Wan de heta Stenbolî Nobetê Edaletî vila beno: Wurzê serê lingan 

2022-03-26 13:28:51


	 

	STENBOL- Merdimê tepişteyan ê hemverê binpaykerdişê heqan ê  zîndanan verê Edliyeyê Stenbolî dest bi "Nobeta Edeletî" kerdî, dîyar kerdî ke heta biser nêkewê do çalakî dewam bikera û veng dayî heme keyeyan kerdî ke wurzê serê lingan û bikewê mîyanê hewldayîşî.

	
		 


	Bi amancê tepişteyê nêweşan ê  înfazê înan ameyê veşnayîş bêrê veradayîş û binpaykerdişê heqan ê zîndanan peynî bê Amed, Wan, Îzmîr çalakîya "Nobeta Edeletî" amebi destpêkerdiş û çalakî berdî Edlîyayan. Hewteyê vîyarte de roja Panşemî merdimê tepişteyan Stenbolî zî dîyar kerdî ke do verê Edlîyeyî "Nobeta Edeletî" bigîrê.

	 

	Heta deskewtişî do têkoşîn dewam bikero

	 

	Dadîya tepişteyê bi nameyê Yakup Akman ke zîndanê Tîpê F yê Hûmara 3in Sîlîvirî de tepişte yo, Fînce Akman zî tewrê nobete bî û vat, lajê ci rê cezaya muebetî ameya dayîş û vat: "Tepişteyî zîndanan de yenê îşkencekerdiş. Tutê ma vêşan û têşan manenê. Nê rojanê serdî de merdimî nêeşkenê bi zor keyeyê xo de vinderê la zîndana de gaz anêkenê. Gelo çi heqê înan esto nê kenê? Çi ma ra wazenê."

	 

	Fînce vat seba ke xeberê ergî zîndanan ra nêrê çalakî kenê û vat, her hewte roja panşeme de Nobeta Edeletî bigîrê. Fînca sewbîna kesê ke Amed, Wan û Îzmîr de tewrê nobete benê zî silma kerd û vat, heta destkewtiş nêrê bidestkerdiş, do têkoşînê înan dewam bikero.

	 

	Seba keyeyan vengdayîş: Wurzê serê lingan

	 

	Dadîya tepişteyê bi nameyê Xemgîn Karakaş ke surgunê zîndanê Tîpê Fyê Afyonî ame kerdiş û koxuşê yew kesî de maneno, Cemîle Karakaş zî wina vat: "Lajê mi  çîyêk nêkerdo. 2-3 rey ame surgunkerdiş. Nika surgunê Afyonî kerdî. 3 mengî yo tîya yo. Xeylêk îşkence bi ci kerdî. Bi bahaneyê koxuşê sîyasî çin ê, waştî berê kîşte tepişteyê edlî û seba uca qebûl nêkerd, hucreyê yew kesî de maneno. Wa nê zilmî tutanê ma rê nêkerê. Tena seba lajê xo ney, seba pêro kesan tîya ya. Ez seba înan edalet wazena. Ez wazena vengê ma şêro heme keyeyan û heme keyeyî seba tepişteyan wurzê serê lingan. Heta tutê ma tepişte bibê, ma do wayîrê înan vej,îyê. Ma wazenê pêro dinya vengê ma bieşnawo."

	 

	5 serrî yo tutanê xo nêvînena

	 

	Waya tepişteyê bi nameyê Omer Dag ke zîndanê Tîpê F yê Balikesîrî de maneno, Gulsum Dag wina vat: "Birayê mi 11 serrî yo problemê loqaleyan ciwîyeno. Bi hawayêke baş nîno dermankerdiş. Ganî bêro  kontrolkerdiş la nêbenê. Tepişteyan rê zulm kenê. Wexto ke ma şinê verê înan ma rê zî kenê. Ma 10 nuqteyê kontrolî ra derbas benê. Cigêrayîşêk hîra kenê. Ma xeylêk nêrehet benê. Bi hîrê serrî yo mi tena reyke birayê xo dî. Dadîya mi zî 5 serrî yo lajê xo nêdîya. Berê zîndanan abikerê. Ma edalet û heq wazenê. Kezeba dadîyan veşena. Wa her kes wayîrê tepişteyan vejîyo. Çi beno wa bibo paştdayîş bidê ma."

	 

	‘Polîtîkayê çinkerdişî kenê'

	 

	Endama Komeleya Huqûqnasê seba Azadîye (OHD) avûkate Jîyan Çayirtekîn zî wina qal kerd: "Zîndanan de heqo sereyîn zî nîno dayîş. Tepişteyê nêweşan nêbenê revîr zî. Her tewir heqê xo ra yenê astengkerdiş û rastê teda yenê. Tepişteyan neqlê zîndanan sey Afyon û Gumuşxane kenê. Semedo ke koxuşê sîyasî uca de çin ê, kenê  koxuşê edlî. Koxuşê edlî zî bi hêrîşan dir yenê rî bi rî. Polîtîkayêke pelçiqnayîş û çinkerdişî hemverê tepişteyê sîyasîyan yena kerdiş. Wazenê komel û keyeyan yewbînan ra dûr bifînê."