Kênaya Hemdîyeya ke amî qetilkerdiş: Seba edalet bêro ca ganî ma bertîl bidê  

2022-05-22 14:04:15


	 

	 

	Şehrîban Aslan 

	 

	AMED  - Qorîcî Mahmut Karaaslano ke  cinîya xo Hamdîye Şik û lajê xo Kadir Karaaslan qetil kerdbî seba înan qerar amebî dayîş. Kênaya Hamdîye Şik, Fatma Karaaslane reaksîyonî mojna qerar û vat: "Ma vîna ke her cayî de pere qisey keno. Ma se bikerê, ma senîn bi pereyan edalet bîyarê gelo?" 

	 

	Bismilê Amedî de 18ê Temûze ya 2020î de serekê qorîcîyan Mahmut Karaaslan û cinîya xo Hamdîye Şike ya 61 serrî ke bi mareyê dînî ci dir zewejnayî bî û lajê xo Kadir Karaaslan (26) seba lejkerdişî vera herdan qetil kerdbî û dewaya derheqê ey û tutanê ey de amebî akerdiş, amî vînayîş. Dadgehe cezayêke seke xelate da vergumanan. Amebî rojeve ke serekê qorcîyan Mahmut Karaaslan seba ceza nêgîro 10 milyonî bertîl dayo dadgehe. 

	 

	'Yeno vatiş do heta çend mengan bêro veradayîş' 

	 

	Kênaya Hemdîyeye, Fatma Karaaslane derheqê cezayê ke ameyê dayîş de qisey kerd û da zanayene ke, rojo ke Mahmut Karaaslan vejîyayo vernîyê dadgehe ra bertîl dayo û wina vat: "Di merdimî qetil kerdî. Ez û mêrdeyê xo birîndar  bîyî. Qeraro ke ameyo dayîş bi tu tewirêke nêbeno bêro îzahkerdiş. Ma bandêr bîyî ke kesê ke pere dayê zî vejîyayê teberê welatî. Ma nêzanê remayê yan ney şîyê arasî. Heme sûcî eştê serê Mazlûm Karaaslanî. Sebebê nê zî no yo ke do di-hêrê mengan de Mazlûmî tepişte verdê û ey zî veradê." 

	 

	'Dadgehe de tîyatro ame kaykerdiş' 

	 

	Fatmaye dîyar kerd ke dadgehe ra bigîrê heta avûkatan qiseyê giranî kerdê û verîyî ke, ê bikewê dadgehe avûkatê vergumanan vatêne ke do 2 merdiman zîndan ra vejê. Fatmaye vat gelo vernîyê roniştene de avûkatî senîn nê zanenê û da zanayene ke di salone ya dadgehe de  tîyatroyêke ame kaykerdiş. 

	 

	Fatmaye di peynîyê qiseyanê xo de nê çîyî ardî ziwan: " Verguman û avûkatê ey seke çîyêke nêbîyo hereket kerdî. Pêwa heme delîlan verguman seke mexdûr ame ramojnayîş û bi bêcezaverdayîş xelat kerdî. Tena tehlîye zî ney, berat kerdî. Ma vîna ke her cayî de pere qisey keno. Ma se bikerê, gelo seba edalet bêro ca?  Ganî ma zî bertîlan bidê! Ma no fam kerd, her kes edaletê xo ano ca. Ma behsê sazgeyêke dewlete ya ke ameya rotişî kenê. A wina ameya la do wina derbas nêbo. 10 serrî zî derbas bibo, do rastî vejîyo werte. Do ceza bigîrê û do bedelê nê bidê." 

	 

	Cezayê seke xelatî

	 

	Dadgehe seba qorîcî Sîdar Karaaslanî qerarê beratî, serantişê babete ra serekê qorîcîyan Mahmut Karaaslanî rê 2 serrî û mengêke, seba Serdar, Serhat, Zafer Karaaslanî yan rê zî qerarê beratî dayî. Seba Mehmet Karaaslanî 5 serrî ceza da û no vist 3 serrî û mengêke. Seba Zafer  Karaaslanî 3 serrî û mengêke û 15 rojî ceza birna. Seba Mazlûm Karaaslanî qestî ra merdimî kiştê cezaya muebetî amebî dayîş. La dadgehe cezaya muebetî ewilî vist 24 serran û dima ra zî vist 20 serran. Sûcê qestî ra Hamdîye Şik kiştiş zî cezayê muebetê giranî da û no zî vist 16 serrî û 8 mengî.