Clare Baker veng da: Şer Vindarnê  

2022-06-15 13:23:37


	 

	 

	Oznûr Deger 

	 

	ANQARA  - Dîrektora Unîte hte Unîon ke sendîkaya tewr pîle ya Îngîlîstanî ya Clare baker vat, Tirkîya vera fikrê Abdullah Ocalanî ra tersena coka tecrîd giran kena û ganî hêrişê eskerî peynî bibê. Clare wina qal kerd: "Tirkîya dewletêke NATOyî ya û welatê heqê înan ê serdestîyî estê îşxal kena. Nê welatan de qirkerdişan kena. Ma veng danê ke nê terorî vindarnê û dest bi muzakereyan bikerê." 

	 

	Dîrektora Unîte hte Unîon ke sendîkaya tewr pîle ya Îngîlîstanî ya Clare baker ke paştî da kampanya ya 'Birêz Ocalanî rê azadî' derheqê tecrîdê serê Rayberê PKKyî Abdullah Ocalanî û hêrişê eskerîyê Tirkîya yê hemverê Mintiqaya Federalî ya Kurdistanî de. Clare sewbîna yew cinîyan ra ya ke mektûbê derheqê hêrişê hemverê Mintiqaya Federalî ya Kurdistanî de îmza kerdbî û şawitbî NYyî rê. 

	 

	'Hereketê Kurdî xeylêk fedakarî kerd' 

	 

	Clare da zanayene ke hereketê înan ê sendîkalî her tim hetkarî dabî têkoşînê Kurdî, la aktîfbîyayîş bi hêrişê DAÎŞî yê hemverê Kobanî de dest pêkerd û vat: "Kampanyaya 'Seba Ocalanî azadî', naskerdişê hereketê Kurdî û îlham o ke merdiman ci ra girewt, têkoşînê sîyasî û kulturê Kurdan xeylêk çîyî mi dir vurînayî. Xeylêk çîyêkê derheqê aştî û seyyewbînîyî de bandêr kerd. Seba merdimî xeylêk fedakarîyî kerdê." 

	 

	'Nuştişê serê cinî de xeylêk tesîr ro mi kerd' 

	 

	Clare wina bale ante serê fikr, fehm û nîyadîyayîşê Ocalanî û wina dergî dayî qiseyanê xo: "Çi heyf mi hema heme nuştişê ey nêwend. Kitabê mi hadreyê, la qismê min ê wendişî tesîrêko pîl ro mi kerd. Eşqêke min ê tarîxî esto. Behskerdişê tarîxê nê herdî yê Ocalanî ez xeylêk tesîr bîya. La hetê polîtîkî de ke yê tewr zêde tesîr ro mi kerd nuştişê serê xelesîyayîşê cinî de bî. Xeylêk çî ê nuştişan ra bêro famkerdiş esto. Ez bawer kena ke bikewê ciwîye do xeylêk çî ci ra bêrê famkerdiş." 

	 

	'Seba hetkarîye ma tewrê kampanya bî' 

	 

	Clare derheqê kampanyaya 'Ocalanî rê azadî' ke sendîkaya înan zî hetkarî daya zî wina beyanat da: "Eya, yew sazgehê ewilî yê kampanyaye organîze kerdê, Sendîkaya Unîte hte Unîon û GMB bî. Sebebê destpêkerdişê kampanya no bî ke ma bibê verpersê çîyê Kobanî de ameyê ca bîyî. Ê wextî de DAÎŞî hêrişê Kobanî kerdêne, merdimî qetil kerdêne û Erdoganî hetkarîya ke merdiman seba Kobanî kerdêne, manî kerdêne. Dima ra heme dinya vîna ke Erdogan hetkarî dano DAÎŞî. Ê wextî reaksîyonê mirdî nêameyê kerdiş. Yanê DYA tay bî hetkar, la seba Kurdan zaf kemî bî. Seke verpersî, ma seke sendîka ma tewirê kampanya bîyî. Kampanya nika baş dewam kena. Nika federasyono ke 17 sendîkayî û heme zî sendîkayê Îngîlîstanî ci de yê TUC (Trade Unîon Congress) tewrê kampanya bîyê. Seba Covîd-19î her çîyî tay vindertî. No hinî tay bî manî. La nika tewirbîyayîşî domnenê." 

	 

	'Bêvengîya Ewropa nêbeno bêro qebûlkerdiş' 

	 

	Clare bale ante serê tecrîdo girano ke serê Rayberê PKKyî Abdullah Ocalanî de yo û serê na babete de zî erjnayîşê xo wina kerd: "Tirkîya wazena fikrê Ocalanî di binê tecrîdî de bigîro. Nêwazena fikrê ey biresino şarî û hewl dana vernî ro ci pado ke nêreso şarî. Ocalanî rê zî fikrê ey di binê tecrîdê giranî de yê. Ma bêrê serê welatê Ewropayî. Ê zî destûr danê ke Tirkîya nînan bikero. Rey reyan vejênê û şermezar kenê û qedîyeno. Sazgehê Ewropayî ke erjê sey azadîya fikrî û demokrasî pîl kenê, duştê çîyêke Tirkîya de yenê ciwîyayîş de çimanê xo ci rê padanê. No bi tu tewirêke nêbeno bêro qebûlkerdiş. CPTyî na babete ser o xeylêk qels maneno. Çîyêke somut nêkeno. Bi da-des reyî veng kerdî ke şêrê Îmralî, la înan xo da het. Nika tecrîd heme zîndananê Tirkîya de vila bîyo. Rewşa tepişteyê sîyasîyan xirab a." 

	 

	'Tecrîd ro heme hetê komele keno' 

	 

	Clare beyanat kerd ke tecrîd çiqas ke tesîr serê Kurdan de bikero zî serê heme rêxistinê cinîyan, sendîkayan, partîyê sîyasî yê muxalîfî û heme hêzê demokratîkî keno. Îşxalîya înan ê hemverê Kurdan de heta hereketê eskerî yê Ermenîstan, Azerbaycan, Libya û Rojhelatê Behrêsîyayî de keno. Bi tewirbîyayîşê Swêdî û Fînlandîyayî yê NATOyî ma vîna. Heme kesê duştê dewleta Tirkî de vejîyenê terorîst yenê îlankerdiş. Girankerdişê tecrîdî polîtîkayê şerî vejîyenê werte. Hemverê Rojawanî û Mintiqaya Federe ya Kurdistanî de hêrişî dewam kenê. Amancê dewleta Tirkî no yo ke merdimê ke uca de yê hetê etnîkî de pak bikerê û multecîyê Erebî weyra de ca bikerê. Çîyêke Rojawan de yenê ciwîyayîş hetê dewleta Tirkî ra nîno qebûlkerdiş." 

	 

	'Hêrişê hemverê Kurdan de tesîr serê sîyasetê dinya de keno' 

	 

	Clare dîyar kerd ke hêrişê hemverê Kurdan de tesîr serê sîyasetê dinya de zî keno û bêşik no hêriş do hûmara multecîyan zêde bikero û vat: "Do multecîyî zêdeyêrî verê xo bidê Ewropa. Ma vînenê ke şerê hemverê Kurdan de heta NATOyî zî derg bîyo. Tirkîya îtîrazê muracatê Swêdî û Fînlandîyayî kerd. No heme xo resineno şerê hemverê Şarê Kurdî. Di hêrişanê Tirkîya de bêşik verpersîyarîya NATOyî zî esta. Tirkîya welatêke NATOyî ya û welatê heqê înan ê serdestîyî esto îşxal kena. Nê welatan de hewldayîşê qirkerdişî kena. Welatê NATOyî konseptê azadî, demokrasî, heqê merdiman û dewletê huqûqî pîl keno. La tarîxê NATOyî ramojnayo ke no konsept di xeylêk rewşan de ameyê peygoşîkerdiş." 

	 

	Clare bale ante serê mektûbê 16 sendîkayê Îngîlîzî ci de yê, di 18ê Gulane de Seferetxaneyê Îngîlîstanî ra Tirkîya rê şawitî û na babete ser o zî wina qal kerd: "Ma no mektub semedê operasyonê eskerî yê Tirkîya di sînorê Iraqî û Rojawanî de lezkî yeno kerdiş şawit. Ê wextî çimê heme dinya serê Ukraynayî de bî. Tirkîya di babeta Ukraynayî de bî mabênkerdoxê aştî. La heto bîn ra zî sivîlan terorîze kena. Seba dîyalogê bi Ocalanî dir di mektûb de ma veng kerd. Ma sendîkanê Îngilîstanî rê şawit. La seba ma êdî YE ra nîyê, ma sazgeyê Ewropa ra hetkarî nêwaşt." 

	 

	'Ganî ma nuştişan bidomnê' 

	 

	Clare sewbîna nê çîyî qal kerdî û wina beyanat da: "Sewbîna ma 75 cinîyan Rêxistinê Cinîyan ê NYyî rê mektûbêk akerde şawit. Ma cinîyan no mektûb nuşt. Seba Ocalan zî her tim di nuştişanê xo de vano perceyêke tewr muhîm ê hereketê Kurdî cinî yê û azadîya cinîyan a. Ma mektûb şawit rêxistinê cinîyan rê, seba no şer duştê cinîyan de ameyo destpêkerdiş. Ma bi umîdî ke do cinîyî nê şerî vindarnê. Ma hema mektûb ra verpersêke nêgirewto. La ganî ma nuştişê xo yê seba sazgehan bidomnê. Seba ma nêeşkenê wina hesab înan ra bipersê, ganî bi nê tewirî ê zî Tirkîya ra hesab bipersê. Waştişê ma no wo ke hêrişkerdişê Tirkîya ke hemverê Kurdan de yê, bêro cigêrayîşkerdiş. Ma do bibê teqîbdarê mektûbê xo. Çîyo ke Tirkîya kena îşxalkerdişêke eksê huqûqî yo. Ganî Netewê Yewbîyayeyî bi tewirêke xurt duştê nê de vinderê." 

	 

	Clare wina peynî ro ci ard: "No şer ancax bi dîyalogî beno peynî bibo. Bi sîlehan û zorîyî nêbeno. Tirkîya çend serrî verî Hereketê Kurdî dir ronişte û prosesê aştîye da destpêkerdiş. Sewbîna rewşêke wina Vakurê Îrlanda de zî ame ciwîyayîş. Na rewşe bi muzakere ameye helkerdiş. Seba aştîyêke mende ganî muzakere bibo. Ganî hukmatê Tirkîya newe ra bikewo pêvînayîşê aştî."