
Seba îşkenceyo ame kerdiş tepişteyan hewl da xo bikişê 

2022-04-12 13:29:40


	&nbsp;

	STENBOL - Îşkence û nêzdîbîyayîşê xerab ke no demêke yo Zîndanê Tîpê Lyê Hûmara 5ine Sîlîvriyî de zêde yeno kerdiş, dewam o. Ame diyarkerdiş ke 6 tepişteyê edlî seba nê binpaykerdişan hewl dayî xo bikişê. Şubeyê OHDyê Stenbolî dîyar kerd ke 60 gardiyanan îşkence tepişteyan kerdo.

	&nbsp;

	Şubeyê Komeleya Huqûqnasê seba Azadîye (OHD) ya Stenbolî derheqê îşkence, nêzdîbîyayîşo xirab û binpaykerdişê Zîndanê Tîpê Lyê Hûmara 5ine ê Sîlîvriyî eşkerayîyêke nuşteyî da. OHDyî dîyar kerd ke seba îşkenceyî, 6 tepişteyan hewl dayî xo bikişê û nê zanayîşî dayî: “6ê nîsane de 60 gardiyanan eşt serê qawişanê edlî. Sereştiş de gardiyanan sîlayêke da tepişteyêk ro û nê tehdîdî kerd; ‘de ti vejî ma do teber de nîşanê to bidê.’ Nê ser de mabêne tepişteyan û gardiyanan de gengeşe vejîya. Nê dir tepişteyêk krîz derbas kerd.”&nbsp;

	&nbsp;

	Seba îşkenceyî hewl dayî xo bikişê

	&nbsp;

	Dewamê eşkerayî de ame dîyarkerdiş ke rojêke dima reyna 60 gardiyanan sereştişê qawîşan kerdo û no zanayîş ame dayîş: “Mudûrê sazgehî zî bi gardiyanan dir bi. Mudûrê sazgehî verê gardiyanan de nê tehdîdî kerd; ‘Ma do nika fîlmê şima biancê. Pawe bê.’ Dima ra zî gardiyanan 6 tepişteyan, îşkence kerd. Nê ser de 6 tepişteyan hewl dayî bi layê solanê xo, xo bixeniqnê. Pêwa ke hewldayîşê xokiştişî ame vînayîş zî ne gardiyanan û ne zî xebatkarê weşîye mudaxaleyêk nêkerd. Vera înan, hevalê înan ê qawîşe hewl dayî vernî bigîrê.”

	&nbsp;

	Ganî wezaret seba rewşe zelal bikero eşkerayî bido&nbsp;

	&nbsp;

	Eşkerayî wina peynî bî: “8ê nîsane de 6 tepişteyan hebê ke derman bî hewl dayî xo bikişê. Nê tepişteyan ra yew zî nika cayê giran de yo. Seba ke tepişteyê bînî zanayîş nêdê keyeyê xo, qiseykerdişê bi telefonî înan rê ame qedexekerdiş. Goreyê zanayîşê serê çapemenîye ameyo vilakerdiş, yeno îdiakerdiş cenazeya tepişteyêk Êlih rê ameya şawitiş. Ma na îdia cigêrayîş kerd la wezîfedarê zîndanî xeberêke ma dir pare nêkerd. Serê zîndanê Sîlîvriyî yê bi Hûmara 5ine îdiayê giran yê îşkence û binpaykerdişê heqê cuye esto. Ma do na babete nêzdî ra taqîb bikerê. Berpirsyarîyê Wezaretê Edalete ke derheqê babete de xeberanê zelal pare bikero esto. Vengdayîşê ma Wezaretê Edaletî ra oyo ke derheqê tehdîdê serê cuya tepişteyan û binpaykerdişê heqan tewr leze eşkerayîyêke bido.”

	&nbsp;