‘Seba azadîya fîzîkî ya Birêz Ocalanî ma 12ê Hezîrane de şinê Gemlîk’  

2022-06-02 13:56:24


	 

	Marta Somek 

	 

	STENBOL - Hemsereka Pêroyî ya DBPyî Saliha Aydenize venga beşdarîyê rayîrşîyayîşê 12ê Hezîrane ke Gemlîkê Bursayî de bi sloganê, "Hemverê sîyasetê tecrîdî seba ma azadî bipawê ma ver bi Gemlîkî rayîra şinê” bi ca bêro, kerd û vat: "Babeta esil ê rayîrşîyayîşî virardişê polîtîkayê tecrîdî yê bi Tirkîya danê vînîkerdiş o. Sewbîna ma wazenê azadîya fîzîkî ya Abdullah Ocalanî bi ca bêro."

	 

	Tecrîdê giran ê serê Rayberê PKKyî Abdullah Ocalanî ke Zîndanê Asayîşê Berzî yê Tîpê Fyê Îmraliyî bi 23 serrî yo yeno tepiştiş, her ke şino kûrêr beno. Bi dorê serrêke yo ke seba tecrîdî xebere Abdullah Ocalanî ra nîna girewtiş. Hemverê nê her hetê dinya de venga seba azadîya fîzîkî ya Abdullah Ocalanî berz bena.  Hemverê tecrîdî Kongreya Demokratîke ya Şaran (HDK), Kongreya Komela Demokratîke (KCD), Tevgerê Cinîyan ê Azadan (TJA), Partîya Mintiqaya Demokratîk (DBP), MED-TUHAD FEDî seba azadiya fîzîkî ya Rayberê PKKyî Abdullah Ocalanî de venga beşdarîya rayîrşîyayîşê Gemlîkê Bursayî ke do 12ê Hezîrane de bêro kerdiş, kerd. 

	 

	Hemsereka Pêroyî ya DBPyî Saliha Aydenize derheqê rayîrşîyayîşê 12ê Hezîrane de ajansê ma rê ercnayîş kerd.

	 

	‘Tecrîd 1999î ra dewam keno’

	 

	Salîha dîyar kerd ke tecrîd 1999î de dewam keno û wina vat: "Ma wurzê tecrîd tena serê Birêz Ocalanî tena bi 7 serrê peynî biercê no rast nîyo. Tecrîdê 23 serran ê bêmabên babeta vatişî ya. 1999î ra nata nê sîstemê Îmraliyî Tirkîya de bi qanûn û nêzdîbîyayîşê taybet yenê kerdiş. No tecrîd tena bi Îmraliyî sînordar nîyo. Her cayê wareyî de her sazgehî de tecrîd bi ca yeno û rewşa zîndananê Kurdistan û Tirkîya werte de yo. Her roje zîndanan ra cenaze vejênê. Îşkence û muameleyê nêbaş zîndanan de dewam kenê. Nê tecrîdê Îmraliyî dest pêkerd û nika açaryayo metodêk îdarekarî.”

	 

	‘Ganî şatê Rojhelatê Mîyanên pîya têkoşîn bikerê’ 

	 

	Salîha, wina bale ant serê polîtîkayê şer û tecrîdî: "Cayê ke bi hezaran kesî seba tweetekî yenê muhakemekerdiş, cayê ke her der bi çeteyan pirr o, cayê ke teda, pelçiqnayîş, qetlîamê cinî, xoza û ziwan esto, kerdişê polîtîkayê dişminîyê kurdan, şerê her çar parçeyê Kurdistanî giredayê polîtîkayê tecrîdî yo. Seba polîtîkayê şerî nika krîzê ekonomî rêza yewin de ca gêno. Sebebê heme krîzan seba rêjimê yewmerdimêk bi ca yeno. Tena Şarê Kurdî ganî şatê Rojhelatê Mîyanên pîya hemverê faşîzm û krîzê bîyaye têkoşîn bikerê.”

	 

	'Ma behsê azadîya fîzîkî kenê' 

	 

	Salîha, qiseyanê xo de bale ante serê rol û mîsyonê Rayberê PKKyî Abdullah Ocalanî û vat: "Birêz Abdullah Ocalan duştê polîtîkayê şerî de her tim fersendê ke vejîyayê werte erjnayêne.  Seba averfînayîşê demokrasîyî her tim vindertişê ey bîbî. Seba çareserîya problemê Kurdî bi rayîrê demokratîkî her tim rayîr û metodî ardêne ziwan. Perspektîfê Birêz Abdullah Ocalanî,  ewro beno alternatîfê heme krîzê ke dinya de yenê ciwîyayîşî. Ma behsê pêvînayîşê keyeyî û avukatan nêkenê, ma behsê azadîya fîzîkî ya Birêz Abdullah Ocalanî kenê." 

	 

	'Îqtîdar rejîmê xo ferz keno' 

	 

	Salîha, eşkera kerd ke tena Şarê Kurdî ney, cinîyî û ganî muxalefet yew rey hemverê tecrîdî de tevrê xo bimojnê ra û wina qal kerd: "Ma têreyde prosesê 2013 û 2015î vîna,  îqtîdaro ke seba menfîetê xo senîn ameyoxê şaran apey berd ma vîna. Di demêke wina kilm de ma vîna ke  Abdullah Ocalan senîn îmkanê aştî awan kerd. La ewro îqtîdar rejîmê xo ferz keno. Ganî ma ewro duştê tecrîdî de hewceyîya azadîya fîzîkî vejê aver. Ganî duştê hewayê tersî de ganî ma tecrîdî biancê û azadîya fîzîkî aver bifînê. Yewin rayîrê çareserîya heme krîzan no yo. Seba çareserîya problemê Kurdî û averfînayîşê demokrasîyî ganî Birêz Abdullah Ocalan azad bibo. Seba nê zî ganî ma heme têreyde têkoşîn bikerê."

	 

	'Do ver bi Gemlîkî de rayîr şêrê' 

	 

	12ê Hezarane de do rayîrşîyayîşê Gemlîkî dest pê bikero. Derheqê babete de Salîha wina nîyadîyayîşê xo ardî ziwan: "Duştê hewayê tersî de û seba ramojnayîşê rol û mîsyonê Birêz Abdullah Ocalanî ma do şaristananê Kurdistanî û Tirkîyayî ra biherekîyê Gemlîkî. Amancê nê rayîrşîyayîşê ramojnayîşê tesîrê tecrîdî yê serê şarî de, rojevkerdişê tecrîdî yê. Ma hewl bidê ke heme şarê Tirkîyayî, cinîyî û ciwanî tewirê rayîrşîyayîşê ma bibê. Duştê tecrîdî de ganî têkoşînêko yewgirewte bêro dayîş."