‘Seba azadî yewbîyayîşê netewî lazim o’  

2022-03-28 13:23:50


	 

	Sema Çaglak - Derya Ren

	 

	
		AMED -  Cinîyê kurdî vengdayîşê awankerdişê yewbîyayîşî, yewîya neteweyî kerdî û vatî: "Ma xeylêk bedel da û na herre bi gonî ameya awdayîş. Eke ma kurdî nêbê yew, ma do vînî bikerê. Seba azadîye ganî yewbîyayîş bi ca bêro.”
	
		 


	Newroza 2022ine bi sloganê “Dem demê serkewtişî yo’ bajaranê herême û Tirkîya de ame pîrozkerdiş. Startê Newroze 15ê adare de Elkê û yê fînalî zî 21ê Adare de Amed de ame dayîş. Pêwa heme astengî, hêriş û hewldayîşê provakatîf bi milyonan kesî herikyayî meydanê Newroze. Meydanê pîrozbayîşî de lazimîyê awankerdişê yewîya neteweyî tewr zêde vejîya werte. Cinîyê ke tewrê Newroza Amedî bî bale antî serê girîng yewbîyayîşê neteweyî. 

	 

	‘Hemverê dej û janî yewbîyayîşê xo awan bikerê’

	 

	Azîze Polat dîyar kerd ke Şarê Kurdî xeylêk bedelê giran dayê û vat: “Ma kurdî hertim bi tena bî. Heta ke ma nêbê yew, ma do vînî bikerê. Ma xeylêk şehîdî dayî, na herre bi gonî ameya awdayîş. Bes êdî parçebîyayîşî rê. Seba ke ma bieşkê vernîya nê dejî û janî bigîrê ganî yewbîyayîşê xo awan bikerê. Abdullah Ocalan 23 serrî yo zîndan de xo ver dano. Eke ma bibê yew, ma eşkenê ey azad bikerê. Azadiya Ocalan do aştîye bîyaro.”

	 

	‘Awankerdişê yewbîyayîşî lazimîyêk bingehîn o’

	 

	Sayîme Denîz vatişê Cigerxwinî yê, “Kurdinê bibê yew, eke şima nêbê yew şima do şêrê yew bi yew” ard vîr û vat: “Awankerdişê yewbîyayîşê neteweyî serkewtişê Şarê Kurdî yo. Ma sey dadî, hertim hetê aştî û têduştî bî. Ma nêwazenê gonî birijyo. Sewbîna ganî bi Abdullah Ocalanî dir zî pêvînayîş bêro kerdiş. Coka awankerdişê yewbîyayîşê neteweyî lazimîyêk bingehîn o.”

	 

	‘Ma êdî azadî wazenê’

	 

	Seher Aykan zî vat, waştişê heme kurdan yewbîyayîş o û vat: “Ma êdî nêwazenê kurdî bimirê. Ma tersenê ke televîzyon abikerê û xeberêke nêbaş eşnawê. Her roje serebûtêk nêbaş bena. Êdî wa ciwanê ma nêrê kiştiş. Ma aştî, yewbîyayîş û azadî wazenê.”

	 

	‘Ma do aştî bîyarê nê welatî’

	 

	Sîtîye Akyol, ard ziwan ke dadî tim seba aştîyêke mende bi ca bêro û yewbîyayîş awan bibo têkoşîn kenê û wina vat: "Ma do bibê yew û aştî bîyarê nê welatî. Wa kurdî nêbê dişminê yewbînan. Bes êdî wa kes ma ra nemêro.”

	 

	‘Ganî kurdî bi tîfaq bê’

	 

	Yaşar Kurd zî derheqê yewbîyayîş de wina ard ziwan:  "Ganî Abdullah Ocalan azad bibo. Eke kurdî mîyanê yewbînan de tîfaqê xo awan bikerê û bibê yew do vernîya nê zilmî bigîrê. Metodê xilasbîyayîşî nê bindestî awankerdişê yewbîyayîşê neteweyî yo û azadkerdişê Serek Apo yo. Amancê Newroza emsarî zî no bi.”