Cenazeya Şîlan Çîçek Mêrdîn de ameye definkerdiş

2022-03-16 14:53:00


	 

	MÊRDÎN - Endama YJA-Starî Şîlan Çîçek, Koyê Bagokî de netîceyê pêrodayîşî de dinyaya xo bedilnaye, dimayê 3 mengan keyeyî eşka cenazeya kênaya xo bigîro. Cenazeya aye Mêrdîn de ameye definkerdiş.

	 

	Hêzê artêşa Tirkîya 11ê kanûna 2021 de Koyê Bagokî yê Nisêbînê Mêrdînî dest bi operasyonê leşkerî kerdibî û operasyon heta 15ê kanûne dewam kerd. Netîceyê bombevaranî de Koyê Bagokî 6 endamê YJA-Starî dinyaya xo bedilnayî. Cenazeyê endamanê YJA-Starî yê Denîz Orak (Hîra) û Sîmanûr Kaya (Mesken) amebî girewtiş û yê 4 cinî bîn zî Goristanê Bêkesan de amebî definkerdiş. Cenazeya Betûl Dîlen (Dîcle) û Fatma Çîçek zî tarîxê cîya de dayî keyeyê înan û cenaze reyna ameyî definkerdiş.

	 

	Cenazeya endama YJA-Starî Şîlan Çîçek (Nûjiyan) zî dimayê nimûneyê gonî, vizêr dayî keyeyê ci. Keye cenazeya kênaya xo vizêr şan de Goristanê Bêkesan ê Artûkluyî ra girewt û berd dewa Kurika Çeto ya Artûkluyî. 

	 

	Cenazeya Şîlane hetê keye û merdimanê xo ra kîşte Denîz Orak ameye definkerdiş.