'Ekonomî nêmenda la hukmat bêveng o' 

2022-04-12 09:08:02


	 

	 

	Sema Çaglak

	 

	SEMSÛR - Krîzê ekonomî her ke şino komelî ver bi rijnayîşî beno, seba vayîyan êdî welatijî nêeşkenê lazimîyê xo bingehîn nan zî bigîrê. Cinîyê ke seba nanê serdinî ke tay vayîye ci kêm o, bi saetan dore de manenê vatî, " Hukmat vano, 'ma probleman safî kenê.' La her ke şino rewşe xirab bena û tu safîkerdiş nîno kerdiş."

	 

	Seba polîtîkayê çewtî yê îqtîdarê AKP-MHPyî ke hetê ekonomîye ser her ke şino krîzê ekonomî tewr zêde beno û bedelê ci zî kesê feqîrî danê. Îqtîdar her çiqas ke wazeno sey krîzê ekonomî çin o têbigêro zî vengê welatijan ke êdî nêeşkenê vera vayîya zêde bêveng bimanê, reaksîyon ramojnenê bi nê tevgerê hukmatî veng vejenê.

	 

	Pêwa zêdebîyayîşê vayî her çî, vayîya nanî zî zêde bî û welatijî zî vernîya firinê ke aîdê şaredarîye yê seba nanê erjan bigîrê kewenê dore. Nê bajaran ra yew zî Semsûr o. Cinîyan dîyar kerd ke ê 4 mengî yo her roje yenê tîya û seba hebke nan bi 2 TL û nîm bigîrê, dore de manenê.

	 

	'Roje de zî bi saetan dore de manenê'

	 

	Nînan ra yewe zî Kamîle Arslan a  51 serrî ya ke seba feqîrî reaksîyon û hêrsê aye ya hemverê hukmatî tewr zêde bîyo. Kamîle, wina qal kerd: "Ma menga Remezanî de yê. Kesê ke roje gênê zî mecbûr bi saetan tîya de vindenê. No çi wîjdan o? Tu çîyêk nîno girewtiş, her çî xeylêk vay o. Nanê ke ma rê roşenê zî vay o.  Mêrdeyê min zî nêweş o û mîyanê lîvînan de yo. Lajê mi zî seba ke kar çin o, betal ê. Keye de her kes betal o. Tirkîya de kar qedîya yo. Ma nêzanê do problemî senîn safî bibê. Selahîyetdarî vanê ma do rewşe safî bikerê la heta nika çîyêk nêameyo kerdiş. Her kes pêrîşan o. Cîranê ma hetkarî danê ma."

	 

	'Nê krîzî ra tewr zêde cinî tesîr bîyê'

	 

	Remzîye Şirik zî reaksîyon vera polîtîkayê dewlete ramojna û vat: "Nê krîz ra tewr zêde cinî bi tesîr bîyê. Eke hetkarî nêro dayîş, ma nêeşkenê na rewşe ra xelas bibê. Mêrdeyê mi nêweşê kanserî yo. Kênayêka mi zî astengdar a. Ma mecbûr meaşê aye yê astengdarî xebitnenê. Seba ke tu ameyîşêk ma pê debara xo bikerê çin o. Êdî bes o. Wa rewşa şarî bêro vînayîş."