Oya Ersoy: Ganî ma Aysele tena nêverdê

2022-04-17 14:56:03


	 

	 

	WAN - Parlamentera HDPyî Oya Ersoy dîyar kerd ke hişê demê nêzdî û nameyan ê Aysel Tugluke nêmendo û vat, Aysele seba mektubê ke ci rê yenê şawitiş, xeylêk kêfweş bena. Oya veng da ke ganî seba Aysele kampanyayê torra komelî bêrê destpêkerdiş û ci rê her tim qert û mektubî bêrê şawitiş.

	 

	Sîyasetmedara Kurde Aysel Tugluk ke tepişte ya û nêweşa Demansî ya, rewşa aye her ke şina giran bena. Aysel Tugluke zîndanê Kandirayî de tepişte ya û 6ê Nîsane de zî heyete şîbî serdayîşê ci. Parlamentera HDPyî ya Stenbolî Oya Ersoy ke aye zî yew kesa ke şîbî serdayîşê ci, derheqê rewşa Aysele de ajansê ma rê qisey kerd.

	 

	Oya bale ant serê rewşa zîndanan û vat, birînêke pîl ê welatî yo û wina qal kerd: “98ine heta nika nê welatî de zîndanê ke ameyê viraştiş, bi sîstemê odayê tecrîdî ameyê viraştiş û tepişteyî şertê giran de manenê. Oya wina dewam kerd: “Teda û hêrişê zîndanan benê sebebê merdişê tepişteyan yan zî nêweşîyê giranî. Teber de atmosferêk aloz esto la no zîndanan de tewr giran o. Pandemî kenê sebeb û tecrîd serê tecrîdî de kenê. Heqê tepişteyan yenê xespkerdiş. Tepişteyî nêeşkenê vejîyê bernameyê hempar, aktîvîteyê komelî. Kenê hucreyê yew kesî, pêvînayîşê keyeyan bi ca nînê. Pêvînayîşê akerdî de cigêrayîşê hîra yenê kerdiş. Yê ke vera nê vejê zî nêvejenê pêvînayîşan.”

	 

	‘Wijdanê Aysele çîyêk ameyî ciwîyayîş nêwedart’ 

	 

	Oya bale anr serê rewşa Aysel Tugluke zî nê çî vat: “Aysele pawitoxa heq û kesêka têkoşînê huqûqî dayîne bî. Çîyê ke AKPyî bi siyaset nêkerd na rey  hewl da bi bahaneyan kesan bitepişo. Aysele zî nê kesan ra bî. Aysele seba fikranê xo, siyasetê ke kerdêne ameye tepiştiş. Serra ewil a tepiştişê aye de  dayîka ci dinyaya xo bedilna. Çîyê ke merasîmê cenazeya aye de ameyî kerdiş, tesîrêk pîl ser de kerd. Hişê ci, zerrîya ci nê çîyê ke yenê ciwîyayîş nêwedarit. Bi nêweşîya demansî kewte. Hem tecrîd hem zî şertê pandemî nêweşiya aye tewr giran kerd. Ma bi serekwekîla xo Meral Daniş Beştaşe dir şî zîndanê Kandirayî û ma pêvînayîş kerd. Ma na rewşa ci baş dî. Nêweşî, tevgerê fîzîkî yê Aysele qels kerd o û îdareyê zîndanê zî nê zano. Bi talîmatan û bi qestî yena tepiştiş. ATK zî ferqê rewşe de yo la yena tepiştiş. No têkoşînê ma sere de seba Aysele û heme tepişteyê nêweşan o. Ganî ma pêro sazgehan dir  têkoşîn pîl bikerê.”

	 

	Oya dewam de wina vat: “Derheqê ma de derheqê vîyarte de her çî yeno vîrê aye. Serrê 90î, serdayîşê min ê seba ci yenê vîrê aye. La xebatê demê nêzdî nînê vîrê ci. Di hewte verê embazî şîbî pêvînayîşî ci nînê vîrê aye. Nameyî nînê hişê aye. Hemverê persê ke yenê perskerdiş, demêk derg fikrîyena. Dayîşê cewabî de zehmetiyan ciwîyena. Ma vat, roja to senîn derbaz bena, demêk derg fikirya û vat, nêeşkena kitaban biwana, nêeşkena xeberan taqîb bikera. Aysele bi serean têkoşîn kerd. Seba nê nêtaqîbkerdişî xeberan û nêwendişê kitabî aye xemgîn keno. Çîyê siyasî ra dûrkewtiş aye hetê ruhî de dano zor. Demo ke şina koxuş zî gardiyane rayîr dana ver. Bi tena sereyê xo nêeşkena rayîr bivîna.”

	 

	‘Aysele rê mektuban bişawê’

	 

	Oya tewr peyîn wina vat: “Hetê vîrardişê nameyan de zehmetiyan bianca zî mektubê ke ci rê şinê aye kêfweş kenê. Xo tena hîs nêkena. Ez veng dana.  Hewce bi roj yan zî tarîxêk xususî çin o. Fotograf yan zî qertan Aysele rê bişawê. Bi no hawa şima do aye tena nêverdê. Bi torrêke komelî zî ma eşkenê hemverê nê têkoşîn bikerê. Tewr zêde zî cinî Aysele tena nêverdê. Ma do Aysele bi paştdayîşê cinîyan azad bikerê. Şansêk pîl yê Aysele o bi ke embazanê xo dir a. Bi Gultan Kişanake dir koxuşe de manena. Peynîya na menge de zî do berê koxuşa Fîgen Yuksekdag. Werdê xo pakitîya rojane bi embazanê xo dir eşkena bikera. Roje persêk 20 rey bêro persayîş zî a 20 rey cewab bido zî seke reya ewil eşnawita cewab dana. Embazî vatî, ê nêweşîya ci bi ci nêdanê hîskerdiş. Sey Aysele bi seyan tepişteyê nêweşî estê. Ganî ma seba nê pîya têkoşîn bikerê.”