‘Seba no şer biqedîyo ganî ma Kurdî wurzê serê lingan’  

2022-05-05 09:29:43


	 

	Rojda Aydin

	 

	ŞIRNEX - Welatijê Cizîrî reaksîyon mojnayî hêrişê Tirkîyayî ke bi paştgirewtişê PDKyî dir hemverê Mintiqayê Federalî yê Kurdistanî de anê ca û vatî: "Ma Kurdî bi serran ê yenê kiştiş. La ma hema serê payan de yê. Berzanî seba Kurdan rîsîyayîke pîl o. Wa her çar hetê Kurdistanî de Şarê Kurdî wurzê serê payan." 

	 

	Serekwezîrê Mintiqayê Kurdistanî Mesrûr Berzanî 15ê Nîsane de serdayîşê Tirkîya kerdbî û Stenbol de bi Serekkomarê AKPyî Tayyip Erdogan û Musteşarê MÎTî Hakan Fîdanî dir pêvînayîş ardbî ca. Dimayê nê serdayîşî 17ê Nîsane de Tirkîya duştê mintiqayê Zap, Metîna û Avaşînî yê Mintiqayê Kurdistanî kerd. Hemverê hetkarîya PDKyî de welatijê Cizîrî reaksîyon mojnayî ra û veng kerdî ke hemverê şerê çar hetê Kurdistanî de wurzê serê payan." 

	 

	'Seba no şer vindero ganî ma Kurdî wurzê serê lingan' 

	 

	Wesîle Demîre ard ziwan ke, ê şer nêwazenê û wina vat: "Homa ma verê zilmê Erdoganî ra bixelesno. No bi serran o serê ma Kurdan de zilmêk pîl yeno rayrayîş û ma yenê kiştiş. Ma wazenê no şer bêro vindarnayîş. Umîdê ma no tena o yo ke, no şer vindero û bes gonî birişîyo. Heme kesî neyarîya Kurdan kenê. Xayîn o tewr pîl zî Berzanî yo. Berzanî zî gonîwer o. Seba no şer vindero ganî ma Kurdî wurzê serê payan. Ma nêwazenê tutê ma bêrê kiştiş. Berzanî rayîrê dewlete akerd ê ke Kurdî uca de yenê gulevarankerdiş." 

	 

	'Êdî bawerîya ma bi Berzanî nîna' 

	 

	Şukran Tanişe zî dîyar kerd ke hemverê şerî de ê bi serran ê waştişê azadî û aştî kenê û wina dewam kerd: "Waştişê ma o yo ke ma Kurdî zî mîyanê ciwîyayîşêk weş de biciwîyê. Ewro Kurdî Kurdan kişenê! Merdim senîn birayê xo kişeno? No bi serran o ma Kurdî merg vînenê û ciwîyenê. Wa ciwîya  ma Kurdan zî seki komelanê bînan weş bo. Ma nêwazenê kes yewbînan bikişo. Vanê ma Misilmanê, la binê nameyê dînî de ma yewbînan kişenê. Ma Berzanî zî şermezar kenê. Îxanetêke pîl ro birayê xo yê Kurdanê Vaşurî keno. Ez hemverê mergî de ya. Ma şer nêwazenê!  Berzanî wa peynî ro nê şerî û îxanetî bîyaro. Hemverê şerî de ganî ma îtîfaqê xo awan bikerê! Êdî bawerîya ma bi Berzanî nîna. Hemverê şerî de ganî ma vengê xo berz bikerê!" 

	 

	'Ma Kurdî bi destê xo yewbînan perçe kenê' 

	 

	Mîhrîban Demîre zî nê çî vatî: "Eke ma Kurdî bi serran ê ke bibîyêne yew, do no şer hemverê ma de nêamebiyêne kerdiş.  Îtîfaqê ma Kurdan çinî yo. Ma Kurdî bi destê xo yewbînan perçe kenê." 

	 

	'Hemverê bîyayîşê ma de hêrişêke esto' 

	 

	Hatîme Alpe zî da zanayene ke dustê bîyayîşê Kurdan de hêrişêke esto û wina vat: "Fînak, di Cizîrî de serrê 2015î û 2016î de heme cayî ameyî talankerdiş û wêrankerdiş. La Şarê Kurdî fek şaristanê xo û têkoşîna xo ra vera nêda. Bi destê xo reyêna şaristanê xo newe ra awan kerdî. Nika zî Vaşur de  eynî çîyî yenê kerdiş û şaristanê Kurdan yenê y wêrankerdiş. La ê hendêke hêriş bikerê zî ma Kurdî xo ver danê. Ma bi têkoşîne hemverê nê şerî de vindenê. Kurdî hende rastê şerî û kiştişî zî yenê serê payan de yê. Ma Kurdî tu reyî sere nêtewênenê. Duştê bîyayîşê ma de hêrişêke esto. Wazenê bi şerî Kurdan çinî bikerê. Ma şer nêwazenê. Wa no şer bêro vindarnayîş. Ganî ma Kurdî hemverê nê şerî de vinderê û azadî awan bikerê! Hemverê zilmî û kiştişê Şarê Kurdî de ma hema serê payan de yê. Ma nêwazenê Kurdî Kurdan bikişê. Hemverê şerê wehşîyî de ganî ma îtîfaqê xo awan bikerê!" 

	 

	'Berzanî rîsîyayî keno' 

	 

	Şerîfe Seçkîne zî  dîyar kerd ke, şer de Kurdî her tim hedef yenê girewtiş, yenê kiştiş û qetilkerdiş û wina dergî da qiseyanê xo: "No bi serran o ma bindest ê. Vera ke ma Kurdî nêbenê yew ma perçe benê. Ma Kurdî yewbînan rê bira nîyê. Berzanî xîyanetêk pîl ro Kurdan keno. Berzanî seba ma Kurdan rîsîyayî yo. Ganî ma Kurdî bi xo bibê yew û hemverê nê zilmî de vinderê. Ma nêwazenê ewladê ma bêrê kiştiş. Xo ra Tirkîya neyarîya ma Kurdan kena. Berzanî zî bi xo Kurd o û o zî ma Kurdan kişeno. Ma na risîyayî ya Berzanî şermezar kenê. Ma Kurdî nêwazenê bêrê kiştiş. Ma nêwazenê êdî zerrîya dadîyan bivêşo. Cizîr, Nêsêbîn, Farqîn, Amed û xeylêk cayê bînî de şer bîbî û waştî ma Kurdan çinî bikerê. Ma Kurdan çi vîna û çi nêvîna. La hemverê şerî de ma tu reyî sere nêtewêna û ma do na roje ra pey zî nêtewênê. Duştê şerê Vaşurî de zî ma do xo ver bidê. Ma wêran kerdî, talan kerdî, qetil kerdî la ma hema zî serê payan de yê. Ma Kurdî bi kiştiş nêqedênê. Ma tu reyî  wareyê xo vera nêdanê. Çar hetê Kurdistanî de ganî Şarê Kurdî wurzê serê payan û xo ver bidê.  Wa tu kes bêveng nêmano û sereyê xo nêtewêno. Tutanê ma serê koyan de qetil kenê. Hemverê nê şerî de tewr zêdeyêr zerra ma dadîyan veşena." 

	 

	'Roj roje ya serewedaritişî û xoverdayîşî ya 

	 

	Şerîfeye peynîyê qiseyanê xo de da zanayene ke, serê herdê Kurdistanî de bi serran o Kurdî yenê kiştiş û ê şahidîya nê çîyî kenê û wina peynî ro qiseyanê xo ard: "Xeylêk tutê ma serê nê herdê Kurdistanî de ameyî qetilkerdiş. Heta ewro ma xeylêk çîyî vînayî. Ma do tu reyî hemverê şerî de bêveng nêmanê û nêşêrê tu cayî. Ma fek herd û welatê xo ra vera nêdanê. Ma wayîr ro gonîya şehîdanê xo vejîyenê. Wa neyarê ma Kurdan zî nê çîyî baş bizanê. Ganî şarê ma yê Kurdî bêveng nêmanê û wurzê serê payan û xo ver bidê. Şarê çar hetê Kurdistanî wa wurzê serê payan. Ma nêwazenê êdî Kurdî bêrê kiştiş. No bi serran o ma Kurdî yenê kiştiş. Berzanî seba menfîetê xo Kurdî rotî. Berzanî herinda ke hetkarîya Şarê Kurdî bikero hetkarîya neyarê ma, dewlete ya Tirkî keno. Berzanî xo roto. Hewt serre ra heta hewtay serre heme kesî wurzê serê payan. Roj roje ya serewedaritişî û xoverdayîşî ya."