Cinîyê Botanî: Rojnamegerê Kurdî bî vengê komelî

2022-04-22 13:35:15


	 

	 

	Rojda Aydin

	 

	ŞIRNEX -  Bi minasebetê Roja Rojnamegerîya Kurdî, cinîyê Botanî bale antî serê rol û mîsyonê rojnamegeran û vatî: "Qirkerdiş, kiştiş, destbendkerdiş, tepiştiş, hêriş û binpaykerdişê heqan ê ke serê herra Kurdistanî, bi ca yeno xêrê  rojnamegerê kurdî vejêno rîyê erdî.  Rojnamegerê kurdî benê vengê cinî û dayîkan."

	 

	Rojnameyê Kurdistanî 22ê Nîsana 1898ine de Qahîre yê Misirî dest bi weşanê xo kerd û bi 124 serrî yo adetê çapemenîya kurdî pêwa heme  zor û zehmetîyan bêmabên dewam keno. Seba nê zî her serre roja 22ê Nîsane sey Roja Rojnamegerê Kurdî yeno pêşwazîkerdiş. Rojnemegerê kurdî ke nika zî şert û mercê xidar de rojnamegerî kenê, her wext vengê çapemenîya kurdî berz kenê û rastiyan eşkere kenê. Cinîyê Botanî bi minasebetê Roja Rojnamegerîya Kurdî ajansê ma rê qisey kerdî.

	 

	‘Tirkîya de rojnamegerî xeylêk zehmet o’

	 

	Parlamentera Partîya Demokratîke ya Şaran (HDP) ya Şirnexî Nuran Îmîr, dîyar kerd ke 124 serran rojnameya bi nameyê Kurdistanî mîyanê şert û mercê zehmet de hewl da ke bibo vengê Şarê Kurd û wina vat: "Sed serrî verê Şarê Kurdî herra xo ra ame surgunkerdiş û sînorî hemverê înan ameyî ronayîş. Îqtîdar waşt ke tarîxê Şarê Kurdî heta ewro nuştê, bidê vînîkerdiş û Şarê Kurdî bêhêş verdê. Labelê bi xêrê rojnamegerê kurdî hemverê heme ablûqakerdiş û û zehmetiyan şarê Kurdî hem muhatabê xo awan kerdo û eynî wextî de dişminî û înkarê hemverê Şarê Kurdî resnayê heme dinya. Seba nê keda pîroz ê rojnamegeran pîroz kena. Binê şert û mercê giran de karê xo kenê. Çi heyf Tirkîya de rojnamegerî xeylêk zehmet o.  Medyaya hetgir zî hetê îqtîdar ra teslîm ameya girewtiş. Hende kiştox û hêrişê ke serê herra Kurdistanî yeno kerdiş, bi xêrê rojnamegerê kurdî heme dinya nê eşnawena û vînena. Hewl dayî ke bibê vengê cinî û dayîkê kurdan."

	 

	'Eke rojnamegerî nêbîne kesî rastiya Cizîre nêeşnawitêne'

	 

	Ayşete Atabey, demê qedexeyê tebervejîyayîşê kuçeyan ê Nisêbînî de lajê xo vînî kerda û hema zî cenazeye ey nêdîya, dîyar kerd ke rojnamegerê kurdî bîyê vengê înan û wina vat: "Serê çapemenîye de zilm û teda yenê kerdiş. Seba nê zî înan ra hîn ameyê tepiştiş. Hîn mecbûr manenê şêrê. Sewbîna heta ewro xeylêk rojnamegerî ameyî qetilkerdiş û vînîkerdiş. Rojnamegerî bîyê vengê Şarê Kurdî. Zilmo ke serê kurdan yeno kerdiş bi xêrê çapemenî heme dinya ameyo vilakerdiş. Eke ê nêbîne do kes vengê ma nêeşnawitêne. Bi hêrişan wazenê ma kurdan û rojnamegeran çin bikerê. Dewlete nêwazena ke rojnamegerî rastî neql bikerê. Dewlete wazena rojnamegerî heme goreyê nê têbigêrê. La rojnamegerê kurdî hemverê nê sere nêtewênenê û rastî nusenê. Eke rojnamegerî çinbibayîne, do rastîya nê şerî çin bibayîne. Ê her ca de bi qelema xo heqîqet kenê. Demê taqîbkerdişê xeberan de hêrişê rojnamegeran kenê û hacetê înan şikinenê. Eke  rojnamegerê kurdî nêbîne do na rastî her wext tarîtî de bimendêne. Rojnamegerî vengê dayîkan ê. Eke  rojnamegerê kurdî nêbîne do tu kes  rastiya Cizîre nêeşnawitêne."

	 

	'Rojnamegerî eynika komelî  yê'

	 

	Zînet Kuçuk zî dîyar kerd ke rojnamegerî veng û eynika komelî yê û vat: "Hukmat wazeno Şarêl Kurdî çin bikero. Labelê yê ke nê rastî nusenê estê û ê zî rojnamegerê kurd ê. Coka zî hêrişê rojnamegeran kenê û wazenê înan bitepşinê û bikerê zîndanan. Rojnamegerî her hat ra benê vengê şarî. Hukmat zî nêwazeno nê rastî bêrê eşnawitiş, Bi xêrê rojnamegerê kurdî ma vengê dayîka Emîne Şenyaşar eşnawit. Tu kesî vengê ma nêeşnawit. Senîn ke şarê Kurdî hedef ameyo girewtiş, rojnamegerê kurdî zî hedef ameyê girewtiş. Her rojnamegerêk seba ma sey welatekê yo. Ê seba ma sey tîcî û roje yê. Ganî heme kesî wayîrê rojnamegerê kurdî vejîyê."

	 

	‘Ma do wayîrê rojnamegerê kurdî vejîyê'

	 

	Endama Meclîsê Pêroyî yê HDPyî yê Şirnexî Zozan Fendîk zî vat: "Bi serran o hemverê çapemenîya kurdî hêrişêk esto. Sewbîna bi serran o şarê Kurdî binê hêrişê zor û zehmetî de yê. Çapemenîya kurdî bi 124 serrî yo bêmabên karê neqlkerdişî kena. Rojnamegerê kurdî wendekarê Mûsa Anter û Gurbet Ellîersoz ê. Rojnamegerê kurdî wayîrê qelema înan vejîyayî. Sewbîna goreyê raporê tewr peyîn ewro 63 rojnamegerî esîr ameyê girewtiş. Bi seyan rojnamegerîa ameyê qetilkerdiş. Hemverê kiştiş, destbendkerdiş û tepiştişan zî rojnamegerî kar û xebatê xo dewam kerdî."

	 

	‘Ma sere nêtewêna û ma do nêtewênê zî'

	 

	Muxabira Ajansê Mezopotamya (MA) Zeynep Durgut zî vat, ê rojê tarîxî ra derbaz benê û nê rojê tarîxî yê tewr baş neql kerdê zî çapemenîya azad a. Zeynebe wina vat: “Pêwa teda û hêrişî zî seknê xo ra tu wext game peyser nêerzenê. Wexto ke merdim Botanî her kuçe, taxe, qeza û dewê ci şîdet, teda, zilm û bêheqî esto. La bêguman hemverê nê zî xoverdayîşêk zî esto.  Nê rastîyê ke vejê werte zî çapemenîya azad a. Seba nê zî her çiqasî destê ma ra yeno ma hewl danê komel û dinya rê neql kerdî. Reyan ma yenê tepiştiş, teda serê ma de yeno kerdiş. Vetişê rastiyan Apê Mûsa dest pêkerd û heta roja ma ya ewro zî dewam keno. Ewro bi seyan tepişte û cipersayîş derheqê înan de ameyo akerdiş. Ez zî înan ra yew a. Gurbet Ellîersoze nê oxirî de dinyaya xo bedilnaya. La dimayê Gurbet Ellîersoz bi seyan Gurbet Ellîersozî ameyî. Nimûneyê nê tewr verê çimî de zî JINNEWS o. Sey xebatkarê cinî yê çapemenîya azade de rastê tacîz, tehdîd û hêrişan yenê. La nêeşkenê ma vindarnê. Bi serran o hemverê çapemenîya azad de nê polîtîkayî dewam kenê. La ma sere nêtewêna û tîya ra tepya nêtewênenê zî. Eke ez ewro bêrî tepiştiş, do embazêk bîne bikewo vera mi."