Cinîyê ke tewrê dewaya Denîz Poyraz bî: Dadgehe gumanbarî pawena  

2022-05-01 11:35:04


	 

	 

	Melîke Aydin

	 

	ÎZMÎR - Cinîyê ke dewaya Denîz Poyraze taqîb kerdî, reaksîyon ramojnayî û vatî, gumanbar Onur Gencer salona roniştişî de amade nêbi. Cinîyan tevirê dadgehe ke gumanbar pawitêne şermezar kerd û dîyar kerdî ke seba edalet bi ca bêro do taqîbkerdoxê dewa bê.

	 

	Hîrên roniştişê gumanbar Onur Gencer ke hêrişê hemverê HDPyê Îzmîrî de Denîz Poyraze qetil kerd, bi waştişê redê hukmî yê avûkatan ame taloqkerdiş. Sewbîna gumanbar salona dadgehe de amade nêbi û bi SEGBÎSî tewr bi. Hemverê na rewşe de reaksîyon ame ramojnayîş û ame vatiş ke gumanbar yeno pawitiş. Sewbîna gumanbar heqeretê xo yê hemverê kesê ke salone de yê û keyeyê Denîz Poyraze rê dewam kerd. Cinîyan reaksîyon vera rewşe dayî û vengdayîşê wayîrvejîyayîşê dewa kerdî.

	 

	‘Ganî guamnbar lezabez bêro veradayîş’

	 

	Hemsereka HDPyî ya Çeşmeyî Menekşe Ecer derheqê dewa de wina vat: “Hîrên roniştişê Denîz Poyraz de kiştox bi SEGBÎSî tewrê dadgehe bi. No rast nîyo. Ma nê caardişî şermezar kenê. Bi no hawa lebate kenê ke qatilê rast bêrê pawitiş. Ganî qatilî bêrê cipersayîş.”

	 

	‘Qatilan pawitî’

	 

	Cinîya bi nameyê Meryem Topçu zî dîyar kerd ke sey cinîyêke, sey merdimêke dewa taqîb kerda û vat: “Qatil nêardî cayê roniştişî û no hêrsê ma zêde kerd. Dewa cidî nîna girewtiş. Seba nê ma şermezar kenê. Nê hêrişî tena hemverê Denîze ney hemverê ma hemine yo. Denîze seba ma xeylêk bi erj a. Hêriş tena hetê qatilî de nêameyo kerdiş. Ganî hesabê ci bêro perskerdiş. Dadgehe gumanbar nêard cayê roniştişî û goreyê mi ê qatilî pawenê”

	 

	Dozgerî: Ti do bêrê yan bi SEGBÎS tewr bibê

	 

	Cinîya bi nameyê Edîbe Sîncat zî amebî temaşekerdişê dewa, tevirê dozgerî yê hemverê vatişê gumanbarî de rexne kerd û vat: “Demo ke perse gumanbarî rê ameye perskerdiş, vatişê ci yê ewil ‘wa HDP bêro padayîş’ bi. HDP û birayê Denîze rê kufur kerd. Gelo senîn eşkeno wina qisey bikero? Uca de xeylêk avûkatî bî. Her kesî dozgerî ra vat, ‘ti senîn cesaret danê ci.’ Dozgerî gumanbarî ra vat, ‘ti do bi SEGBÎS tewr bibê yan zî ti do bêrê tîya.’ Nê vatişî ser de her kes wurzîya serê lingan.”

	 

	‘Ma do têkoşîn bikerê’ 

	 

	Ebru Dînçer zî dîyar kerd ê bi îqtîdarê ke dişminê cinîyan o dir rî bi rî yê û vat: “Denîze embaza ma bî, waya ma ya têkoşînî bî. Ma seba aye tîya de yê. Denîze nika biciwîyayîne do heme têkoşînanê ma de verê ma de bibayîne. Ma aştîye wazenê. Ma lebate kenê ke şîdet cuya xo ra wedarnê. Ma hesabê cinîyê ke yenê qetilkerdiş persenê. Ma do hesabê qetilkerdişê Denîze zî bipersê. Seba edalet bi ca bêro ma do heta peynî têkoşîn bikerê. Ma her het ra vengdayîşê wayîrvejîyayîşê dewa kenê.”