‘Ma partîya ke tecawuzkarî îdare kenê nêwazenê’

2022-06-25 13:44:07


	 

	 

	Derya Ren-Medya Uren

	 

	AMED - Rojê vîyar te de serekê MHPyî Cîhan Kayaalp bi îdayê tecawuzê tutêko 17 serrî rê kerdo, ame tepiştiş. Derheqê babete de ma mîkrafonê xo dergê welatijanê Amedî kerd. Cinîyn reaksîyonê xo yê derheqê serebûtî de ramojna û bi taybetî zî ciwanan vat: "Ma partiyê ke bi nê hişmendî nêwazenê. Eke pîlê ma, ma ra hes kenê, ganî qerarê  xo yê weçînayîşî de dîqet bê."

	 

	Rojê ke serebûtê tecawuzî û qirkerdişê cinîyan zêde beno de, serebûtêk bîn yê tecawuzî hetê MHPyî ra ameyo kerdene, Amed de veng da. 16ê Hezîrane de qerarê feshkerdişê teşkilatê MHPyî yê Bajarê Amedî de ame neqlkerdiş. Dimayê nê eşkerayî Serekê Teşkîlatê MHPyî yê Amedî Cîhan Kayaalp û hîn îdarekarê partî zî hetê Merkezê Pêroyî yê MHPyî wezîfe ra amebî girewtiş, amebî destbendkerdiş.  Ajansa ma JINNEWSî zî xo resna îfadeyê tuto 17 serre ke serekê MHPyî Cîhan Kayaalp tecawuzî ci kerdo. Îfadeyê tutî de zî sûcê kerdê bi delîlan ame kişfkerdiş. Bêguman no serebûto yewin nîyo ke mîyanê MHPyî de rî dano. Derheqê politikayê MHPyî ke kenê û serebûtê tecawuzî yê Amedî rî dayo, ma mîkrafon cinîyanê Amedî rê kerd. Cinî bi dore wina qisey kerdî;

	

	 

	‘Statuyê înan virazêno zî ganî ma hemverê nê vejîyê’

	 

	Wendekara ciwane bi nameyê Naz Unal wina dîyar kerd: “Ma ciwanî Tirkîya de bi ters ciwîyenê. Bifikrîyê  êdî tutî nêeşkenê verê berê xo de vinderê. Verê ez ameyîne mi karê xo kerdêne û hîn zî gêrayîne, labelê nika ez karê xo qedênena û remena şina keye. Ez bi ê tersî nê kuçeyan de gêrena. Serebûtê ke serekê MHPyî kerdo, ma eşnawit. Ganî serê ê serebûtan nêro padayîş. Ti wazenê serekkomar bo, serekwezîr bo ganî lêşinîyê ke kerdê vejê werte. Ganî ma hemverê nê vengê xo vejê ke lêşinîyê wina mîyanê ma de nêmanê. Ma ardê a rewşe ke ma bi şik bibê û embazanê xo ra zî şik bikerê. Ganî ma pey statuyê kesan nêşêrê. Heta ke ma hemverê înan de vengê xo nêvejê, do mîyanê ma de wina lêşinîyan bikerê.”

	 

	‘Ameyoxê ma xêra mekerê’

	 

	Naz Unal wina qedêna: “Serebûtê MHPyî rî dayo tay sucê welatijan o. Ganî şar ê kesan nê bajarî de nêhewêno. Ma kurd ê eslê ma zî no yo. Kesêk tecawuzkar ameyo Amed de partîya xo awan kerdo. Wazenê ma bikerê destê xo. Amancê înan dîyar o. Wa şar destûrê nê ganî nêdo. Çira şar bêveng o? Seba ke ma Rojhelatî yê ganî ma sere nêtewênê. Ez seba pîlanê xo vana! Madem şima ma ra hes kenê û ameyoxê ma fikrîyenê, weçînayîşê xo rast bikerê. Weçînayîş de bes o ameyoxê ma xira bikerê. Weçînayîşêk newe yeno. Her kes berjewendîyê xo temaşe keno, yê ke mîyan de veşenê zî ciwan ê. Perwerdeyî de, ekonomî de, hetê meslegî de û kargirewtişî de reyna ma veşenê. Madem şima ma fikryenê destûrê nê medê. Weçînayîşan rê tay mendo. Ez sey ciwanêke nêeşkena bi rehetî fikrê xo bîyarî ziwan. Ez ciwanêke kurd a, dimayê ke ez şîya keye belkî mi bitepşinê zî. Temaşeyê rewşa ma kewtê ci bikerê.”

	 

	‘Sebeb polîtîkayê bêcezayî yo’ 

	 

	Eylem Kaya: “No serebût ma zaf xemgîn keno. Sebebê bi rehetî tecawuz kenê zî bê guman, polîtîkayê bêcezayî ra yeno. Yew nimûneyê nê zî rojê peyîn de rî da. Cil û belgê cinîyan sey bahaneyê tahrîkkerdişê ame mojnayîş. Sûcdarî zî bi nê rengî  cezaya kêmî gênê. Kesêk nêeşkeno cinîyan bi cil û belgê ci bierjno. No nêbeno bahaneyê veradayîşê qetilan. Bi nê rengî camêrdî bîn zî teşfîqê sûcî yenê kerdiş. Xelatkerdişê tecawuzkaran û qetilkaran hêz dano camêrdê bînan zî. Êdî tutî nêeşkenê vejîyê teber. Mîyanê roje de wexto ke tutî verê çimanê dadîya xo ra vînî benê dayîkî tersenê. Ma ardê na rewşe.”

	 

	‘Ma heqê xo helal nêkenê’

	 

	Eylem Kaya wina dewam kerd: “Bi taybetî serebûtê îstismarî de tewr zêde tutî bi tesîr benê û na rewşe ameya na sewîya ke gonîya ma qerisêna. Ma heme zî heqê xo berpirsyaran rê helal nêkenê. Ma înan efû nêkenê. Tutêk yeno tecawuzkerdiş. Ganî no nêro peygoşkerdiş. Cinîyêke yena veşnayîş, ganî efûkerdişê nê, vistişê cezaya sûcdarî nêro kerdiş. Ganî bi qasî sûcê kerdê ceza bigîrê. Ez wazena nê serebûtan de bi taybetî zî medya biercnî. Seba ke xeylêk rey ziwanê medya beno sebebê teşfîqkerdişî zî. Heme beşê komelî zî ganî hîsgêr temaşeyî serebûtî bikerê.”

	 

	'Mexdûrê tacîzî nînê goştaritiş' 

	 

	Melîke Yanik: Ez bi xo zî mexdûrê tacîzê mêrdeyan a. Mi serê nê kesan de zî dewa akerd. Serebûtê nê rengî de zêde kesê mexdûrî nînê goştaritiş. To ra bawer nêkenê. Xeylêk kesan zî mi ra vat 'Serê serebûte pade, gerre meke. Do derbas bibo'.  Kes to ra bawer nêkeno. Serebûtê winayîn de zî ti nê reaksîyonan ra zaf bi tesîr bena. Serebûtî ra zêdeyêrî zî nê vatişî mi de birînêke kûr akerd. Çîyêk trajîk o ke şar bandêrê nê serebûtan bîyo û rêze ra vînenê." 

	 

	'Nê sûcî bê ceza manenê' 

	 

	Melîke wexto persê ma yê serebûtê tecawuzî yê MHPyî de vejîyawo werte cewab kerd û vat bêşik do serê serebûtî binemexnê. Ma nêwazenê merdimê wina tîya de bêrê hewênayîş. Ma duştê hewênayîşê înan de yê. Ez bi xo Îzmîr ra ameya. Serebûtê wina şaristanê pîlan de zêdeyêrî qewimîyenê. Amed de zî bi hesnayîşê serebûtê wina mi xemgîn keno. Wina asayeno ke tîya de nê serebûtî zêdeyêrî qewimîyenê. Vera ke sûcê bi nê rengî bê ceza yenê verdayîş zî zêdeyêrî benê. Bêcezaverdayîşî ra cesaret gênê." 

	 

	'Ma tîya de MHP nêwazenê' 

	 

	Melek Karataş: Ma asayîş de nîyê. Seke dadî, seke cinîyêke destê ma serê mîyaneyê ma de yê. Ez nêeşkena bi zerrêka rehet tutanê xo bişawa dikanan zî. Ma Tirkîya de ciwîyenê û nê serebûtê ke ameyê nê sewîyeyî ke ma rêze ra bivînê. Ê ke benê sebeb ma yewbînan ra şikî bigîrê ganî tiya nêmanê. Ma partîya MHPyî tîya de nêwazenê. Tîya Amed o, tîya mintiqaya Kurdan a û ma tena HDPyî wazenê. Ma Selahattîn Demîrtaşî wazenê." 

	 

	'Bêşik ma heme zî asayîş de nîyê' 

	 

	Dûygû Yildiz: Bêşik ma heme zî asayîş de nîyê. Seba xopawitişî zî mi KADES ronawo telefonê xo ser. Ez mêrdan û heme komelî zî silasîyî kena ke bi wijdan hereket bigêrê. Duştê serebûtê rêxistinê MHPyî de ri dayo şarî bi reaksîyon o. Seba aramîya komelî zî perwerde zî muhîm o. Tutî yan zî mêrdeyî senîn ê û bi çi hişmendeyeyî yenê pîlkerdiş. Nê madeyî saba ma heminan muhîm ê." 

	 

	'Ma nêwazenê nê serebûtan bieşnawê' 

	 

	Sûde Aydogdû: "Ez newe ra hesnayena û zaf xemgîn bîya. Ma cuya xo ra û bi xusûsî zî cuya tutanê xo ra bişik ê. Şima zî zanenê ke di wexto peyîn de nê serebûtî xeylêk ri danê. Her serebûtî de ma zafêrî tersenê. Tutê ma êdî asayîş de nîyê. Tutê ke ameyê mexdûrkerdiş çi bikerê zî do heqdar nêrê vejîyayîş. Vera ke statuyê nê merdiman eşkera yo. Komela ma de cinî, tutî, heywanî xeylêk yenê îstîsmarkerdiş. Waştişê ma o yo ke, nê serebûtî nêrê ca. Ma êdî nêwazenê nê serebûtan bieşnawê. Êdî ma hetê vîrî û fîzîkî de zî rincan bîyê."