‘Ma wazenê vengê Ocalanî bireso teber’ 

2022-04-28 12:23:01


	 

	Sema Çaglak

	 

	ŞIRNEX - Cinîyê îdarekarîyê HDPyî yê Qilebanî de ca gênê, dîyar kerdî ke ê wazenê Rayberê PKKyî Abdullah Ocalanî bireso teber û vatî, ê ke wazenê serê problemê Kurdî de vinderê ganî ewilî tecrîdî meydan ra wedarê.

	 

	Tecrîdo giran serê Rayberê PKKyî Abdullah Ocalanî de dewam keno. Muracatê avûkatan û keyeyan ê seba pêvînayîşê Îmralîyî de yê zî yenê redkerdiş. Tecrîdo ke Îmralîyî de dewam keno tesîr serê tepişteyê bînan de zî keno û beno sebebê şerî û xeylêk wareyê ciwîye ya bînî de zî tesîrê xo keno. Cinîyê sîyasetmedarî, têkilîya tesîrê tecrîdî qisey kerd, eşkera kerdî û vatî; ganî Şarê Kurdî duştê tecrîdî, xîyanetî û hêrişê dewlete ya Tirkî de hêzê xo bikerê yew.

	 

	'Mîyanê tecrîdî de tecrîd yeno kerdiş '

	 

	Îdarekarîya HDPyî yê qezaya Qilebanî ra Ferîde Ender di destpêkerdişê qiseyanê xo de bale ante serê zîndanan ke binpaykerdişê heqan ci de her ke şinê zêdeyêr benê. Ferîde, dîyar kerd ke bi polîtîkayê tecrîdî têkilîya tepişteyan teberî dir yenê birnayîş û wina qisey kerd: "Tecrîd yew wareyî ra ke tewr zêdeyêr xo ci de mojneno ra, zîndan o. Bi sînorkerdişî û vistişê hucreyê yew kesî yê tepişteyan dir hewl yeno dayîş têkilîyê tepişteyan teberî dir bêro birnayîş. Werdişê înan yeno sînorkerdiş, pêvînayîşê înan ê keyeyî dir yenê manîkerdiş yan zî yenê sînorkerdiş. Hema behaneyêke qic bivînê zî înan fînenê hucreya yew kesî. Mîyanê tecrîdî de tecrîd yeno kerdiş. Mîyanê zîndanî de yenê zîndankerdiş. Ro tepişteyan zilmêke ver bi çiman yeno kerdiş."

	 

	'Çareserkerdişê problemê Kurdî bêtesîrkerdişê tecrîdî ra derbas beno' 

	 

	Ferîde ard ziwan ke Abdullah Ocalan îradeyê Şarê Kurdî yo û tecrîdkerdişê şarî nîno qebûlkerdiş. Ferîde vat: "Bêşik Şarê Kurdî destsergirewtişê seba îradeyê xo qebûl nêkenê û do duştê ci de zî tevrê xo bimojnê ra. Çareserkerdişê problemê Kurdî seba ma babetêka asasî ya. La a çareserîye zî bi bêtesîrkerdişî mimkun a. Heta ke nê hetî de gamê şênberî nêrê eştiş, vatişê partîyê sîyasîyî ke xo sey muxalîfî danê naskerdene do tal bimanê. Ganî ê partî seba çareserîyê nê persî zerrî ra hereket bikerê! Wa ewilî seba wedaritişê tecrîdî û çareserkerdişê problemê Kurdî gamî bierzê. Ma heqê xo wazenê. Wa Şarê Kurdî bivînê. Ma Kurdî estê û polîtîkayê înkarkerdişî qebûl nêkenê. Heta azadîyî, do têkoşîna ma dewam bikero. Sewbîna bêvengîya dewletê netewî yê ke duştê tecrîdî de yê babeta şermezarkerdişî ya. Nê wareyî de ganî biverpersîyarî hereket bikerê!"

	 

	'Tecrîd netîceyê sîstemê bîyayeyî yo'

	 

	Îdarekarîya HDPyî yê qezaya Qilabanî ra Ferîde Yamane zî dîyar kerd ke tecrîd netîceyê sîstemê bîyayeyî yo û nê çîyî vatî: "Tecrîd zilm û tehdayêke pîl o. Tecrîdo ke serê Birêz Ocalanî de yeno rayrayîş, ewro xo her wareyê ciwîyayîşî de mojneno ra. Serê cinîyan de, serê Şarê Kurdî de û heme komele vist o binê tesîrê xo. Nê zî vera sîstemo bîyayeyî yo. Herinda ke tecrîd werte ra bêro wedaritiş, eksê ci her ke şino yeno girankerdiş. Ewro gama ma hetê tecrîdê serê cinîyan de ewnenê, ma vînenê ke mêrdeyî cinîyan qetil kenê bê ceza menenê. Ma wazenê heme kesê ke zilm ro cinîyan kenê û înan qetil kenê heme bêrê cezakerdiş û tecrîdê serê cinîyan de peynî bibê. Ganî serdestîya mêrdeyî werte ra bêro wedaritiş!"

	 

	'Ma wazenê vengê Birêz Ocalanî bireso teber'

	 

	Ferîde dîyar kerd ke, ê weşî û ciwîya Abdullah Ocalanî ra qaxu de yê û qiseyê xo wina dewam kerd: "Ma azadîya fizîkî yê Birêz Ocalanî wazenê. Ma heme pabe mendê malûmatêk ke Birêz Ocalanî ra bigîrê. Ma ciwîya Ocalanî ra bi endîşe yê. Weşîya ey ra û ewleyîya ciwîya ey ra bi endîşe yê. Ganî bi tewirêke lezkî Birêz Ocalanî ra malûmatêk bêro girewtiş! Ganî vengê ey bireso teber! Heta ke vengê ey nêreso teber, do Şarê Kurdî nêvindero."

	 

	'Şer duştê destqezencîyê Kurdan de yeno kerdiş'

	 

	Ferîde, peynîyê qiseyanê xo de bale ante serê hêrişê dewlete ya Tirkî ke serê Vaşurê Kurdistanî de yo û wina qal kerd: "No şer, şerê bîyayîş û çinîbîyayîşê Şarê Kurdî yo. Tena duştê PKKyî de nîyo. Şerêke yo duştê heme destqezencîyê Kurdan û destqezencîyê her çar perçeyê Kurdistanî de yo. Seki ke ti darêke bibirnê û heme darî bikewê herdî yo. Wextêk perçeyêke Kurdistanî ra bikewo do heme perçeyê Kurdistanî zî dest ra şêrê. Ez nê hêrişan şermezar kena. Ganî Şarê Kurdî aya bo û çimê xo temamê xîyanetî rê akero! Vera ke çîyo ma apey bero, xîyanet o. Ganî Kurdî hetkarîya neyarî nêkerê, hêzê xo bikerê yew û hemverê neyarî de têkoşîn bidê!"