‘Duştê zilmî de ganî dadîyî bibê yew’ 

2022-06-07 15:20:46


	 

	 

	 

	Rojda Aydin 

	 

	ŞIRNEX  - Keser Îrdegune ya ke lajêke aye 7 serrî verî amebî qetilkerdiş û yew zî 6 serrî yo tepişte yo ard ziwan ke bi serrano zilmî dir rî bi rî mendê û vat: "Ciwîya ma her tim  zilmî dir derbas bî, ma her tim zerrevêşayeyê. Ganî dadîyî bibê yew û têreyde vengê xo berz bikerê û vajê êdî bes o." 

	 

	Kurdistan de şima kamcîn berê keyeyêke akerê, şima vînenê ke bi tehda û zordarîyê dewlete dir rî bi rî mendê. Cinîyê Kurdistanî birînê xo bi xoverdayîş û têkoşîna xo tutanê xo derman kenê. Yew ê cinîyan ra zî Keser Îrdegune ya 43 serrî ya. 

	 

	Kesere ya ke dadîya 7 tutan a, bi eslê xo  dewa Biryanî yê Şirnexî ra ya. Kesere zî di serranê 90yî de bi polîtîkayê dewlete yê seki ferzkerdişê qurûcîyî dir rî bi rî manena û coka talkerdişê dewe serra 92yî de keyeyê xo dir barê Silopî bena. Ê wextî de mêrdeyê Kesere û pêwa 2 merdimê aye yenê tepiştiş û dimayê 3 mengan yenê tehlîyekerdiş, Silopî ra vejênê şinê Şirnex uca de xo ca kenê.

	 

	Kesere ya ke bi serran zilm û zordarîyî dir rî bi rî manena, ajansê ma rê behsê ciwîya xo kerd. 

	 

	Hîkayeyê barkerdişî... 

	 

	Kesere, wina qalê talkerdişê dewe kerd: "Di serra 92yî de dewlete eşt serê dewa ma û vatî yan şima do bibê qurûcî yan zî şima do dewe ra vejîyê. Ma qurûcîyî qebûl nêkerd û eskeran banî û dewa ma xerepnayî û wêran kerdî. Tutîyî ra heta ewro yeno vîrê mi ke zilmêke pîl serê ma de yeno kerdiş. Ma ciwîya xo ra qetî fam nêkerd. Wexto ke dewî ameyî talkerdiş ciwîyê bedilîya cehenemî. Rojo ke eşt serê dewa ma cinî û tutî bi remyayîş dewe ra vejîyayî. Ma verê xo da Silopî. Uca de eşt serê keyeyê ma, mêrdeyê min û çend merdimê ma yê bînî ameyî destbendkerdiş û 3 mengî di zîndan de mendî. Wexto ke mêrdeyê mi ame veradayîşî, ma na rey verê xo da Şirnex. Labelê weyra de zî polîsan her şewe serê keyeyê ma de girewtêne. Weyra de zî zilmê dewlete dewam kerd." 

	 

	'Lajê mi ame qetilkerdiş' 

	 

	Kesere ya ke bi serran zilmê dewlete dir rî bi rî manena, 27ê Tebaxe ya 2015î de lajê aye Adem Îrdegun taxa Yeşilyûrdî de yeno qetilkerdiş. Kesere wina behsê qetilkerdişê lajê xo kena: "Lajê mi wendekar bî û seba ke lazimîyê wendegeyê xo bîyaro ca pastexane de xebetîyayêne. A şewa ke lajê mi bêro kiştiş, ez ro ci gêraya, mi vat 'Bêre werd hadreyo' û ey zî vat 'Ez huna yena'. Bî şan mi vengê sîlehî eşnawit. Ez vaz daya û mi vat lajê mi kiştî, kesî mi ra bawer nêkerd. Ez vazdaya serê cadeyî û mi vîna ke lajê mi kişt o. Verîyê ke lajê mi bêro qetilkerdiş persêr û hakimî mêrdeyê mi ra vatbî 'Lajê to yan do bêro tepiştiş yan zî do bêro kiştiş' û lajê mi amebi kiştiş. " 

	 

	'Lajê mi Selman zî ameyo tepiştiş' 

	 

	Kesere ramojnayîş kerd ke no 7 serrî yo cayo ke lajê aye ameyo qetilkerdiş ra derbas nêbîyo û vat: "Ez nêeşkena uca ra derbas bibî. Wexto ke ez uca vînena, zerra mi vêşena û lajê mi yeno vîrê mi. Lajê mi  a şewa ke ame qetilkerdiş newe kewtbî 16 serrî yê xo. Dimayê ke  Adem ame qetilkerdiş serrêke pey ra lajê mi Selman Îrdegun zî ame tepiştiş. Lajê mi 6 serrî yo zîndan de yo û nêweş o. Heta nika 3 reyî sereyê xo ra emelîyat bîyo. Gonî şî kewte mezgê lajê mi û sewbîna mezgê ey texrîp bîyo û 25 rojî di muşahîdîya îstînayî de mend. La pêwa na nêweşîye, di serra 2016î de ame tepiştiş. Platîn di sereyê lajê mi de esto. Lajê mi astengdar o. Rewşa ey xiraba. Lajê mi nêweş o û nêeşkeno zîndan de bimano. Ma muracatê xeylêk cayan kerd. La verpersêk pozîtîf nêdayî ma. Lajê mi nika di Zîndanê Şirnexî de yeno tepiştiş." 

	 

	'Wa no zilm peynî bibo' 

	 

	Kesere ya ke pêroyê ciwîya aye bi zilm û zordarî dir derbas bîyo, nika seba heme dadîyê Kurdî veng a edaletî kena. Kesere wina peynî ro qiseyanê xo ard: "Çirê no zilm ro ma kenê? Lajêke mi ame qetilkerdiş û yew zî ame tepiştiş.  Ê, ma ra çi wazenê? Zerrî û kezeba dadîyan bi serrano vêşena. Wa êdî no zilm peynî bibo. Ganî heme dadîyî vengê xo berz bikerê û vajê êdî bes o. Zîndanan de xeylêk merdimî ciwîya xo bedilna. Her cayê Kurdistanî de  şer esto û tutê Kurdî yenê kiştiş. La qey dadîyî guna nîyê? Wa no şer vindero û edalet bêro ca. Wa êdî no zilm peynî bibo!"