Several Ballikaya: Duştê tecrîdî de dem demê têkoşînê muşterekî yo 

2022-06-07 13:28:16


	 

	 

	Marta Somek 

	 

	STENBOL - Avûkate Several Ballikaya da zanayene ke tecrîd şarî rê yeno ferzkerdiş û wina vat: "Di serra 1999î de wextê sîstemê Îmrali ame awankerdiş sere ra reaksîyonî qels bî, ewro tecrîd şarî rê yeno ferzkerdiş. Yewin metod, têkoşînê yewbîyayîşî û duştê nê de reaksîyonî ramojnayîş ê." 

	 

	Seba tecrîdê giranî yê serê Rayberê PKKyî Abdullah Ocalanî ke 23 serrî yo Îmrali de tepişteyo, no serrêke yo malûmatêk ci ra nîno girewtiş. 2011î ra heta nika pêvînayîşê avûkatan dir yenê manîkerdiş, 8 serrî pey ra yewin rey di 2yê Gulane ya 2019î de pêvînayîş avûkatan dir ame ca. 2019î de bi pêroyî 5 reyan  avûkatan eşkayîbî pêvînayîş bikerê. Di 23 serrî de, di 27ê Nîsane ya 2020î de û 25ê Adare ya 2021î de pêvînayîş bi telefon keyeyî dir ame ca. Avûkatî, 7ê Tebaxe ya 2019î ra yo nêeşkenê muvekîlê xo dir pêvînayîşî bikerê. 

	 

	Avûkatê Buroyê Huqûqî yê Asrînî duştê tecrîdî de muracatê CPTyî kerdî û veng kerdî ke lezkî bikewê hereket. Bi serekîya Kongreya Demokratîke ya Şaran (HDK), Kongreya Komele ya Demokratîke(KCD), Partîya Mintiqayê Demokratîke(DBP), Federasyona Komeleyê Hetkarîya Huqûqî yê Keyeyê Tepişteyan dir(MED-TUHAD-FED), Hereketê Cinîyan ê Azadan (TJA) duştê tecrîdî de, di 12ê Hezîrane de bi sloganê 'Duştê tecrîdî de seba azadî bêro pawitiş, ma hereketê Gemlîkî kenê' organîzeyêke yeno plankerdiş. 

	 

	Yew a avûkatan ra ke tewirê konferansê 'Duştê sîyasetê tecrîdî de heqê aşti' bî, Several Ballikaya derheqê tecrîdî de nîyadîyayîşê xo ardî ziwan û da zanayene ke, yewin metod duştê tecrîdî de têkoşînê yewbîyayîşî ya û polîtîkayê tecrîdî ajansê ma rê erjna. 

	 

	'Wexto kewenê hewldayîşê şerî berê Îmrali padanê' 

	 

	Severale da zanayene ke her reyî Tirkîya de aştî yena munaqaşekerdiş berê Îmraliyî pêvînayîşan rê yeno akerdiş û wina vat: "Her rey ke kewenê hewldayîşê şerî berê Îmraliyî  padanê. Rayberê PKKyî Abdullah Ocalan 23 serrî di binê tecrîdê giranî de yo. No demêke derg o, Îmrali dir pêvînayîşî çinî yê. Di zîndanan ê bînan de zî caardişê tecrîdî û polîtîkayê şerî yenê kerdiş. No wexto peyîn de hemverê Mintiqaya Federe yê Kurdistanî de operasyonî yenê kerdiş û no zî rayîr verê zêdebîyayîşê binpaykerdişê heqan ê zîndanan de akeno. Tecrîd Îmrali de domneno, binpaykerdişê zîndanan zêdeyêr benê. Bêşik nê heme girêdayeyê yewbînan ê. Hetêke ra şer yeno rayîrşîyayîşî hetêke bîn ra zî merdimê duştê nê polîtîkayan de têkoşînê demokrasî û huqûqî danê, yenê tepiştiş. Serê nê de binpaykerdişê heqan yenê zêdekerdiş." 

	 

	'Ganî hêzêke organîzekerde bêro awankerdiş' 

	 

	Severale dîyar kerd ke ganî aştî û demokrasî zêde bibo û vat eke wina bo do şer zî kemî bibo û wina beyanat da: "Di eynî wextî de hewldayîşê şerî yeno manaya ke tehdayê serê hêzê demokrasî de zêde benê. Caardişê zîndanan de zî winayê. Rayîro ke şêro aştî bêşik bi munayene têkoşînî mimkun o. Duştê polîtîkayê şerî de hêzêke şarî yê organîzekerde mimkun o. Seba no şer vindero ganî hêzêke organîzekerde bêro awankerdiş. Padayîşê berê Îmrali yeno manaya ke no hêzê têkoşînî nêvejîyo werte. No sey tedbîrêke yeno kerdiş ke vindertişê girseyoke duştê şerî de yo, nêvejîyo werte." 

	 

	'Tecrîd heme komele rê ame ferzkerdiş' 

	 

	Severale beyanat kerd ke tecrîdo ke serê Rayberê PKKyî Abdullah Ocalanî de yeno ca, serê heme zîndanan de vila bîyo û wina derg kerd: "Di 1999î de  wexto ke sîstemê Îmrali ame awankerdiş tena Kurdî û muxalîfê şorişgêrî duştê sîstemê tecrîdî de vejîyayî. La coka ê hêzê muxalîfî pîlî nêbî, di serrê 2000î de operasyonê zîndanan ameyî ca. Coka reaksîyonê duştê ci de zî qelsî bî, ewro nê tecrîdê serê komele de yê di rojeve de yê. Ewro konserî yenê qedexekerdiş, deyîrê ke kuçeyan de yenê vatiş, yenê qedexekerdiş, festîvalî yenê qedexekerdiş. Tecrîd serê heme komele de ameyo ferzkerdiş. Her keso ke di serê nê herdî de ciwîyeno para xo nînan ra gêno. Krîzê ekonomî, tehdayê serê merdiman de netîceyê nê tehdayê topyekunî yo. No perçeyêke tecrîdî yo. Ganî tu kes xo teverê nê ra nêgîro." 

	 

	'Wext wextê têkoşînê muşterekî yo' 

	 

	Severale di peynîyê qiseyanê xo de vat tecrîd problemê heme merdiman o û wina veng kerd: "Tu kes nêeşkeno vajo ma teverê nê tecrîdî de yê. Her keso ke serê nê herdî de ciwîyeno, di binê tecrîdî de yo, coka eke duştê nê de vejîyê bedelê ci zaf giran o. Ewro vêşanbîyayîş, feqîrî û tehdayê bîyayeyî netîceyê nê yê. Netîceyê tecrîdî yo. La ganî sebebî bêrê vînayîş. Duştê nê de vejîyayîş di eynî wextî de metodê têkoşînî yo. Ganî heme hêzê demokrasîyî têkoşînê muşterekî organîze bikerê. Yewin metod têkoşîn o, duştê nê de reaksîyonêke muşterek ramojnayîş o."