Feleknas Ûca: Pêvînayîşî pozîtîf derbas bî  

2022-05-19 09:27:26


	 

	ANQARA  -  Wekîlîya Hemserekîya Pêroyî ya Komîsyonê Têkilîyê Teverî yê HDPyî ra Verpersîyare Feleknaz Ûca ke Bexda de hinî pêvînayîşî ardî ca û vat: "Ma serê prosesê sîyasî, krîzê bîyayeyî û probleman de munaqaşe kerdî.  Ma operasyonî û rewşa Şengalî erjna. Ma babeta ke bi rayîrê dîyalogî yena helkerdişî de hemfikir ê. Şer helkerdiş nîyo. Ma pêvînayîşê xurtî ardî ca û bi pozîtîf derbas bi." 

	 

	Hêrişê TSKyî yê hemverê Mintiqaya Federe ya Kurdistanî de mengêke pey xo de verda. Di nê prosesî de TSKyî xeylêk cayê Kurdistanî bombevaran kerd û îdîayê ke TSKyî sîlehê kîmyewî xebetnayê zî bala NATO û Ewropayîyan nêant. No proseso ke hêrişî dewam kenê Wekîleya Hemserekîya Pêroyî yê Komîsyonê Têkilîyê Teverî yê HDPyî ra Verpersîyare Feleknaz Ûca û parlementerê Wanî Sezaî Temel şîyî Iraq. Heyetê HDPyî Bexda de û Silêmanîyî de serdayîşêke 3 rojan ardî ca. Serekkomarê Iraqî Berhem Salih û Cepeyê Felî, Muşahîdê Komeleya Êzîdî, Muşahîdê Yewîyîya Welatpawiteyê Kurdistanî (YNK), Hezba Şoî dir pêvînayîşî ardî ca.

	 

	Wekîlîya Hemserekîya Pêroyî ya Komîsyonê Têkilîyê Teverî yê HDPyî ra Verpersîyare Feleknaz Ûca ya di pêvînayîşî de ca girewt derheqê babete de erjnayîş kerd. 

	 

	'Tecrîd nêticeyê helnêkerdişî yo' 

	 

	Feleknaze da zanayene ke hêriş bi serran o dewam keno, neyarîya hemverê Kurdan de zêde benê û vat: "Cografyaya Kurdistanî yena îşxalkerdiş. Duştê destqezencîyê Kurdan de hêrişî yenê ca. La problemî ancax bi dîyalogî eşkenê hel bikerê. Bi şerî û îşxalkerdişî mimkun nîyo ke hel bibo. Operasyonî netîceyê helnêkerdişê problemê Kurdî yo. Ganî bi muzekere helkerdiş bêro ca. Cinî, tutî, heme komele şerî ra zirar vînenê." 

	 

	'Talûkeyê neweyî yenê pawitiş' 

	 

	Feleknaze bêvengîya Ewropayî zî  rexne kerd û wina ard ziwan: "Bêvengî yena manaya qebûlkerdişî û hetkarîyî. Bêvengî û bêmudaxalekerdiş çi heyf ke zirar dano şarî. Di şerê Rusya û Ûkraynayî de seba sîlehî bêrê xurtkerdiş sîyasetêke newe yeno xêzkerdiş. No talûkeyêke pîl o. Dinya de mîlîtarîzm aver fîneno. Nê hêrişî hemverê şaran de yenê ca û her kes tena seyr keno. Ma no Efrîn, Serêkanî, Şengal, Mexmûrî de zî vîna. Ewro zî Kobanî de hêrişî yenê ca. Şar û na cografya de her rojî pabeyê talûkeyî de yê. Ewropa zî yew ê verpersîyarî yê hêrişan ra ya." 

	 

	'Nêeşkenê Kurdan bikerê babeta bazirganîyî' 

	 

	Feleknaze qiseyê xo  wina dewam kerd: "Tirkîya bi behaneyê ke Swêd û Fînlandîya paştdayîş danê PKKyî, endamîya aye ya NATOyî qebûl nêkena û bi nê welatan dir bazarî kena. La nêeşkena Kurdan bikero bazarê bazirganîyî. No wext derbas bîyo. No di Lozan de kerdî, la 100 serrî derbas bî. Êdî nêeşkenê ê îmkanî qezenc bikerê." 

	 

	'Xeylêk kayî vejênê werte' 

	 

	Feleknaze derheqê pêvînayîşê Iraqî de kerdê de wina qal kerd: "Netîceyê pêvînayîşî de vejîya werte ke  kes hêrişan ra kêfweş nîyo. Ma nêrehetîyê duştê hêrişan de ardî ziwan. Kes sîyasetê îşxalkerdişî ra razî nîyo û tesdîq nêkeno. Vêşêrî PDKyî, heme partî û hêzê bînî duştê nînan de yê. Di qiseyanê xo de razînêbîyayîşê xo anê ziwan. Vera ke Tirkîya û dewletê îşxalkerdoxî qebûl nêkerdê bi serran o yewîyîya Kurdan nêameya ca. Serê Iraqî ra hewl danê ke Rojhelato Mîyanîn newe ra dîzayn bikerê. Wazenê sînorê Rojhelatê Mîyanînî bibedelnê. Kayê yenê kaykerdiş zî yew bi yew vejênê werte. Paştdayîşî yê PDKyî seba Tirkîya werte de yo. Wazenê di seserra Lozanî de newe ra derheqê Kurdan de qerar bigîrê. Ewro herdê Kurdistanî binê talûkeyî de yo. PDK tutanê Êzîdîyan sey terorîstî îlan keno. No nêbeno bêro qebûlkerdiş. Qirkerdişê seke Hewlêrî, Helepçeyî û Şengalî verê çimanê heme dinya de ameyî ca. Gelo sebebê Şengalî kam ê? Aqûbetê bi hezaran cinîyan nînê zanayîş. Wazenê tarîxî dorkerde bikerê. La no nîno qebûlkerdiş û do reaksîyonî duştê nînan de bidomê." 

	 

	'Yew sernameyo tewr muhîm ra Şengal o' 

	 

	Feleknaze dîyar kerd ke sey Komîsyonî ya Şarê Teverî û Dîplomasîyê HDPyî xeylêk xebatan kenê û xeylêk welatê dinya de ma bi dewletan, partîyê sîyasî, rêxistine cinîyan, rêxistine ciwanan û rêxistine komele yê sivîlî dir di têkilîyî de yê. Di eynî wextî de masaya Rojhelatê Mîyanîn ê HDPyî zî esta û her menge Rojhelato Mîyanîn de pêvînayîşê tewir bi tewirî yenê ca. Ma bi serekkomarê Iraqî Berhem Salihî dir pêvînayîşêke kerd. Ma serê prosesê sîyasî de qisey kerd. Ma rewşa Şengalî zî girewt dest. Ma Bexda de partî û parlamenteran dir ameyî têhet. Ma babeta dîyalogî de hemfikirê. Ma şer nê, helkerdiş wazenê! Seba vernî ro ci bêro padayîş ganî pêvînayîşî bêrê kerdiş. Eke DAÎŞ Iraq de newe ra vejîyo do seba her kesî bibo talûke. Ma, heme kesê ke paştdayîş danê DAÎŞî baş zanenê. Na babete de pêvînayîşê ma virazîyayî. Ma babeta helkerdişî de hemfikirê. Yew babeta tewr muhîm ra zî Şengal bî. Hukmatê Bexdayî hêrişan ra adizo û qebûl nêkeno. Iraq de duştê hêrişan de reaksîyonî her ke şinê pîl benê. Coka herdnîgarîya Kurdan û heme destqezencîyê înan binê hedefî de yê."