Awa kanalîzasyonî 6 taxan jehrî kena 

2022-04-19 13:18:21


	 

	COLEMÊRG - Welatijê taxa Bulak de ciwîyenê dîyar kerd ke awa kanalîzasyonî ke hamnanî herikêna çem, taxa înan jehrî kena û veng dayî selahîyetdaran.

	 

	Awa kanalîzasyonî ke herikêna Çemê Serînk û 6 taxê Colemêrgî ra derbaz bena û çopê ke çem de kom beno, beno sebebê lêşinî û boyêka nêbaş. Çop ke erzenê çem, rayîr boyêka xirab akeno û seba bêeleqedarîyê selehîyetdaran, roniştoxê taxe bi îmkanê xo çop çem ra pak kenê. Welatijê ke taxan de ciwîyenê dîyar kerdî ke seba boya nêbaş çem ra yena, hamnanî nêeşkenê pacanê xo ebikerê, nêeşkenê teber de roşê.

	 

	Welatijê taxe dîyar kerdî ke bi serran o mengê hamnanî de seba awa kanalîzasyon û çopê çemî de, awa çemî sîya herikêna û boyêka merdimî aciz kena esta.

	 

	Cinîya bi nameyê Nergîs Taş dîyar kerd ke zimistanî zêde boye çin a ya la bi helîyayîşê vewre dir boya ci xeylêk xira beno û vat: "Hamnanî bi kêmbîyayîşê awe dir û çopî dir boye her ca de vila bena. Seba ke serê çemî padaye nîyo, her kes çopê xo erzeno çem. No bi serran o rewşa nê çemî wina ya. Çend rey seba safîkerdişî ma waştişname da la cewab nêdayî waştişnameyan. Awa kanalîzasyonî herikêna çem û xeylêk rey demo ke kanalîzasyon teqenê, awe kewena zerrîya keyeyan."

	 

	‘Ma êdî aciz bîyê'

	 

	Nergîse dewam de vat di tutê aye estê û yew ci ra nêweş o û vat: "Tuto min o nêweş, ganî hewaya pak bigîro û vîtamînan bigîrê. La seba nê boya ma nêeşkenê vejê teber. Heme tutî enfeksîyon gênê. Her aşme tutê mi de enfeksîyon vejêno. Ma na rewşe qebûl nêkenê. Ganî no bêro safîkerdiş."

	 

	'Ma nêeşkenê vera na boye xover bidê'

	 

	Cinîya bi nameyê Edîbe Şeftalî zî reaksîyon vera rewşe da û dîyar kerd ke bi helîyayîşê vewre dir awa çemî zêde bena, zêdebîyayîşê awe zî seba tutan bena tehluke û vat: "Seba ke dorê çemî padaye nîyo, tutî eşkenê bikewê çem. Kanalîzasyonê xeylêk taxan çem ra derbaz benê. Ma heme nêrehet benê na rewşe rê. Her çî erzenê çem. Heywanê merde erzenê çem. Ma nêeşkenê seba na boye xover bidê. Êdî bes o. Wa çareserîyêk bivînê."