Sahneya Moda pê çila ameye roşnkerdiş 

2022-04-07 15:53:51


	 

	STENBOL- Sahneya Moda ya ke cereyanê ci ameybî birnayîş pê çila ame roşnkerdiş û kaya Diktat (Öteki) verê çilayan de ame kaykerdişe. Kaye rê eleqeyêko zêde virazîya.

	 

	Sahneya Moda ke Kadikoyê Stenbolî de ya, vayeyê ke cereyan rê virazîyayî vera dayîşê faturayan red kerde û cereyanê sahne hetê EnerjiSa ke girêdayeyê Sabanci Holdingî yo ra ame birnayîş. Reaksîyonê ke virazîyayî ra dima EnerjiSa cereyan akerd. Labelê vizêr raya diyîne cerayan rayna ame birnayîş. Sahneya Moda zî seba ke bale bianca rewşe sahne pê çila roşn kerde û kaya Diktat (Öteki) verê çilayan de ame kaykerdişe.

	 

	Kaye de qala way û birayêk ke şerî ra tesîr bîyî, yena kerdiş. Heto bîn de qala heyfgirewtişê way û birayan ke cepheyanê cîyayan de şer kenê û vilayê hetêk bîyî, yena kerdiş. Heyfgirewtişo mergin ê way û birayan verê enkazê awanîyêk de virazîyeno û zûrê rejîmo otorîterî zî kaye de yeno vatiş.

	 

	Kaye rê eleqeyêko zêde virazîya.