Dewa Esmerî de seba cuya kolektîfî xebate 

2022-06-19 13:42:47


	 

	Zelal Tunç

	 

	AGIRÎ - Cinîyê ke dewa Esmerî de ciwîyenê her serre menga hamnanî de serdemê berxbirnayîşî de bi hawayeke kolektîfî peşmê mêşna û berxan kom kenê şûnê, dîyar kenê ke seba karê înan asan bibo na hetkarî xeylêk girîng a.

	 

	Dewa Esmerî ya Tutakê Agirî de ya, cinî bi hawayêke kolektîf cuya xo domnenê. Cinîyê ke Çemê Esmerî de yenê têhet, her serre menga hezîrane de peşma ke mêşna û berxan ra yena birnayîş, bi hawayêke kolektîf şûnê. Cinî bi vejîyayîşê rojî dir dest bi kar û barê şûtişî kenê û heta şan de na xebata înan dewam kena.

	 

	Keyeyê Kubar Aslane 20 serrî verê qezaya Melezgîrî ya Muşî ra yenê dewa Esmerî ya Tutaxî de bi ca benê. Kubar Aslane derheqê cuya komunal de ajansê ma rê qisey kerd.  

	 

	‘Seba karê ma asan bibo ma yewbînan dir benê hetkar’

	 

	Kubare dîyar kerd ke bi saetê sibayî de peşma ke mêşna û berxê xo ra gênê benê serê çemî û dest bi şûtişî kenê. Kubare wina vat: “Ma demê berxbirnayîşî de yenê têhet. Her roje ma peşma keyeyêk şûnê. No  karê şûtişê peşme ke xeylêk zehmet o, bi hemkarî tewr lez qedêna. Heme kar û barê dewe serê milê cinîyan de yo. Seba ke ma karê xo asan bikerê, ma yewbînan dir benê hetkar.”

	 

	‘Ma peşme yew bi yew şûnê’ 

	 

	Kubare dîyar kerd dimayê ke zewicyaya Elbaqê Wanî de bi ca bîya û mengê hamnanî zî şinê dewa Esmer û bi keye û dewijan dir prosesê berxbirnayîşî de tewrê prosesê karî benê. Kubare wina vat: “Ma serê siba saete 09.00 de şinê verê çemî û heta şan de peşme şûnê. Peşma nêzdîyê 150 pesî esta. Peşme rengê spî û kehweyî ya. Ma dimayê ke şûnê ma rafînenê. Ma peşma xo sere de şil kenê û deterjan erzenê ser. Camêrdî bi traktoran ser ra derbaz benê û ma pawe manenê ke qirêşê peşmî bêro war. Dima ra ma yew bi yewe çem de şûnê.”

	 

	‘Pesdewarî û ramitiş sewîyeya çinbîyayîşî de yo’

	 

	Kubare tewr peyîn wina vat: “Yewin çimeyê debara ma ramitiş û pesdewarî ya. Krîzê ekonomî tesîrêk pîl serê ma de kerdo. Seba vaybîyayîşê mazotî, ma nêeşkenê erdê xo biramnê. Toximê genim û cewî zaf vay o. Sewbîna pes bi pereyêk kêm yeno rotiş, şit, mast, penîr bi vayîyêk xeylêk kêm dewijan ra yeno girewtiş. Ma tena seba debara xo pes wey kenê. Pesdewarî û ramitiş ameyo sewîyeya çinbîyayîşî.”