Feleknas Uca: Bi hêzê Newroze ma ver bi Amara de şinê  

2022-04-04 13:53:28


	 

	 

	Medya Uren - Derya Ren 

	 

	AMED - Temsîlkara Hemserekîya Pêroyî ya HDPyî Feleknas Uca derheqê mesajê şarê kurdî ke wareyê Newroze de dayo û 4ê Nîsane de qisey kerd û vat: "Dimayê 8 serran reyna Stenbol ra heta Botan û Amedî şarê kurdî bi yew vengî azadîya birêz Abdullah Ocalanî qîrayî. Ma bi eynî hêz ver bi roja newe 4ê Nîsane de şinê."

	 

	8ê Adare ra heta Newroza 2022 girseyî wareyan de bi yew vengî azadîya Rayberê PKKyî Abdullah Ocalanî qîrayî. Çalakîyê sey "Dem demê azadîya cinîyan o" û "Dem demê serkewtişî yo" ameyî destpêkerdiş û netîceyê girîng bi dest kerdî. Her çiqas çapemenîya medyaya hawiz nêvîna zî seba şarê kurdî bî hêvîyêke pîl ê serkewtişî. Kurd bi ê rihî zî ver bi 4ê Nîsane roja rojbîyayîşê Rayberê PKKyî  Abdullah Ocalanî de şinê.

	 

	Temsîlkara Hemserekîya Pêroyî ya Partîya Demokratîke ya Şaran (HDP) parlementere Feleknas Uca mesajê ke şarî meydanan de dayê pare kerd û derheqê 4ê Nîsane de vengdayîşê xo pare kerd.

	 

	'Şarî bi rihê têkoşînî adir gur kerd'

	 

	Feleknase sere de seba şarê kurdî spas kerd û vat: "Rehşenan, Bêrîvanan heta Mazlûman ma têkoşînê hemverê zilmî anê vîr. Şarê kurdî reyke bîn Newroze de heme wareyan goreyê zerrîya demî û adirê Newroze wayîrvejîyayîşêk pîl kerd. Ma zanê Newroze seba şarê kurdî hemverê bindestî serewedaritiş o, hemverê faşîzmî têkoşîn o. Şarê kurdî emsar rexmê heme tedayan hemverê zilmî rawuştî û wayîrê Newroze vejîyayî. Bi salan bi ke dewlete destûr nêdayîne Newroze taxêke de zî bêra pîrozkerdiş. Şarê kurdî bi canê xo, rihê xo, têkoşîn û vindertişê xo ramojna ke adirê Newroze gur keno û wayîr vejîyeno."

	 

	'Bi Newrozêke tarîxî'

	 

	Feleknase dewam de wina vat: "Rojeva ma de azadîya fîzîkî ya birêz Abdullah Ocalanî û tecrîdê girankerde yê Îmraliyî estbi, tedayê zîndanan de dewam kenê bi û Newroza emsar de zî bî babetê sereyîn. Serrê peyînan ra heta nika  azadîya birêz Abdullah Ocalanî xora rojeve de bî û seba ci ameyîne pîrozkerdiş. Bi taybetî zî Newroza fînalî ya prosesê aştîye ke serranê 2012ine de bi pêvînayîşê Norveçî dir dest pêkerd qirkerdişê Parîsî virazya. Dimayê nê serranê 2013-2015ine de zî Newroze bî Newrozê tarîxî. Neweroze êdî sey şahîke nêameye pîrozkerdiş. Bi mesajê birêz Abdullah Ocalanî dir bi erjêke  bêhempa û tarîxî. Şarê kurd, şarê Tirkîya, sîyasetmedarî, selahîyetdarê Ewropayî pêro seba nê kelecanî bî şirîk. Behrê Sîya, Trabzon ra heta Amed şar herikya wareyê Newroze. Sey do birêz Abdullah Ocalan bi xo bêro Newroze. Çapemenîya Tirkîya zî bi no hawa wayîr vejîya."

	 

	'Dimayê 8 serrî bi eynî ruhî vejîyayî wareyan'

	 

	Feleknase vat, mesajê Abdullah Ocalanî bi mesajê aştî wina dewam kerd: "Seba mesajê birêz Abdullah Ocalanî Newroza 2013ine bî Newroza yewîye û çareserkerdişê problemê kurdî. Ganî no mesajê ey serranê 2013-2015ine baş bierjnê. Dimayê ke serekkomarê Tirkîya vat, çareserî ame wedaritiş, êdî hêrişî dest pêkerdî. Bi tankan kewtî mîyanê bajaranê Kurdistanî û qetlîamê girdî bi ca ardî. No çî seba nêsafîkerdişê problemê kurdî qewimya. Dimayê 8 serran Newroza 2022ine şarê kurdî reyke bîn hêzê xo nîşanê dewlete da. Na Newroze de şarê kurdî hemverê hêzê ke wazeno tecrîd ferz bikero, hêzê ke hemverê safîkerdişê problemê kurdî hewil dano, hêzê ke nêwazeno kurdî bibê yew, mesajêke xurt seba rayaumumî ya Tirkîya û dinya da. Şarî bi yew vengî vat, dem demê azadîya birêz Abdullah Ocalanî yo."

	 

	'Tecrîd de bi israr ê'

	 

	Feleknase qalkerdişê xo wina dewam kerd: "Embazê kurdan bi sloganê, 'dem demê azadîya Abdullah Ocalanî ya' kampanya dabî destpêkerdiş. Vakurê Kurdistanî de zî tecrîd û azadîya birêz Abdullah Ocalanî kewte rojeve. Ganî dewleta tirkî mesajê ke ameyo dayîş baş biwano. Reyna Karadenîz ra heta Stenbol heta Botan û Amed de no mesaj ame dayîş. Wareyê Newroze de teberê nê sloganan çîyêk nêame berzkerdiş. Heta ke pêvînayîşê bi birêz Ocalanî dir Îmraliyî de nêrê kerdiş, çareserîya demokratîke zî no welatî de aver nêşina. Polîtîkeyê şer û mîlîtarîzmî aver şêro. Krîzê sîyasî, şer û krîzê ekonomî zî nê dir girêdaye zêde beno. Coka tepiştiş û hêrişan zêde kenê. Sewbîna tecrîd de israr kenê. Hemverê nê hişmendî zî şarê kurd û dostê kurdan wareyê Newroze de vengdayîşê aştîye kerdî."

	 

	'Heqê kesî çin o serê nameyê ci de qisey bikero'

	 

	Feleknase qiseykerdişê ke derheqê Abdullah Ocalanî de yenê kerdiş ard vîr û vat: "Birêz Abdullah Ocalanî pêvînayîşê xo yê peyîn de zî ard ziwan ke kes serê nameyê ey de qiseykerdiş nêkero. Seke her tepişteyê sîyasî lazim o bi hawayêke akerde pêvînayîşê akerde, pêvînayîşê avûkatan û pêvînayîşê keyeyê bêrê kerdiş. Tecrîdo girankerde dewam keno û serekwezîrê Tirkîya bi vatişê ke derheqê ey de kena fehmêke cîya pêşkêş kena. Ê kesê ke vatê, prosesê aştî êdî çin o û proses xira kerdê, kesê ke bîyê sebebê tecrîdê Îmraliyî zêdeyêr bibo, kesê bîyê sebebê na rewşa sîyasî ya nika serê nameyê birêz Ocalanî de qisey bikerê. Seba nê sebebî lazim o pêvînayîş ey dir bêro kerdiş û o fikrê xo pare bikero. Ey vatêne ez o hewteyêke de problemê Rojhelatê Mîyanên safî bikerî û ganî seba nê game bêro eştiş."

	 

	'Xo temsîlkarê aştîye vînenê'

	 

	Feleknase bale ant serê pêvînayîşê  Ûkrayna û Rûsya û wina vat: "Tirkîya wazena sewîyeya mîyanneteweyî de xo sey temsîlkarê aştîye ramojno. Pêvînayîşê bi Ûkrayna û Rûsya dir kerdê waştî nê nîşan bidê. Înan hema problemê mîyanê xo de safî nêkerdê. Problemê ke verê berê înan verdê safî bikerê, seba safîkerdişî benê asteng. Ganî sere de Tirkîya problemê kurdî safî bikero. O wext no tevgerê înan do bawerî bido."

	 

	'Ma do gamê cuya newe bierzê'

	 

	Feleknase vernîya ke qalê Amara bikero cangorîyê Amarayî, Mahsum Karaoglan û Mustafa Dag ard vîr û vat: "Verê bi rojan amadekarîyê 4ê Nîsane ameyîne kerdiş. Xelfetî de zî no pîrozbayî 2 rojan dewam kerdêne. Şar bi girseyî heta Xelfetî rayrayîş kerdêne. Mahsum û Mustafa zî nê rayrayîş de dinyaya xo bedilnayî. No rojbîyayîş rojbîyayîşê temamê kurdan o û nîno qedexekerdiş. Dewlete zî bi hêriş û qedexeyan waşt ke bibo asteng. Ma do emsar zî bi nê îrade û hêvî verê xo bidê Amara. Ma do heta 10ê nîsane çalakîyê sey darramitişî bikerê. Ma do gamê cuya newe bierzê. Do her kes bi eynî rihî 4ê Nîsane pîroz bikerê. Şarê ma bi tehdîdan peyser nêşino. Ma Newroze de dî û ma do 4ê Nîsane de zî bivînê. Bêrê ma roja newe pîya pîroz bikerê."