Cinîyê sîyasetmedarî: Çapemenîya Kurdî pêwa heme tehdayan têkoşîn kena  

2022-06-19 11:47:38


	 

	Medya Uren 

	 

	AMED - Cinîyê sîyasetmedarî duştê tepiştişê 16 rojnamegeran de reaksîyonî ramojnayî û vatî: "No wextêk derg o duştê çapemenîya Kurdî de hêrişêk kenê. Serrê 90yî de rojnamegerî, ewro zî reyna rojnamegerîye qetil kenê. Labelê çapemenîya Kurdî pêwa heme tehdayan têkoşîn kena û apey game nêerzena." 

	 

	Çerçewayê cipersayîşê Serdozgerîya Komare ya Amedî de 20 ci ra rojnamegerî, pêroyî 22 kesî 8ê Hezîrane de ameybî destbendkerdiş. Dimayê destbendkerdişê 8 rojî zî 22 merdiman ra 16 rojnamegerî ameyî tepiştiş. Derheqê tepiştişê rojnamegeran de partîyê sîyasî û sazgehê sivîlî ra reaksîyonî berz benê. Derheqê babete de cinîyê sîyasetmedarî zî reaksîyonî ramojnayî û vatî, ê do nêeşkê bi tehdayan çapemenîya azade bêveng bikerê. 

	 

	'Ma tarîxê çapemenîye ra zanenê, ê apey nêşinê' 

	 

	Wekîla Hemsereka Pêroyî ya ESPyî Beycan Taşkiran eşkera kerd ke wexto îqtîdar keweno tenganî dest bi şer û hêrişan keno. Beycane wina dewam kerd: "Pêwa nê hêrişan bi xusûsî zî tehdayêke pîl serê çapemenîya Kurdî de kenê. Nê hêrişî yewbînan ra cîya nîyê. Serrêke yo ma hereketê girseyan ra fam kenê ke hêrsê Şarê Kurdî, kedkaran, organîzeyê cinîyan û heme qismê ke têkoşînê azadî danê, duştê îqtîdarê faşîstî yê bîyayeyî de zêde bîyê. Beranberê nê reaksîyonan de manîyan vejenê. Nê hetî de çapemenî cayêke talûke de ca gêna. Vatişê rastîyî, neqlkerdişê xeberan ê saba şarî xetê rojnamegerîya şarî yo. Nê tepiştişî zî seba bêvengkerdişî hêrişêk bî. La ma zanenê nê hêrişî duştê çapemenîya Kurdî de do netîce nêgîrê. Ma do serê nameyê înan de, înan dir, zere de û teber de hewl bidê bibê vengê înan û înan dir têkoşîn bikerê." 

	 

	'Çapemenîya Kurdî bi quwet a' 

	 

	Hemsereka HDPyî ya Amedî Gulîstan Atasoy zî wina hêrişî erjnayî: "Embazê ma eştê nezaret û seba çi ameyê destbendkerdiş ma sere de nêzanabî. Pêwa ci studyoyê înan fînayê binê ablûqa. Nizdîyîyê înan ê ke hemverê çapemenî de xo ra sere de tepiştişê rojnamegeran mojnayêne ma. Tepiştişê rojnamegeran ra asas awan kerdêne. Ganî ma bivînê ke tersê tewr pîlî yê faşîzmî rastîyê înan bi xo yê. Seba komele rastîyî nêvîno, seba hegemonyayê îdeolojîkî yê wareardişî cayê xo bivînê ganî heqîqetî hêsîr bigîrê. Bi nê operasyonan azadîya neqlkerdişê rojnamegeran û azadîya malûmatgirewtişê komelî yenê hêsîrgirewtiş. Serranê 90yî de rojnamegerî qetil kerdêne, ewro zî rojnamegerîye qetil kenê. Labelê heme şert û mercan de kedkarê çapemenîya azade serrê 90yî ra fek têkoşînê xo ra vera nêda. Ma nê hêrişan dir hewêna quwetê înan vîna. Êdî şîyayîşê dimayê nê heqîqetî, wezîfeyê ma heminan o. No tena wezîfeyê kedkarê çapemenîya Kurdî nîyo, wezîfeyê heme qismê ke xo demokrat vînenê yo. Ganî ma seba welatêke azad têreyde têkoşînê xo berz bikerê." 

	 

	'No nizdîbîyayîş nîno qebûlkerdiş' 

	 

	Parlementera HDPyî ya Amedî Remzîye Tosûn zî bi nê vatişan hetkarîyê xo yê seba çapemenîye wina da: "Mi zî di salona dadgehe de roniştena rojnamegeran teqîb kerd. Wexto ma ro qanûnan û qerarê înan biewnê ma do bivînê ke Tirkîya de edalet nêmend o. Ma no rîyê serpersêrî de zî vîna. Senîn ke serranê 90yî de çapemenî amî manîkerdiş ewro zî bi eynî rengî rastê manîyan yena. Tirkîya de çapemenî azade nîya. Heme zî binê tesîrê îqtîdarê AKP û MHPyî de yê. Ê ke di binê emrê înan de zî nîyê, bi tewirêke bêhuqûqî ameyê tepiştiş. Qet wijdanêke nê qebûl nêkeno. Karê rojnamegeran nuştuşê xeberan o. Labelê çapemenîya Kurdî se bikero sûc yeno vînayîş. Derheqê înan de delîlêke çinî yo. Tepiştişê înan bi tewirêke keyfî ame ca. No nêzdîbîyayîş zî nîno qebûlkerdiş. Ma do verê çapemenîyî de bê û ewro bibê vengê înan."