Derheqê pawitoxê şaredarê AKPyî û qorîcîyan de îdianame ame amadekerdiş 

2022-06-20 15:19:16


	 

	 

	ŞIRNEX - Qileban de îdîanameyê derheqê 6 kesê ke mîyanê înan de  pawitoxê şaredarê AKPyî yê Dêrahinî zî esto, tecawuzê tutûke kerdibî hetê 3in Dadgeha Cezaya Giran ya Şirnexî ra ame qebûlkerdiş. Yewin roniştişê dewa 5ê êlule de bêro vînayîş. 

	 

	Vejîya werte ke qezaya Qilebanê Şirnexî de, tutêke bi damarîya xo dir ciwîyayîne, 4 serran bi desteştişî dir rî bi rî menda. 27ê teşrîna peyêne 2021î de dimayê ke tute merdimê ke xo rê qalê desteştişî kena no serebût vejîya werte. Serebût dezgehê edlî de zî ame  destgirewtiş. Dimayê cigêrayîşan vejîya werte ke Cengîz Aydemîr eynî wextî de pawitoxê nêzdî yê Şaredarê Bajarokê Dêrahinî yê AKPyî Cemîl Yildirimî yo, bi hawayêke sîstematîk 4 serran bi hetkarîya 4 kesan desteştiş tute rê kerdo.

	 

	Derheqê babete de cipersayîş ame akerdiş, îdîaname hetê Serdozgerîya Komare ya Şirnexî ra ame amadekerdiş û hetê 3in Dadgeha Cezaya Giran ya Şirnexî ra ame qebûlkerdiş.

	 

	Îdîanameyî de nameyê Metehan Bayram û Onur Yildiz ke desteştiş kerdê û sewbîna nameyê nacnîya tute Z.Y. zî dosya de ame zêdekerdiş. Çarçewaya eynî dosye de 19ê adare de Cengîz Aydemîr, Samî Yildiz û damarîya tute B.A. ame girewtiş û şawitî Zîndanê Pêroyî yê Tîpê Tyê Şirnexî.

	 

	Serdozgerîya Komara Şirnexî derheqê damarî B.A. de "Ferzkerdişê fihûşî" û "Tehdîd", derheqê Cengîz Aydemîr û Samî Yildiz de "Astengkerdişê azadiya kesan", "Hêrişê cinsî" û "Tehdîd" derheqê Metehan Bayram de “hêrişa cinsî” û “Astengkerdişê azadîya kesan”, derheqê nacnîya ci Z.Y. de “Astengkerdişê azadiya kesan” û “Hetkarîya hêrişê cinsî” û derheqê Onur Yildiz de zî “tacîzê cinsî” de îdîaname amade kerd.

	 

	Sûcdaran îfadeyê xo yê dadgehe de sûcdarkerdiş qebûl nêkerd û vatî, 'zûr' ro înan ameyo kerdiş. Sûcdaran pawitişê xo de îdîa kerdî ke yewbînan nas nêkenê. La qeydê HTSyî de vejîya werte ke înan xeylêk reyan yewbînan dir qisey kerdo. Di trafîkê telefonî yê mabênê damarîya tutê B.A.  Cengîz Aydemîr û Samî Yildiz de zî raporê pisporan de ca girewto. Ame eşkerakerdiş ke nê her hîrê merdimî telefon de demêk derg têreyde qisey kerdê. 

	 

	Serdozgerî eşkera kerd ke îfadeyê ke tutan îdîanameyî de vato, sey delîlan ê  û kerdoxî hewl danê sûcê xo binimnê. Di eynî wextî de serdozgerîyî da zanayene ke, seba ke mabênê tutî û kerdoxan de neyarî çinî bîyo, tu sebeb çinî yo ke tut zûran bikero. 

	 

	Îdîaname hetê 3yîn Dadgeha Cezaya Giranî ya Şirnexî ra amî qebûlkerdiş. Yewin roniştena dewaya ci, do 5ê Êlûle de bêro vînayîş.