Dadîya Tenzîle Acar: seba tedawî ganî nêweşî bêrê veradayîş

2022-04-07 14:50:13


	 

	 

	Rojda Aydin

	 

	ŞIRNEX - Dadîya tepişteya nêweşe Tenzîle Acar, Rasmiye Acar dîyar kerd ke Tenzîle hema qij bî hemverê zulm û nêheqî sere wedarna û vat: "Ez wazena heme tepişteyê nêweşî bêrê veradayîş û tedawîya înan teber de bêro kerdiş."

	 

	Tepişteya nêweşe Tenzîle Acar,  2yê sibata 1995 de qezaya Hezexê Şirnexî de keyeyêk welatperwer de yena dinya. Keye ke waşt nameyê kênaya xo bikero, “Rewşen” seba qedexeyan kerd Tenzîle. Tenzîleya ke heta emrê xo ciwanî tîya pîl bîya û her wext vera nêheqî sere wedarnaya. Tenzîle hemverê zulm û zordarî hemverê şarî de bêveng nêmanena û 15 serrîya xo de mîyanê xebatanê partî de mîyanê sîyasetî de ca gêna. Tenzîle sere de Şirnex û xeylêk bajaranê bînan de mîyanê xebatan de ca gêna. Tenzîle serra 2017 de seba xebatan verê xo dana Stenbol. Stenbol de yena tepiştiş. Tenzîle 5 serrî yo Zîndanê Cinîyan ê Bakirkoyî de tepişte ya.

	 

	Tenzîleya ke lîsteyê tepişteyê nêweşan de ca gêna, nêweşîya hepatît B û tuberkuloz ci dir estê nêeşkena helm bigîro, qirika aye ra zî gonî yena. Tedawîya bi kelepçe ci rê yeno ferzkerdiş la Tenzîle hemverê nê nêwazena tedawî biba. Dadîya Tenzîleyê, Rasmîye Acar derheqê kênaya xo de ajansê ma rê qisey kerd.

	 

	'Hemverê zulmî tewrê xebatan bî'

	 

	Rasmîye, dîyar kerd ke Tenzîle hemverê zulm û zordarî tewrê xebatanê sîyasî bî û vat: "Waştêne debara keyeyê bikero la nêwaştêne şêro cayêk bîn bixebityo û waştêne xoser bixebityo. Coka xo rê dikanê  telefonî akerd. Dimayê demêk zî mecbûr mende dikanê xo pado. Destpêkerdişê xebatanê partî yê Tenzîle hemverê zulm û zordarîyê dewlete yê serê keyeyî bi. Hema tute bî dest bi xebatan kerd. Pêwa  15 serrîya xo bi zerrî û can xebate kerdêne."

	 

	‘Nêheqî qebûl nêkerdêne'

	 

	Rasmîye wina qal kerd: "Kênaya mi xeylêk jîyatî ya. Hetkarîya her kesî kerdêne. Tutî ra heta nika embazîyêk baş kerda. Qijî ra zana bî. Her wext embazanê xo pawitêne. Tu wext nêheqî qebûl nêkerdêne. Taybetmendîya aye nika zî zîndan de dewam keno. Tenzîle her tim waştêne nameyê tutan bi kurdî bo. Seba ke ma seba qedexeyan nêeşkayî nameyê ci bikerê Rewşen. Tenzîle nika zî nameyê Rewşene xebitnena. Keye û teber de nameyê aye Rewşen a. Kênaya mi hema dergûşe bî seba nameyê xo zulmî dir rî bi rî mende la nika zî pîl bîya hemverê zulmî sere wedarnena."

	 

	'10 rojan îşkence ci rê ame kerdiş'

	 

	Rasmîye vat, Tenzîle seba xebatan verê xo daya Stenbol û wina vat: "Demo ke Stenbol de ameye destbendkerdiş 10 rojan îşkence ci rê ame kerdiş. Kênaya mi serra 2017 de ameye tepiştiş. Îşkenceyê ke ci rê ameyî kerdiş, zîndan de zî dom kerd. Sereyê ewilî ra heta ewro serê aye û embazanê aye de tedayêk esto. Îdarekarîyê zîndanî û  gardîyanî her roje erzenê serê qawişan û cigêrayîş kenê. Cigêrayîş de heme hacetê înan vilakerdiş. Nê çî mîyanê hhewteyî de 3 rey yenê kerdiş. Bi zilmêko pîlî dir rî bi rî yê."

	 

	‘Bi kelepçekerde benê nêweşxane'

	 

	Dadîya Tenzîle Rasmîye dewam de wina vat: "Kênaya mi demêk derg o nêweş a û demo ke benê nêweşxane zî bi kelepçe benê û seba nê kênaya mi tedawî qebûl nêkena. Sewbîna heme gardîyanî zî aye dir kewenê cayê muayeney. Bi kelepçe do senîn bêro tedawîkerdiş. Demo ke benê nêweşxane zî bi mehnaya koronayî di mengan huceryê yew kesî de girewtî. Merdimêke nêweşe do senîn lazimîyê xo bi ca bîyara."

	 

	‘Tepişteyê nêweşî nînê tedawîkerdiş'

	 

	Rasmîye tewr peyîn wina vat: "Ganî pêro tepişteyê nêweşî serbest bêrê veradayîş û tedawîya înan bêro kerdiş. Ma nêwezanê zerrîya dadîyan biveşo. Tutê ma yenê sirgunkerdiş, hem zulm ma keyeyan rê kenê û hem zî tepişteyan rê kenê. Kênaya mi nêweşa weremî ya û ganî bêra tedawîkerdiş. Labelê zîndanan de pêro nêweşî nînê tedawîkerdiş. Ez wazena kênaya mi bêra veradayîş û tedawîya ci teber de bêro kerdiş. Bi tena sereyê xo nêeşkena biewna. Seba nêweşîya aye ganî cayê û cilê ci tim pak bê. Zîndan no het ra baş nîyo. Seba tedawîya ci nîna kerdiş ma mîyanê endîşeyî de yê."