo dewam bikerê. Wedaritişê destnêdayîşê Salîha, qeraro ke ameyo girewtiş zî bêguman zîhniyetê îqtîdaro bîyaye ra cîya nîno ercnayîş."

	 

	‘Ma do heta peynî têkoşîn bikerê'

	 

	Handane tewr peyîn dîyar kerd ke do cinî hemverê tedayan her tim wareyan de cewabê xo bidê û wina vat: "Salîha îradeyê ma ya, têkoşînê ma cinîyan a. Ma cinî  heta ke xo bi hawayêke azad îfade nêkerê do têkoşînê xo dewam bikerê."