‘Bênan û awe cuye bena la bêherre cuye nêbena’ 

2022-04-13 11:12:26


	 

	Sîdra Mamo

	 

	ŞEHBA - Cinîyê qezaya Şêrewaya Efrînî reaksîyon vera ambargoyî dayî û vatî: "Seba ambargoyî bi zehmetiyan dir rî bi rî manenê, labelê ganî bêro zanayîş ke bênan û bêawe cuye bena la bê herre cuye nêbena.”

	 

	Wextê îşxalkerdişê Kantonê Efrînî ra tepya herême de ambargoyêk ameyo ronayîş. Kantonê Şehbayî û qezaya Şêrewaya Efrînî de, çar serran ra û nika de her roje sewîyeya ambargoyî giran kenê. Bi ambargoyî dir welatijê herême rojane xeylêk astengî û zehmetîyê cuye dir rî bi rî manenê. 

	 

	Qezaya Şêrewa hetêk ra Dewleta Tirkî ya îşxalkerdoxe ablûqa kerda, heto bîn ra zî Hukmatê Şamî ra binê ablûqa de ya. Seba nê zî welatijê herême hetê lazimîyê cuye ra astengiyan ancenê. Sewbîna demê destpêkerdişê şerî de mabêne  Rûsiya û Ukrayna de her ke şino alozî zêde beno. No çî tesîrêk pîl serê ablûqa de keno. Derheqê babete de cinîyê qezaya Şêrewa ya herêma Efrînî ajansê ma rê qisey kerdî û zehmetîyê cuya xo ardî ziwan.

	 

	‘Ma nêeşkenê lazimîyê xo peyda bikerê’

	 

	Sewliye Elî ke dewa Birc Qasî ya Şêrewaya Efrînî ra ya qalê zehmetîyê ke vînenê kerd û vat: "Seba ambargo û vayîbîyayîşî, roniştoxî xeylêk astengîyan ancenê. Hetêk ra zî hêriş û xofîyê Dewleta Tirkî ya îşxalkerdoxe serê herême de zî esta. Seba ambargoyê serê ma mazot çin o, no zî beno sebebê aloziyê ke ma ciwîyenê. Nika zî ma menga Remezanî de yê, seba fitarî ganî werdêk baş bibo, la seba alozî ma nêeşkenê nê lazimîyan peyda bikerê. Goreyê zehmetî û ambargoyê ke serê ma de esto zî ganî bêro zanayîş ke ma fek herra xo ra vera nêdanê. Seba ke bê nan û bê awe cuye bena, la bê herre cuye nêbena.”

	 

	‘Ma nêeşkenê debara xo bikerê’ 

	 

	Zekiye Elî ya ke dewa Biric Qasî ya Şêrewaya Efrînî ra ya seba îmkanê karî çin ê û çî zaf vay ê nêeşkenê  debara xo bikerê û wina vat: "Tîya de derûdorê ma heme dişminê. Milk û erdê ma mîyanê destê îşxalkerdoxan de mendo, îmkanê karî zî çin ê. Seba nê ma nêeşkenê debara xo bikerê. Her çî sûke de vay bîyo, la ma do senî debara xo bikerê, ma nêzanê. La pêwa heme astengiyan ma do seba Efrînî, xo ver bidê heta nefesê peynî."

	 

	‘Seba agêrayîşê serrê herra xo xoverdayîş do dewam bikero’

	 

	Henîfe Ehmed ke dewa Beradî ya Şêrewaya Efrînî de ciwîyena derheqê zehmetîyê ke ancena wina qal kerd: "Tîya de cuye xeylêk zehmet a, îmkanê karî çin o. Îşxalkerdoxan ma ca û warê ma ra dayî koçberkerdiş û nika zî her kes bi heme metodî hêrişê ma kenê. Çîyê sûkê zaf vayê. Vayî wina bîya zaf ke  resaya sewîyeyêka êdî rewşa kesê dewlemendan sey rewşa kesê feqîran bîya seba koçberî û ambargoyî. La reyna zî komînê ma heta ke destê înan ra bêro hetkarîya ma keno. Pêwa rewşa zehmet ma do rayîrê tekoşînî dewam bikerê, ma do seba agêrayîşê serê herra xo xo ver bidê.”