Hem verguman hem zî avûkatê ey teşhîr kerd  

2022-06-28 15:11:55


	 

	Melîke Aydin 

	 

	ÎZMÎR - M.Z. ya di emro qij de bi tewirêkê sîstematîk amî tecawuzkerdiş, di duştê cipersayîşkerdişî de cuya xo bi têkoşîn derbaz kerda û sey metodê pawitişê xozayî verguman û avûkatê ey teşhîr kerd. 

	 

	M.Z. di 2013î de ke hema tute bîye, hetê Sezgîn Ceylanî ra bi tecawuzo sîtematîkî dir rî bi rî ameya verdayîş. Dewaya ke verguman Sezgîn Ceylan ci ra ameyo muhakemekerdiş roniştişê hîrêyîn di 23yê Hezîrane de di 23yîn Dadgeha Cezaya Asliyeyî ya Bayraklî de amî vînayîş. Roniştiş de serekê dadgehe kesêke sey şahid goştarî kerd.  serekê dadgehe şahidî ra vat, ganî mesajê tehdîdî yê vergumanî ke M. rê şawitê, fotografê ke vergumanî girewtê, bido ramojnayîş. Sewbîna şahido bîn ra zî vato, çira o wext M. derheqê vergumanî de gerre nêkerdo. Avûkata dewayî Hazal Aydin reaksîyon ramojna û vat: "M.Z. o wext hema 13 serrî bîye. Di TCKyî de behsê waştişê tutêke nîno kerdiş. Ma nêzanenê ke, a tute bi tehdîd û tehdayê senînî dir ameya rî bi rî?" Roniştişo bîn taloqê 17ê Teşrîna Peyîne bî. 

	 

	M.derheqê prosesî de  ajansê ma rê qisey kerd. 

	 

	Tehdîd kerd 

	 

	M. vat, Îzmîr de 2013î de Sezgîn Ceylanî dir di eynî semtî de roniştê û yewbînan nas kenê. Dima ra serê medyaya dîjîtalî de qisey kenê û vat: "O wext verguman 19 serre bi. Verguman tecawuzê mi kerd û tehdîd kerd ke ez keyeyê xo ra nêvaja. Seba nê zî pêwa ke waştişê mi çinîbî, ez şîya verê ey." 

	 

	Şantaj giran kerd 

	 

	M. beyanat kerd ke verguman Sezgîn Ceylan pêwa heme terzê cuya aye û cil û belgê aye bîyo û tehdîd kerdo. M. wina derg kerd: "Dima ra zî şîdetê fîzîkî kerd. Zerra ey biwaştê dayêne mi ro.  Tewr peynî zî mi ra vat, ti nêkewa têkilîyê cinsî ez  keyeyê to ra vana. Her roje ameyêne verê mektebî ez tehdîd kerdêne." 

	 

	Serê tehdîdan de M. dadîya xo ra vana û keye di 2015î de gerre keno. Verguman  serê medyaya dîjîtalî de xo resneno M. M. eşkera kerd ke tehdîd kerdo ke îfadeyê xo bibedelno û vat: "Ez bêçare menda îfade bibedelna. Vergumanî ez berda verê avûkatê xo Nezîh Sebatî Yolal û vat senîn ti îfade bida ceza yena fînayîş." 

	 

	'Mi qebûl nêkerd' 

	 

	M. malûmat da ke verguman di 2018î de reyna aye  serê hesabo sexte de tacîz kerdo û vat: "Serê nê de mi dest bi dewaya xo kerd. Ez şîya mi gerre kerd. Eşt serê keyeyê ey. Telefonê ey ame tepiştiş. Fotografî û vîdeoyî ameyî girewtiş. Ma teqdîmê dadgehe kerd. Serra 2021î de dewa amî akerdiş. Waştî ke ma şêrê pêkerdiş. La mi qebûl nêkerd.  pêwa heme delîlan dewa hîrê reyî amî taloqkerdiş. Vergumanî bertîl da. Prosesê dewa de embaza min a mektebî sere ra amî goştaritişî. Embaza mi vat, vergumanî verê berê mektebî ra aye bi zor berdêne. Hakimî vat, 'Çira o wext gerre nêkerd?'. Ez o wext tute bîya û 14 serrî bîya. Avûkatan îtîraz kerdî û vatî persêke winayîn nêbeno bêro persayîş. Roniştiş taloqê 27ê Teşrîna Peyîne ame kerdiş." 

	 

	M. da zanayene ke do serê çapemenîya komelî de verguman  û avûkatê ey teşhîr bikero û wina peynî ro ci ard: "Vera ke edalet nîno ca, cinîyî asayîş de nîyê. Mi sey metodêkê pawitişê xozayî, teşhîr xebetna. Seba o hesabê nê bido, çi destê mi ra bêro ez o bikera."