Dewika Gorseyî de boya gazî tesîr serê xebatkaran de kerd 

2022-07-06 14:56:45


	 

	AMED - Dimayê teyareyê şerî yê dewleta tirke saete 10.00ine de serê Dewika Gorseyî ya Dewa Tunekraga ya Qezaya Dîcleyî ya Amedî de gêrayîne, xebatkarê ramitişî dîyar kerdî ke boyêka giran ê gazî ameya û boya înan teng bîya, zerrîya înan qelibyaya, sereyê înan dejayo.

	 

	Goreyê zanayîşê ke ma roniştoxê  dewika Gorseyî ya Dewa Tunekraga ya Qezaya Dîcleyî ya Amedî girewt, ewro saete 10.00ine de teyareyê şerî serê koyê nêzdîyê Dewika Gorseyî de gêrayê û dimayê teyareyan zî boyêka giran ya sey gazî vila bîya. Roniştoxê Dewika Gorseyî çadirî dayê ro û ramitiş kenê, boya gazî ra tesîr bîyê.

	 

	Goreyê zanayîşê karkerê ramitişî dayê, demo ke boya gazî ameya, dîyayîşê sey; boytengî, qelibnayîşê zerrî û dejê serî ameyê vînayene. Karkerî seba asayîşî kewtê zereyê çadiran labelê seba dewike dûrîyê qezaye ya, ê nêeşkenê şêrê nêweşxane.