Îdarekarê MEBYA-DERî: Ma venga dîyalogî kenê 

2022-05-20 14:49:20


	 

	ŞIRNEX - Îdarekarê MEBYYA-DERî têkildarê hêrişê hemverê Mintiqaya Federe ya Kurdistanî de qisey kerdî û vatî: "Ganî duştê nê şerî de şarê ma bêveng nêmano û sere wedaro!" 

	 

	Hêrişê Tirkîyayî bi paştgirewtişê Partîya Demokratîke ya Kurdistanî (PDK) 17ê Nîsane de hemverê Mintiqaya Federe yê Kurdistanî de ameyî destpêkerdiş dewam kenê û her ke şino kûr beno. Hemverê Zap, Metîna û Avaşînî de bombevaranî bêmabên domnenê. Pêwa nê hêrişan zî Tirkîya hema tu gamêke apey nêeşto. Heto bîn ra zî bêvengîya dewletê mîyanneteweyî zî bale ancenê. Duştê nê hêrişan de çar hetê dinya de şar, sazgeyî û dezgeyî reaksîyon mojnenê ra. 

	 

	Îdarekarê Komeleya Kultur, Yewîyî, Paştdayîş û Hetkarîya Keyeyan ke Merdimê xo di Dergûşê Şaristanîyê Mezopotamyayî de Vindî Kerdê (MEBYA-DER)yê Şirnexî têkildarê şerê Vaşurî, hetkarîya Tirkîya û PDKyî de qisey kerd. 

	 

	'Şerî rê êdî bes o' 

	 

	Hemsereke ya MEBYA-DERî Mevlûde Gungen, ramojnayîş kerd ke bi serrano duştê Şarê Kurdî de hêrişî û qirkerdişî yenê kerdiş û gonîya Kurdan ra mirdî nêbenê û wina vat: "Bi hêriş û kiştişî wazenê Kurdan çinî bikerê. Labelê no çîyo kenê wa bikerê, ma heta peynîyî wayir ro dewaya xo vejênê. Hemverê hêrişan de ma do zêdeyêrî wayîr ro nasname, kultur û ziwanê xo vejîyê. Do tu kes nêeşko ma bi hêrişan çinî bikero. Coka nê yewî zî ganî ewro Şarê Kurdî zêdeyêrî wurzo serê payan û vernîyê nê şerî bigîro. Ewro şarê ma uca de yeno kiştiş, sibarojî de zî do dewre bêro ma. Coka nê zî ganî tu kes bêveng nêmano. Tutê ma bêwayîr nîyê. Ma estê û ma do her tim verê înan de bê. Ma heme wayîr ro na dewa û têkoşînî vejîyê. Ma wayîr ro Vaşur vejîyê. Wa şarê Tirkîya duştê nê hêrişan de wurzo serê payan. O der herdê Tirkîya nîyo. Coka çi şino hêrişê herdê Kurdistanî keno? Wa ê destê xo yê lîşinî herdê ma ra biancê! Kesê ke nê şerî rê veng nêvejê, hetkarê nê şerî û qirkerdişî yê. Ma azadî wazenê. Şerî rê êdî bes o!  No serê 40 serrî ra yo Şarê Kurdî yeno kiştiş. La tu reyî hemverê zilmê dewlete de sere nêtewênayo. Ma nêwazenê tutê wurdî hetan zî bêrê kiştiş. Zerra mi zî vêşaya, ez nêwazena zerra tu dadîyê bînî bivêşo." 

	 

	'O bîyo hetkarê qirkerdişî' 

	 

	Mevlûdeye hetkarîya PDKyî yê Tirkîya dir şermezar kerd û pers kerd ke vera nê şerê wehşîyî zerra dadîyan vêşena û wina qisey kerd: "Berzanî wa destê xo nê qirkerdişî ra bianco. Wa bibo embazê şarê xo. O bîyo hetkarê qirkerdişî. Eke Berzanî paştdayîş Tirkîya rê nêkero ke, ê do senîn bieşkê şêrê Vaşur. Ewro dewrê ma yo, siba dewrê Berzanî yo. Neyar tu reyî nêbeno dost. Tirkîya bi nê hêrişan wazena herdê Kurdistanî destserkerdiş bikero. Coka hêrişê Rojawanî, Şengalî û Zapî kenê. La ê bi heme hêzê xo hêriş kenê zî ser de nêkewenê. Erdogan hende şer wazeno wa lajê xo bişawo şer. Tirkîya bira bi bîrayê dana kiştiş. Şer çareserî nîyo. No şer seserre dewam bikero zî do azadî  ser de bikewo. Çareserîyê şerî azadî yo. Ma dadî vanê ciwîyêka aştîyî. Wa qurûcî zî fek sîlehanê xo ra veradê û xîyanet ro şarê xo nêkerê. Wa nêrê kayê Tirkîyayî." 

	 

	'Ma do Kurdistanêke azad awan bikerê' 

	 

	Îdarekara MEBYA-DERî Kûmrî Babat zî ramojnayîş kerd ke vera nê şerê wehşîyî zerra dadîyan vêşena û wina vat: "Ma dadî aştî û seyyewbînî wazenê. Seba no şer vindero, ma wazenê Tirkîya dir ma bikewê dîyalogî, la ê ma dir nêkewenê dîyalog.  Ma vanê azadî, ê vanê şer. No şer exlaqî nîyo. Ma nêwazenê gonî birişîyo. Waştişê ma tena vindertişê şerî yo. Wa heme dadî seba tutanê xo wurzê serê payan. Duştê nê şerî de  ma veng a çareserîyî kenê. Tu çî bi şer hel nêbeno. No şer xîyanet o û duştê merdimîyî yo. Veng ê ma Kurdan rê o yo ke nêrê kayan û nêbê neyarê şarê xo. Wa Şarê Kurdî bibo yew û yewiyîya xo awan bikero. Barzanî hemkarê Tirkîya yo. Ganî Barzanî wayîrê nasnameyê xo vejîyo. Eke wayîrê wîcdanî bo, fek nê hemkarî ra vera bido. Bi nê şerî amanc oyo ke kurdan çin bikerê. La Kurdî sere nêtewênenê û bi têkoşînê xo aver şinê. Kurdî tu wext çin nêbenê. Ma bi xoverdayîş serbikewê. Eke kurdî verê ra bibîne yew nika yewîya kurdan zî amebî awankerdiş. Ma kurdî peynîya peynî serbikewê. Ma do Kurdistanêk azad awan bikerê.”

	 

	‘Hemverê nê şerî ma sere wedarnê’

	 

	Îdarekare Leyla Aykal zî vat, ê tu wext xîyanet xo vîr ra nêkenê û wina dewam kerd: “Barzanî zî kurd o, la rawuşto dişminîyê şarê xo keno. Eke paştdayîşê dewleta Tirkî nêkerdêne do nêeşkayîne bêşîne hêrişê Başûr bikerdêne. Barzanî demo ke xiyanetê şarê xo keno, kêfê dewleta tirkî ano. Tirkîye bi hemkarîya PDKyî hêrişê Zapî kena. Ma şer û kiştiş nêwazenê. Ganî tu kes bêveng nêmano. Nê şerî rê êdî vatiş nêmendo. Ganî vera nê şerî sere wedarnê. Demo ke şerê Ukraynayî destpêkerd dinya vengê xo berz kerd û reaksîyon ramojna. La dinya hemverê şerê Başûrî bêveng manena. Pêro kesan çim û goşê xo pada yê. Heta ke ma kurdî nêbê yew ma tu çîyêk nêeşkenê bi dest bikerê. Ma bawer ê, Barzanî vîyarteyê xo zî kerdo xo vîr ra. O çiqas xiyanet bikero zî tu wext nêkeno xo dest. Merdimêk senîn dişminîyê qewmê xo keno? Sey pîlanê ma vato, eke ma nêbê yew, ma do şêrê yew bi yew. Eke  kurdî bibayîne yew nika rew ra Kurdistanêko azad awan bibo. Hemverê nê şerî rol û mîsyonêk pîl keweno serê milê ma cinîyan û şarê Kurd. Hemverê nê şerî bêveng memanê. Ma azadî û demokrasî wazenê. Ma heta peynî xo ver bidê. Hemverê şerî ma vengê xo berz bikerê.”