Sara Botan: Ma do heyfê fermanî bi hêzê cinîyan bigîrê 

2022-07-04 14:01:14


	 

	Evîn Zenda - Ayşe Guney

	 

	ŞENGAL - Vervatoxa Yewîya Ciwananê Şengalî Sara Botan, derheqê Kongreya Cinîyê Ciwanan ê Şengalî de ke demêk verê amebî organîzekerdiş, ercnayîş kerd. Sara, dîyar kerd ke înan seba heyfê cinîyê ke fermanî de ameyî qetilkerdiş û yê ke hema destê çeteyande yê bigîrê, na kongre organîze kerdê û vat: "Ma do heyfê fermanî bi hêzê cinîyê ciwanan bigîrê."

	 

	Dimayê fermanê 3’ê Tebaxa 2014’ine ke serê komeleyê Êzidî de ame kerdiş, cinîyê Êzidî yê ke ferman ra xelisyabî, seba heyfê temamê cinî û komelê xo bigîrê, dest bi kar û xebatê rêxistine kerdî. sazgeh û dezgehê xo awan kerdî û mîyanê komelî de cayê xo dîyar kerdî. Bi xususî cinîyê ciwanî bi îradeyê xo wuştî û bi seyan cinî seba heyfê fermanî bigîrê, cayê xo Hêzê Pawitişê Şengalî de girewtî û seba heyfê şehîdê nê fermanî wedarnê, verê xo dayî bi desan hemleyê sey Tebqa û Reqayî. Dimayê xelaskerdişê Şengalî, cinîyê ciwanî na rey zî seba bieşkê komelê xo perwerde bikerê û rêxistin bikerê kar û xebate kerdê. Dimayê keda 7 serran ê Yewîya Cinîyê Ciwanan ê Şengalî (YJCŞ) reya ewil 30'ê hezîrane de Kongreya Cinîyê Ciwanî organîze kerd.

	 

	Derheqê rêxistinbîyayîş û Kongreya Cinîyê Ciwanan ê Şengalî Vervatoxa Yewîya Ciwanê Şengalî (YCŞ) Sara Botan ajansê ma rê qisey kerd û muhîmîyê Yewî û Rêxistinbîyayîşê Cinîyanê Ciwanan qal kerd.

	 

	'Ma Azadîya xo fikrê Rayber Apo de vînenê'

	 

	Sara Botan despêkê qiseykerdişê xo de bale ant serê hêrişê serê komeleyê Êzidîyan û wina vat: “Komelê ma rewşêka zaf xesas ra derbaz beno. Bêguman hêrişê dişminî yê serê temamê parçeyê Kurdistan û yê serê komelê ma yewbînan dir girêdaye yo û nê hêrişî nika hetê xêrnêxazê komelê ma ra yeno kerdene, dûrê fermanê 74. nîyo. Hêrişî eynî yê la komelê ma eynî komel nîyo. Seba nê komelê ma êdî bi hêzê xo yê pawitişî û bi rêxistina xo ya komelî dir rayîr nêdayo peyman û planê fermanî. Nika şerê ke serê komelê ma de yeno kerdiş, hetê Dewleta Tirkî ra yeno kerdiş la PDKyî zî bi hawayêke akerde hemkarî keno. Nika tewr zêde wazenê ke komelê Êzidîyan hemverê yewbînan de sûr bikerê û no zî hawayêkê şerî yê lêşin yê dişminê komelê ma yo. La heta nika serkewte nêbîyê û do serkewte nêbê zî. Sey ciwananê Şengalî ma zî rayîr nêdanê nê. Ma do heta peynî serê fikrê Rayber Apo de bê. Seba ke ma sey komelê Êzidî, sey  ciwanê êzidî, ma azadîya xo mîyanê fikrê Rayber Apo de vînenê.”

	 

	'Ma bi îradeyê Zîlan û Bêrîvanan xo birêxistin kenê'

	 

	Sara dewamê vatişê xo de bale ant serê Kongreya Yewin ê Yewîya Cinîyê Ciwanan ê Şengalî û wina vat: “Nê demî de sey cinîyê ciwanî ma zî bi kongreya xo ya yewin organîze kerd. Bi taybetî demekê wina de dişminê komelê ma wazenê ke komelê çin bikerê de organîzekerdişê Kongreye bi sereyê xo cewabêke xeylêk pîl o. Bi 7 serrî yo ke cinîyê ciwanî mîyanê komelî de bi hawayêke aktif kar û xebatan kenê. La ma cinîyê ciwanî nê bes nêdî, ma waşt bi Kongreya xo kar û xebatê xo tewr pîl bikerê û bieşkê hemverê pêro hêriş û zîhnîyetê cinî bindest keno de tekoşînê xo tewr berz bikerê. Seba ke ma bieşkê heyfê fermanan bigîrê û seba ke ma bieşkê peynîya fermanan bîyarê, ma 30’ê hezîrane serrgêra çalakîya Şehît Zîlane de Kongreya xo viraşt. Ma do bi hêz û îradeyê Zîlane û Bêrivanan de xo bi hêz bikerê û ma do rayîrê îşxalkerdişî padê."

	 

	'Ma do bi rêxistînî heyfê temamê cinîyan bigîrê'

	 

	Sara, eynî wextî de qalê tedayê serê cinîyê ciwanan de yenê kerdiş kerd û vat: "Ewro serê xeylêk cinîyê ciwanan de teda û qedexe esto. Hetê pî, bira û derûdorî de teda serê cinîyan de yeno kerdiş. No zî verdeno ke cinîyê ciwanî zahmetîyê pîlî biancê. Mîyanê nê 7 serran de ma heta sewîyeyêke nê fehmî vurna. La çi heyf, bi temamî çin nêbîyo. Seba ke ma bieşkê heqê xo bidest bikerê û komelî bi hêzê xo rêxistin bikerê, ma do rêxistinbîyayîşê xo xurt bikerê. Ma ver bi serrgêra Fermanî de şinê û ma kongreya xo seba heyfê cinîyê ke ferman de ameyê qetilkerdiş û sewbîna seba cinîyê ke hema destê DAIŞ’î de yê viraşt. Sey cinîyê ciwanî ma do xo birêxistin bikerê û heyfê pêro cinîyan bigîrê. Bêguman ma do bi roşnîya fikrê Rayber Apo xo biresnê amancê xo."

	 

	'Ma meclîsê cinîyê ciwanan awan kerd'

	 

	Sara Botan tewr peyîn wina vat: "Kongreya ma de meclisê cinîyê ciwanan ame awankerdiş. Ma wazenê ke temamê temamê cinîyê ciwanî yê ke teda serê înan de esto û wazenê ke xo bixelisnê û sewbîna wazenê xo perwerde û rêxistin bikerê, verê xo bidê meclisê cinîyan ê ciwanan û ma do demê ameyox de bi rayîrê nê meclisan aktîvîteyê tewir bi tewir bikerê. Sewbîna ma do seba kultur û sporî zî wareyan abikerê. Seba ke ma tena eşkenê bi nê metodan enerjîya cinîyê ciwnan rast kanalize bikerê. Seba embazê ma yê ke seba sebebê cîya cîya hetê psîkolojî de zehmetîyan ancenê zî ma do xebatan bikerê."