Elewîyî welatîbîyayîşo têduşt wazenê: Ma eşkenê dinyayêke têduşt bimûnê  

2022-06-23 11:19:26


	 

	Marta Somek - Safîye Alagaş 

	 

	STENBOL - Nuştoxe û aktivîsta Elewî Gulfer Akkaya, waştişê xo yê seba welatîbîyayîşo têduşt arde ziwan û vat: "Elewî xora estê. Ganî bêrê vînayîş û qebûlkerdiş. HDP duştê nefretî de têkoşîn keno. Ma eşkenê têreyde cuyêka têduştî bimûnê." 

	 

	Komîsyonê Bawerî û Şaran ê HDPyî, 5ê Gulane de startê 'Pêvînayîşê heqê welatîbîyayîşo têduştî seba Elewîyan' da destpêkerdiş û 18ê Hezîrane de bi tewrbîyayîşê Hemserekê Pêroyî yê HDPyî, xeylêk muşahîdê rêxistinê Elewî û sîyasetmedarî Stenbol de ameyî têhet. Kombîyayîş de heqê welatîbîyayîşo têduşt û problemê welatî de yenê ciwîyayîş ameyî munaqaşekerdiş û mesajê; seba çareserîyê problemî do pîya hereket bikerê, ame dayîş.

	 

	Nuştoxe û aktivîsta Elewî Gulfer Akkaya ke tewrê kombîyayîşî bîye ajansê ma rê derheqê problemêkê Elewî ciwîyenê, waştişê welatîbîyayîşo têduşt de ercnayîş kerd. 

	 

	'Ma sey welatijê planê yê diyîn yenê vînayîş' 

	 

	Gulfere da zanayene ke komeleyê Elewî cîya yeno vînayîş û wina vat: "Elewîyî Tirkîya de komelêkê wayîrê bawerîyêke cîya yê û seba dînê fermî yê dewlete îslam o, her tim cuya perwerdeyî û heta cuya rojane nîna qebûlkerdiş. Têkilîyê cîranî ra bigîrê, heta mekteb, kargeh û sazgehê dewlete Elewîyî her tim plano diyîn de yenê vînayîş. Elewî sewbîna xeylêk reyan vatişê nefretî dir zî yenê rî bi rî. Sey objeyê nefretî ro Elewîyan ewnîyenê. Derheqê Elewîyan de di babeta exlaq û cînsîyetî de sîya kenê. Xeylê merdimî zî bi nê bawer kenê. Vera nê zî hem hetê huqûqî de hem di hetê sazgehî û hem zî di cuya rojane de hemverê Elewîyan de tehdayê pîlî estê." 

	 

	Çîyê ke Elewîyî ciwîyenê... 

	 

	Gulfere wina dergî da qiseyanê xo: "Elewîyî semtê xo de ver bi hêrişan dir yenê rî bi rî, şinê cayê ke sey înan ê, dayîş û herênayîşê xo kenê. Vanê 'Ê zî ma ra yê'. No zî ramojneno ke Elewî Tirkîya de çi ciwîyenê. Seba ke Elewî hamnananî tutanê xo nêşawenê Qursê Quranî, seba nê keyeyê Elewîyan yenê zanayene. Elewî her tim bi qaxûyê asayîşê cuya xo ciwîyenê. Mêrdeyê elewî, cayê sey eskerî de her tim bi qaxû ciwîyenê. Kurdî zî, Armenî zî û Elewî zî nînan baş zanenê. Di her game ya cuya xo de ma bi qaxû û ters ciwîyenê." 

	 

	'Waştişê welatîbîyayîşo têduştî' 

	 

	Gulfere dîyar kerd ke tewr weş welatîbîyayîşo têduştî yo. La Elewî di şert û mercê têduştî de nêciwîyenê û wina îzah kerd: "Îqtîdaro Tirk-Îslamî bi serran o Elewîyan keno qaxûyan. Caardişê qanûnî dir do problemê ewleyî û welatîbîyayîşo têduşt yê Elewîyan hel bibo. Welat de qanûnî nînê ca. Qanûnê xo zî nîyanê ca. Ma welatêkê winayîn de ciwîyenê. Seba nê Elewî di binê tehdayî de ciwîyenê." 

	 

	'Verpersîyarî kewena serê milê sîyasetmedaran' 

	 

	Gulfere qal kerd ke bi asîmîlekerdiş û çinîkerdişî de Elewî heta ewro ameyê û wina vat: "Helkerdişo tewr pîl no yo ke Elewî xo organîze bikerê, îfade bikerê, nê ra nêtersê û nêremê. Ganî waştişê xo bîyarê ziwan, nîyadîyayîşê xo bi eşkera vajê. Na babete heme komeleyî eleqedar kena. No tena bi Elewîyan mimkun nîyo. Senîn babeta Kurdî, babeta Armenî tena babeta Kurdan nîya, no zî wina yo. Ganî heme hetî û partîyê sîyasî eleqedar bê. Gelo nê welatî de çira Elewî kemî sazgehê dewlete de ca gênê? Çira Meclîsî de Elewîyî kemî yê? No hemverê Elewîyan de heqaret o. Wexto vanê 'Tu eleqeyê ma bi nasname û meşrebeyê kesêke çinî yo' zî çimê ma tersinenê. Ez sey Elewîyêke wazena ke Tirkîya de demokrasî bibo. Seba nê wezîfe keweno serê milê heme merdimî. Wezîfe keweno serê milê CHPyî û Îyî Partîyî. HDP nê wezîfeyî keno. Ma seba nê vengdayîşê HDPyî ameyê." 

	 

	'Ganî Elewî bêrê vînayîş û qebûlkerdiş' 

	 

	Gulfere wina peynî ro ci ard: "Îtîfaqo ke bêro awankerdiş de do Elewî her tim bibê. Seba Elewî xora di nê pawitişê sîyasî de yê.  Îtîfaqê HDPyî de xeylêk Elewîyî estê. CHPyî de zî estê. Elewî xora estê, ganî bêrê vînayîş û qebûlkerdiş. Ganî heqê vatişî seba Elewîyan bêro dayîş. Ganî no problem êdî bêro helkerdiş. Ganî waştişê welatîbîyayîşo têduştî yê Elewîyan bêro vînayîş. Wina nêbeno! Wina derbaz nêbeno. Ma eşkenê têreyde cuyêka têduştî bimûnê."