Sîyasetmedaran ra duştê tecrîdî de reaksîyon: Heta Serek azad nêbo ma zî azad nîyê  

2022-05-26 09:21:17


	 

	Oznur Deger

	 

	ANQARA - Cinîyanê sîyasetmedaran ra Gulîstan Koçyigit bale ante serê tecrîdê Rayberê PKKyî Abdullah Ocalanî û wina vat: "Tecrîd perçeyêke sîyasetê qirkerdişî yo ke hemverê Kurdan de yo." Pervîn Tûnbûle zî vat: "Heta serek azad nêbo ma zî azad nîyê û ganî tecrîd lezkî wedarîyo." 

	 

	Tecrîdê serê Rayberê PKKyî Abdullah Ocalanî 23 serrî yo bi tewirêke sîstematîk domneno. Dimayê prosesê çareserîyî hetê îqtîdarê AKPyî ra ame qedênayîş û herinda ci de no serrêke yo malûmatêk Abdullah Ocalanî ra nîno girewtiş. 

	 

	8 serran de tena 5 pêvînayîşî 

	 

	22yî Temûze ya 2015î de prosesê çareserî peynî bî û 8 serrî yo Abdullah Ocalanî dir pêvînayîş yewin avûkatan dir 2yê Gulane ya 2019î de ame ca. Dimayê 8 serran 2019î de Abdullah Ocalan tena 5 reyî avûkatan dir pêvînayîş kerd û di prosesê tepiştişê 23 serrî de, 27ê Nîsane ya 2020î û 25ê Adare ya 2021î de 2 reyî pêvînayîşê telefonî yê keyeyî dir ameyî ca. 7ê Tebaxe ya 2019î ra pey pêvînayîşê avûkatan Abdullah Ocalanî dir nêameyo ca. 

	 

	Muracatê NYyî 

	 

	Avûkatê Buroyê Huqûqî yê Asrînî rojanê vîyarteyî de sere ro Komîteya Binî ya Vernîgirewtena Cezayî yan zî Binpaykerdişê Rûmetî yê Qij Fînenê û Duştmerdimîyî, Zalimane û Îşkenceyî (SPT)yê NYyî dayî û venga hereketê lezgînî kerdî. 

	 

	Qedexeyê pêvînayîşê 3 mengan 

	 

	Serra vîyarteyî, 18ê Tebaxe de hetê Serekîya Heyetê Disîplînê Îmralî ra 3 mengî qedexeyê pêvînayîşê keyeyî dir dabî û dima ra no peynî bî. Di menga Sibate de qedexeyo bîn dayî. 

	 

	Seba dayîşê cezayan behaneyê neweyî 

	 

	6 mengî qedexeyê pêvînayîşî yê 12ê Teşrîna Verîne ya 2021î de hetê Dadgerîya Înfazê Bûrsayî ra amebî dayîş zî di 22yê Nîsane de peynî bîbî û avûkatan newe ra seba pêvînayîşî muracat kerd û dadgerî newe ra red kerd. Dadgerî malûmat nêda avûkatan û 6 mengî cezayê pêvînayîşî yê avûkatan dir, 13ê Nîsane de ameyo dayîş behaneyî motî ra. 

	 

	Duştê tecrîdo ke Tirkîya de, Rojhelato Mîyanîn û welatê Ewropayî de çalakî û programî duştê tecrîdî de yenê ca. Sîyasetmedarê cinîyî ke waştî tecrîd wedarîyo eşkera kerdî ke, ê ke tecrîdî ra tewr zêdeyêrî tesîr benê cinî yê. 

	 

	'Sey metodê cezayî yeno ca' 

	 

	Parlementera HDPyî ya Mûşî Gulîstan Kiliç Koçyigite da zanayene ke tecrîd 23 serrî yo domneno 2015î ra heta nika giranêr bîyo û dem bi dem di netîceyê çalakîya grevê vêşanî û refleksê rayaumûmî de, pêvînayîşê kilmî ameyê kerdiş la qedexeyê pêvînayîşê keyeyî û avûkatan dir nînê ca. Gulîstane wina vat: "Nê tesaduf nîyê. Netîceyê qerarê sîyasî de tecrîd yeno kerdiş. Ma vînenê ke wexto AKP hewcedar beno, berê Îmralî akeno pêvînayîş ano ca. Tecrîdo ke dewam keno ramojneno ke Birêz  Ocalan cayê xo senîn paweno. Nê hetî de zî hinî çîyî ro Birêz Ocalanî ferz kenê û Birêz Ocalan coka qebûl nêkeno sey metodê cezayî yanî tecrîd, yeno ca." 

	 

	'Tecrîd perçeyêke sîyasetê qirkerdişî yo' 

	 

	Gulîstane dîyar kerd ke tu hetê huqûqî çinî yo û heqê qanûnî zî nêdanê Abdullah Ocalanî. Gulîstane qiseyê xo  wina dewam kerd: "Bi behaneyê eletewşî heqê qanûnî yenê manîkerdiş. No serrêke zêdeyêrî ra yo tu malûmatêke ci ra nîno girewtiş. No zî qaxûyan zêde keno. Ma heme qaxûyan de yê. Ma bi tu tewirêke nêeşkenê malûmat ci ra bigîrê. Tecrîdo ke serê Birêz Ocalanî de yo perçeyêke sîyasetê qirkerdişî yo. Ma tecrîdê serê Birêz Ocalanî nêeşkenê şerê Vaşurî ra cîya bierjinê. Dewaya padayîşê HDPyî, Dewaya Kobanî, îşxalkerdişê Efrînî, Serêkanîyî û Grê Spî nêbeno cîya bêro destgirewtiş. Nê heme netîceyê nizdîyîya dewlete ya hemverê Kurdan de ya." 

	 

	'Dore ameya serê her kesî' 

	 

	Gulîstane wina peynî ro ci ard: "Hemverê tecrîdî de reaksîyonê cidî estê. 20ê Gulane de Almanya de ame waştiş ke malûmatêke bêro dayîş. Bi amancê protestokerdişî do biameyêne kerdiş, la dewlete huqûq reyêk bîn binpay kerd, tecrîd domna, polîsan dormeyê girseyî girewt. Ma nê qetî qebûl nêkenê. Çîyê nê welatî de ciwîyenê çimeyê xo duşthuqûqîyê hemverê Kurdan de yenê caardiş ra gênê. Dore yena heme kesan zî bêveng manenê. Her kes do nê duşthuqûqîyî ra para xo bigîro. Tecrîdkerdiş yeno manaya tecrîdkerdişê heme fikr û nîyadîyayîşan. Ganî ma tehdayan ra vajê 'Nê!' ke ma aver bikewê." 

	 

	'Serekê ma azad nêbo ma zî azad nîyê' 

	 

	Endama Meclîsê Cinîyan ê HDPyî yê Stenbolî Pervîn Tûnbûle zî reaksîyon mojna tecrîdê serê Rayberê PKKyî Abdullah Ocalanî de û wina dergî da qiseyanê xo: "Heta Serekê ma azad nêbo ma zî azad nîyê. Seba fikrê Abdullah Ocalanî nêreso şarî tecrîd yeno domnayîş. Wexto ma Serekê xo dir pêvînayîş bikerê ma hêz gênê. Vera nê hêrişê ke Amara de ameyê kerdiş zî bêtehemûlîyê. Tu şar hende wayîr ro Serekê xo nêvejîyayo. Ê tecrîdî sey destqezencî vînenê la wina nîyo. Seba înan vindîyîyêke pîl o. Serekê ma xerîteya rayîrî Tirkîya rê eşkera kerdo. Fikrê Serekî înan adiz keno. Ciwîyêka bê Serekî jehr a. Ma tecrîd qebûl nêkenê û ganî ma heme bibê yew duştê nê zilmî de sere wedarê!" 

	 

	'Tecrîd serê şaran de zî yeno kerdiş' 

	 

	Hemsereka HDPyê Sancaktepeyî Alya Akkûşe bale ante serê tecrîdî û vat konseptê tecrîdî bi Abdullah Ocalanî nas kerdê û wina beyanat da: "Zîhnîyetê faşîstî tecrîd serê şaran de zî caanê. No tecrîd tena serê şarêke de ney, serê şaranê heme welatê Tirkîyayî de yeno kerdiş. Huqûq yeno binpaykerdiş. Tecrîd hemverê îradeyê şaran de yeno caardiş. Tena zîndanan de nîno ca. Ganî her kes bibo yew û duştê tecrîdî de têkoşîn bikero!" 

	 

	'Ganî ma xo organîze bikerê' 

	 

	Endama Meclîsî ya Cinîyan ê HDPyê Sêrtî Belkiz Epozdemîre zî qal kerd ke tecrîd serê yew merdimî de nîyo û wina peynî ro ci ard: "Tecrîd tesîrê xo serê heme şaristananê Tirkîya û mintiqayî de kerdo. Tecrîd serê cinî, ciwan û şaran de yeno kerdiş. Seba tecrîd bêro wedaritiş ganî ma heme xo organîze bikerê û seba heqê xo têkoşîn bikerê. Heme tecrîd serê ciwîya ma de ya. Ganî ma xo organîze bikerê û seba azadî têkoşîn bikerê!"