'Ma tu wext fek Serekê xo ra vera nêdanê' 

2022-07-07 12:37:40


	 

	Hêlîn Asmîn

	 

	QAMIŞLO - Cinîyê ke Qamişlo de ciwîyenê, bale antî serê tecrîdê giran yê serê Rayberê PKKyî Abdullah Ocalanî û vatî ke heta peynîya gonîya xo ê do serê rayîrê Rayberê xo de bê. Sewbîna cinîyan vat: "Ma sey cinî û Şarê Kurdî tu wext fek Serekê xo ra vera nêdanê."

	 

	Rayberê PKKyî Abdullah Ocalan ke Zîndanê Tîpê Fyê Îmraliyî de yeno tepiştiş, bi hîrê serrî yo avûkatan û keyeyê xo dir nêeşkenopêvînayîş bikero û sewbîna 15 rojî yo zanayîş ci ra nîno girewtiş. Rexmê ke avûkatanê Buroyê Huqûqî yê Asrinî bi amancê pêvînayîşê bi muwekîlê xo dir her hewte bi hawayêke sîstematîk muracat kenê zî la her rey bi bahaneyêk nê muracatî yenê astengkerdiş. Cinîyan hemverê tecrîtê girankerde yê serê Rayberê PKKyî Abdullah Ocalanî de yeno kerdiş de reaksîyon ramojnayî û vatî, heqê her însanî est o ke avûkatanê xo dir pêvînayîş bikero.

	 

	'Ma sey cinî û Şarê Kurdî tu wext fek Serekê xo ra vera nêdanê'

	 

	Ayhan Hisin dîyar kerd ke problemê kurdî vera ke bêro safîkerdiş, şer yeno ferzkerdiş û vat: "Bi serrêke û di mengî yo Serek Apo ra zanayîş nîno girewtiş. Ma sey cinî û Şarê Kurdî tu wext fek Serekê xo ra vera nêdanê. Seba ke cinîyê kurdî bi fikr û felsefeyê Serek Apoyî xo resnayî na sewîya. Seba ke ma bi xeyrê fikrê Rayber Apoyî ma zana bî. Ma xo nas kerd. Serekê ma seba heme cinîyan fikrê newe awan kerd. Heme cuya xo seba cuyêka azad û têduşt derbaz kerd. Nika çira Îmraliyî de yeno tepiştiş? Ma tecrîdê serê Rayber Apo şermezar kenê."

	 

	'Ma her wext Rayberê xo dir ciwîyenê'

	 

	Leyla Mehemed bale ant serê tecrîdê girankerde û wina vat: "No vîst û hîrê serrî yo Serekê ma Îmraliyî de yeno tepiştiş, seba ma her rojê ke derbaz bîne zaf bi dej bî. La ma Şarê Kurdî û cinîyê kurdî têkoşînê xo dewam bikerê. Seba ke ma tim bi Rayberê xo dir ciwîyenê. Şarê Kurdî û taybetî cinîyê kurdî tu wext tepiştişê Serek Apoyî qebûl nêkerdê. Nika zî ma serê fikrê Rayber Apo de ciwîyenê. Eynî wextî de ma sey cinî her tim bi serekê xo dir ciwîyenê. Serekê ma zî ma dir ciwîyeno. Nê rayîrî de bi hezaran ciwanê kurdî ganê xo feda kerdî. Heme cayê dinya heqê her însanî esto ke bi avûkat û keyeyê xo dir pêvînayîş bikero. La bi serrêke zêdeyêr o dewleta tirke destûr nêdana ke avûkat û keyeyê xo dir pêvînayîş bikero. No çîyêk însanî nîyo. Serekê ma roşnîya çimê ma yo, rayîrê ma roşn keno. Ma tu wext nêvindenê. Heta gonîya ma bibo ma do têkoşînê xo dewam bikerê û ez vana, bê serekî cuye nêbena. Eke cuye biba do bi Raber Apo dir bo."

	 

	'Hêvîya ma dayîkan esta ke do Rayberê ma Îmraliyî ra vejîyo'

	 

	Rabîye Kewser reaksîyonê xo vera tecrîdî mojna û vat: "Ez destpêk de venga heme sazgehê Heqê Merdiman kena ke nê bêdaletî û bêhuqûqî bivînê. Dewleta tirke ya îşxalkerde wazena şar û serekî yewbînan ra bivisno û hereketê ma çin bikero. La ma fikrê serekê xo ra dûr nêkewenê. Her çiqas Rayberê ma zîndanê Îmraliyî de bo zî la bi fikr ma dir ciwîyeno. Seba tecrîdê serê Serekê xo wedarnê lazim o ma tim wareyan de bê. waştiş û hêvîya ma a ya ke demek nêzdî de avûkat û keyeyê Rayber Apo, zanayîş Rayberê ma ra bigîrê. Serekê sey Serekê ma heta nika temamê dinya de nêvejîya yo û do nêvejîyo zî. Hêvîya ma dayîkan esta ke do Rayberê ma Îmraliyî ra vejîyo."

	 

	'Dewleta tirke fikr û felsefeyê Serekê ma dra tersena'

	 

	Sadiqe Osman zî wina reaksîyon ramojna: "Dewleta tirke fikr û felsefeyê Serekê ma ra tersena. Sewbîna tu huqûq û heqê însanî Tirkîya de çin o. Eke heqê însanan verê înan de bibîne, do nika hende tepişteyî zîndanê Tirkîya de nêbîne. Nimûne; Serekê ma xêrcê azadî, însanî û heqê cinîyan se kerdo? Ez sey dayîkêke vana, seba fikr û fehmê Rayberê ma ra tersenê, ey zîndan de verdenê. Ez tîya ra heta Îmraliyî hezar rey silaman serek û şerwananê ci yê ke nika koyanê Kurdistanî de xo ver danê, şawena."