Rojnamegeran ra vengdayîş: Tewr zêde paştdayîş  

2022-07-03 11:38:25


	 

	Marta Somek

	 

	STENBOL - Rojnamegeran dîyar kerd ke çapemenîya Kurdî hedefê binpaykerdiş û tedayan de ya û wina eşkera kerdî: "Babeta esasî, pawitişê mesleg û rojnamegerîye yo, pawitişê rojnamegeranê kurdan o. Kesê ke azadîya fikr û fehmî pawenê û sazgehê komelê sivîlî ganî tewr zêde paştdayîş ramojnê."

	 

	Çarçewaya cipersayîşê ke hetê Serdozgerîya Komare ya Amedî ra amebi destpêkerdene de polîsan, 8'ê hezîrane de 20 ci ra rojnamegerî 22 kesî destbend kerdî û 8 rojî nezaret de mendî. 15’ê Hezîrane de vetî dadgehe û 16 rojnamegerî bi îdiayê endamîya rêxistine û propagandayê rêxistine kerdê, ameyî tepiştene. Serdar Altan, Mehmet Alî Ertaş, Safiye Alagaş, Azîz Oruç, Omer Çelîk, Suat Doguhan, Ramazan Gecîken, Neşe Toprak, Zeynel Abîdîn Bûlût, Mazlum Dogan Guler, Mehmet Şahîn, Elîf Ungur, Îbrahîm Koyuncu, Remziye Temel, Abdûrrahman Oncu û Lezgîn Akdenîz bi îdiayê ‘endamîya rêxistine’ ameyî tepiştene. Her hetê dinya ra seba tepiştişê rojnamegeran reaksîyonî dewam kenê û vengdayîşê ganî bêrê veradayîş yenê kerdene.

	 

	Rojnamegeran dîyar kerdî ke meslegdaşê înan bi hawayêke bêhuqûqî û seba meslegê xo kerdê ameyê tepiştene û veng dayî ke ganî paştdayîş bêro pîlkerdiş û ganî rojnamegerî bêrê veradayîş.

	 

	Prosesê tedayî yê hemverê rojnamegeranê Kurdan

	 

	Edîtora rojnameya Evrenselî Meltem Akyol vat, çi heyf 16 rojnamegerê bînî, rojnamegeranê tepişteyan rê zêde bîyê û vat: "Ma bi nê embazanê dir wareyan de pîya xebityayî. Ma dimayê prosesê 2015î ra dima her her tim pîya xeberan pare kenê. Ez bi rastî hemverê tepiştişê înan xemgîn bîya. Xeylêk embazê ma, tepiştişê înan vernê nîyo. No demêk derg o hemverê rojnamegeran teda estê. No parçeyêkê prosesê tedayî yo. Ganî no wina bêro ercnayîş. Goreyê mi babeta esas, rojnamegerî ya. Tirkîya de kam ci rojnameger karê xo bikero/a, o/a rastê prosesê tedaye yeno/a."

	 

	‘Hewl danê bêveng bikerê'

	 

	Melteme vat, serê rojname û televîzyonan de zî eynî teda esto û wina dewam kerd: "Tepiştişê 16 embazanê ma bêguman eleqeyê ci bi qanûnê dezenformasyonê ardişê meclîsî esto. Ganî no pêroyî sey prosesêk bêro vînayene. 7’ê Hezîrana 2015’ine ra dima heme rojnamegerî kewtî binê hêrişêkê  topyekun û hewl dayî înan bêveng bikerê. Nika 100’î ra zêdeyêr tepiştiş esto. Rojnamegerê ke rastî nusenê çi heyf rayîrê înan keweno edlîye. Ware de gama ke xeberan taqîb kenê, yenê tepiştiş."

	 

	‘Seba rojnamegerî kerdî, ameyî tepiştene'

	 

	Melteme qiseykerdişê xo wina dewam kerd: "Îqtîdar, polîtîkayê hêrişê topyekun keno. Ver bi weçînayîşê ke îqtîdar xeylê bêzar bîyo û krîzê ekonomî rê çareyêk nêvîneno, her cayê Tirkîya de veng berz beno de, hewl dano roşnayîêk bivîno. Embazê ma yê rojnamegerî 8 rojan destbend mendî û peynîya 8 rojan de ameyî tepiştene. Persê ke ameyî kerdene, babetê ke kerdê problem, rastî nêmojneno ra."

	 

	‘Ganî ma wayîrvejîyayîşî rêxistin bikerê'

	 

	Melteme tewr peyîn wina vat: “Eke ewro rojnamegerê Kurdî bêrê tepiştene û ma zî bêveng bimanê, do dore bêro ma zî. Ma ewro dî ke do dore bêro ma hemine. Coka babete ne babetêka bi kesêk dir eynî fikrbîyayîşî de yo. Babeta esas pawitişê rojnamegerî û meslegî yo. Ewro zî pawitişê rojnamegeranê Kurdan o. Ma mecbûr ê nê meslegî bipawê. Ganî ma paştdayîş pîl bikerê û wayîrvejîyayîşî bi rêxistin bikerê.”

	 

	‘Rojnamegerê Kurdî her tim hedef ê’

	 

	Rojnamegere Yasemîn Çongar zî eşkera kerd ke binpaykerdişê heqan ê azadîya fikr û fehmî tim dewam kerdo û wina vat: "Rojnamegerê Kurdî her tim bî hedefê nê binpaykerdişan. Ewro çîyo ke yeno ciwîyayîş zî no yo. Rojnamegerî mecbûr nîyê ke vatişê dewlete bi xebitnê. Karê rojnamegeran o nîyo ke çîyê ke dewlete wazena viraznê. Çîyo ke înan cîya keno no yo. 16 rojnamegerê ke ameyê tepiştiş zî seba nê sebebî ameyî tepiştene."

	 

	‘Ganî ma tewr zêde paştdayîş pîl bikerê'

	 

	Yasemîne tewr peyîn wina vat: “No caardiş, çimtersnayîşêk o seba heme rojnamegerê Tirkîya ye. Ganî ma hemverê nê bêhuqûqî tewr zêde paştdayîş ramojnê û heqê fikr û azadîye bipawê. Tu gumanê mi çin o ke do rojnamegerî seba nê îdiayan nêrê verdayîş. Ganî ma tewr zêde bi rojnamegeranê Kurdan dir paştdayîş bikerê."