Hunermende Nudem Durak:  Ganî ma wayîr ro yewbînan vejîyê 

2022-05-26 13:34:52


	 

	ŞIRNEX - Hunermenda Kurde Nûdem Dûrake ya ke seba deyîranê Kurdkî vatîbî amîbî tepiştiş, di telefonê keyeyê hewteyî yê xo dir bi deyîra “Çîyayê Me” hetkarî hunermendan ra waşt. 

	 

	Hunermenda Kurde Nûdem Dûrake ke qezaya Dêrgulî ya şaristanê Şirnexî ra ya, serra 2015î de seba deyîre bi Kurdkî vatbî, 2 dewayê cîyayî ra 19 serrî cezaya zîndanî ro ci ame birnayîş. Nûdem Dûrake ke bi nêweşîya Graves (Guatrê Jehrî) kewtebî di zîndan de talûkeyê ci beno ke vengê xo vindî bikero. Heta nika xeylêk hunermendê namdarî yê seke Endamê Koma Muzîkê Pînk Floyde yê Brîtanî Roger Waters serê hesabê xo yê dîjîtalî de Nûdeme rê azadî waştibi. Nûdema ke 6 serrî yo Zîndanê Baybûrtî yê Tîpê Myî de tepişte ya, bi telefon keyeyê xo dir pêvînayîşê hewteyî kerd û bi deyîra “Çîyayê Me” hetkarî hunermendan ra waşt. 

	 

	Nûdeme, di pêvînayîşo ke telefonî de kerd eşkera kerd ke, a tersena ke têlê vengê aye zirar bivînê û vat: "Ez bişik a ke vengê xo vindî bikerî. Vera ke boya mi çikêna. La wexto ke bala xo dana tibbî, tib xeylêk aver kewto. Eke ez zîndan ra bêrî veradayîş, şansê min o ke ez bieşkî bêrî tedawîkerdiş û rayîr verê na nêweşîye de bêro girewtiş, esto.  La eke ez nêrî veradayîş û erey bimanî, tersena ke nêweşîya mi aver bikewo û nêeşkî rayîr vernî ro ci bigîrî. Vera nê yewî ez wazena wextê ke nizdî de bêrî veradayîş. Ez wazena verîyê ke vengê xo vindî nêkerî, vejîyî." 

	 

	'Wa hunermendî ro yewbînan wayîr vejîyê' 

	 

	Hunermende Nûdeme, ard ziwan ke çîyo înan rê tewr muhîm hetkarîya û no veng kerd: "A rastî venga mi hunermendan rê no yo ke, wa ro yewbînan wayîr vejîyê! Tewr kêmî ganî hunermendî hewl bidê û destê xo bidê yewbînan ke bieşkê xo bi asanî îfade bikerê. Xo ra nê zî kenê. Ma çi tever de bê, çi zere de bê ferq nêkeno, ma vînenê ke senîn konserî yenê betalkerdiş û manîkerdiş. La hunermendê teber de yê zî reyna eşkenê hetkarî bidê hunermendanê zereyî. Ê eşkenê seba nê yewî  hewl bidê û do serkewtiş ê înan bo." 

	 

	Hunermende Nûdeme, dima ra bi deyîra “Çîyayên Me” hetkarî hunermendan ra waşt.