Parlamentera APî Ana Mîranda: Çareserî goşdarkerdişê Şarê Kurdî yo 

2022-07-07 14:00:13


	 

	ANQARA - Parlamentera Parlamentoya Ewropayî Ana Mîranda Paz da zanayîş ke Rayberê PKKyî Abdullah Ocalan wayîrê rolêko muhîm o û bale ant serê sîyasetê şer û vat, çareserî goşdarkerdişê Şarê Kurdî yo.

	 

	Tecrîdê giran yê serê Rayberê PKKyî Abdullah Ocalanî dewam keno û her ke şino giran beno. Partîya Demokratîke ya Şaran (HDP) 3yê Temmuze de 5in Kongreya xo ya Pîle organîze kerd. Temsîlkara Tifaqê Azadîya Ewropa (EFA), vervatoxa Têkilîyê Teberî ya Galîcîsch Natîonalîstîsch Blok (GNB) û parlamentera Parlamentoya Ewropayî Ana Mîranda Paz derheqê tecrîdê serê Abdullah Ocalanî de qisey kerd.

	 

	Ana bale ante serê tecrîdî û vat: "Heqê tepişteyêk nîno dayene. No pêro dinya de sey tecrîd yeno qebûlkerdiş. Dadgeha Heqê Merdiman ê Ewropayî (DMME) zî nê wina qebûl keno. No tecrîd alozî awan keno. Tena sîyasetê Tirkîya de ney, do pêroyî tesîr bikero."

	 

	'Ocalan wayîrê rolêk muhîm o'

	 

	Ana vat, Strazburg de verê Konseya Ewropayî de seba Abdullah Ocalan çalakîya grevê vêşanîye kerdê û bale ant serê grevê vêşanîye yê Leyla Guven ke 7ê teşrîna peyêne 2018ine de dest pêkerdibi û wina vat: "Tena kurdî ney Parlamentoya Ewropayî de zî xeylêk kesî nê fikrî pawenê. Ocalan aştîye de wayîrê rolêk muhîm o. Ma nê çî qedexeyê tebervejîyayîşê kuçeyan de dî. Xeylêk sazgehan şermezar kerd. La dûrîyê Neteweyê Yewbîyaye (NY), Konseya Ewropa, Yewîya Ewropayî (YE) zaf zêde dîyar bi. Înan xo da het. Tecrîd û sîyasetê îzalasyonî bîyo hacetê propagandayî.”

	 

	'Rejîmê Tirkîya sûcdar o'

	 

	Ana, dîyar kerd ke prosesê çareserî hetê AKPyî ra ame qedênayîş û stratejîyê şerî ame destpêkerdiş. Ana wina vat: "Eke HDP bibo îqtîdar do tena seba Şarê Kurdî ney, seba heme şaran bixebityo. Erdogan zî nê baş zano. Seba nê zî HDPyî sey tehdîd vîneno. Wazeno pêro dîyalogan biqedêno. Berpirsîyarê şerê Kurdistanî AKP yo û heme kes nê baş zano. Parlamentoya Ewropayî de kurdî zî estê. Ma uca ra zî baş zanê ke rejîmê Tirkîya sucdar o. Seba nê ma ewro kongreya HDPyî de yê."

	 

	'Şarê Kurdî goşdar bikerê'

	 

	Ana dîyar kerd ke ê NATOyî ra çîyêk nêpawenê û NATO organîzasyonêkê ke yo welatan provoke keno û ver bi şerî de beno û vat: "Ganî Ewropa û heme Ewropayî çareserî de bibê hetê dîyalogî. Ganî ma terefdarê heqê merdiman bê. Tirkîya pereyê YEyî seba çîyê bînan yenê şawitişî, seba kiştişê kurdan xebitnena. Safîkerdiş o yo ke ganî Şarê Kurdî bêro goşdarîkerdiş. Ganî ma mesajê dîyalog û safîkerdişî goşdarî bikerê."