Sevda Erdane ya CHPyî: Erdogan sîyaset serê cinîyan de keno  

2022-06-04 11:46:29


	 

	ANQARA  - Tayyip Erdogan seba cinîyê ke tewirê Xoverdayîşê Gezîyî bîbî heqaretê 'Surtuk (Pîseya kuçan)' kerdbî. Parlementera CHPyî ya Îzmîrî Sevda Erdan Kiliçe zî vat: "Erdogano ke serê bedenê cinîyan de sîyaset keno, ziwano ke xebetneno her tim resayo heqaretî. No wezîfe yê min o, ez o gerre bikerî. Serekkomaro ke qels bîyo û nêeşkeno dewlete bi rayîr de bero, seba cayê xo bipawo resayo nuqteyê ke her tewirî sûc keno." 

	 

	Serebûtê Gezîyî 27ê Gulane ya 2013î de dest pêkerdî û xeylêk cayê welatî de vîla bîyî. Bi amancê hetkarî dayê xoverdayîşî, mîyan de Mucela Yapici, Çigdem Toker û Osman Kavala zî estê, ro 16 merdimî ceza amî birnayîş. Bi hezaran merdimî duştê ceza de vejîyayî kuçeyan reyna bîyî hedefê AKPyî. Serekkomarê AKPyi di rojanê vîyarteyî de cinîyê ke tewirê protestoyan bîyê mojna ra û heqaret kerd û cinîyan ra vat, 'Surtuk'. Partîyê sîyasî derheqê Erdoganî de muracatê sûcî kerdî. Reaksîyonê cinîyan zî domnenê. 

	 

	Parlementera CHPyî Sevda Erdan Kiliçe derheqê babete de erjnayîş kerd. 

	 

	'Erdogan sîyasetê xo serê cinîyan de keno' 

	 

	Sevda da zanayene ke Xoverdayîşê Gezîyî 9 serrî verî ameyo kerdiş xoverdayîşêko tewr heqdar, tewr aştîyane yê serê nê herdî de ameyo kerdiş û merdiman bi yew vengî îdarekarê nê welatî ra vatê 'Êdî bes o'  û bi nê tewirî hewl dayê vengê xo bidê hesnayîş. Sevda wina derg kerd: "No têkoşînêko rûmetî ke heta peynî ez bi heqdarîya ci bawer a û ez zî weyra de bîya. No têkoşînêko rûmetî bi. Kam vano çi wa vajo, ma bi nê xoverdayîşî serberz ê. Welatê ma nîno îdarekerdişî. Ekonomî ra bigîro heta hukmî her çî apey şîyo. Coka bi israrê polîtîkayê şaşî de dest erzenê çi her çî lêşin kenê û di destê înan de manenê. Bêşik bi no fikr û tersî zî ke îqtîdar serf keno û eyarê înan roj bi roje xerepêno. Roj bi roje dewayê heqaretî, zilmî û tehdayî zêde benê. Serekkomar Erdogan sîyaset serê cinîyan de keno û ziwano ke xebetneno zî resaya nuqteyê heqaretî. Seba ey cayê cinîyê ke heqê xo wazenê, hewcedarê kesî nêbenê, serê ninganê xo de vindenê, verê ey de çinî yo. Serekkomaro ke ganî welatî serê payan de vindarno, nê vatişê ey şermo tewr pîl o.  Beno ke ey nê vatişê xo ra şerm nêkerd, la ma herinda ey de şerm kerd." 

	 

	'Gelo poşmanîya mergî bena?' 

	 

	Sevda dîyar kerd ke her tim vatêne cinî Tirkîya de di planê peynî de yê, la di wextê AKPyî de cinîyî planê diyîn de nîyê zî û wina ci de şî: "Cinîyî bi pêroyî çinî yenê hesebnayîş. No problem tesîr serê heme hetê komele de kerdo û her ke şino zêdeyêr beno. Her roje tacîz, tecawuz, heqaret û kiştişê cinîyan yenê ca. Ma xeylêk bi hêrsê. Kiştişê cinîyan polîtîk o. Îqtîdar bi nê vatişî di ciwîya ma de ca kerd. Kiştişê cinîyan meşrû keno û seba qatilan zî rewşa başe ra ceza fîneno. Gelo poşmanîya mergî bena?" 

	 

	'Mi no xo rê kerd wezîfe' 

	 

	Sevda da zanayene ke sey merdimêke ke di Xoverdayîşê Gezîyî de ca girewta, do derheqê Tayyip Erdoganî ke di şexsê milyonan de heqaret ro cinîyan kerdo de, do muracatê sûcî bikero û vat: "Mi no xo rê kerd wezîfe. Hukm ewro xoser nêbo zî do rojêke edalet bêro ca. Ewro dadgere coka tersê bedilnayîşê cayî û coka tehdayî nêeşkena vengê xo bikero. Eke ma demokrasî bîyarê nê welatî do her kes boyêka rehete bigîro. Serekkomar seba ke cayê xo bipawo ameyo sewîyeyo ke her tewirî sûc keno. Di welatêke de qerarê DMMEyî û DDByî nîno nasnayîş, netîceyê vatişê ke yenê vatiş zî  xemê înan nîyê." 

	 

	'Ma sere nêtewêna, ma nêtewênenê' 

	 

	Sevda di peynîyê qiseyanê xo de veng ro heme cinîyan kerd ke înan tu reyî duştê tarîyî de sere nêtewênayo û do nêtewênê û wina peynî ro ci ard: "Ê vanê qey do bi nê dewayan, hêrişan, nengan, heqaret û tehdîdan ma bipelexnê. Kerem bikerê bêrê meydanan. Vizêrî zî nêeşkayîbî bipelexnê do ewro zî nêeşkê bipelexnê. Ma do bêvindertiş têkoşînê xo bidomnê. Vîrî ra mekerê ciwîyayîş xoverdayîş o!"