'Cinîyê Rihayî do bi coş û rengê xo meydanan de bê' 

2022-03-06 11:30:11


	 

	 

	Sema Çaglak

	 

	RIHA - Hemsereka HDPyî ya Rihayî Çigdem Karakeçîlî dîyar kerd ke, ê xebatê xo yê seba 8ê Adare bêmabên dewam kenê û vat: "Cinî 8ê Adare de do duştê tehdayî û qetilkerdişê cinîyan de seba cigêrayîşê edaletî ya Emîne Şenyaşare meydanan de bê. Şexsê Aysel Tûglûke de, ma do bibê vengê tepişteyanê nêweşan û heme tepişteyanê sîyasîyan.

	 

	Mintiqa de hadrekerdişê 8ê Adare ya Roja Cinîyanê Dinyayî bêmabên dewam kena. Dimayê dayîşê startê 8ê Adare ya Kerboranî, cinîyan şaristanê mintiqayî de û Tirkîya de zî startê xebatê xo dayî. Riha de zî do cinî 8ê Adare de meydanan de bê, do yewir bi tewir programê renginî 8ê Adare de pêşwazî bikerê. Têkildarê  babete, Hemsereka Partîya Demokratîke ya Şaran (HDP)a Rihayî Çigdem Karakeçîlî qisey kerd.

	 

	'Ma do destqezencê xo bipawê'

	 

	Çigdeme, destkerdişê qiseyanê xo de dîyar kerd ke 8ê Adare seba cinîyan destqezençêk pîl o û îşaret kerd ke,  duştê tewirîyîya tehdayî, desteştişî û qetilkerdişî de, na roje de têkoşîna ke yena dayîş verpersêke yo. Çîgdeme wina qisey kerd: "Ma zî sey cinîyan seba destqezencê xo bipawê û duştê polîtîkayê neyarîya ke serê cinîyan de yena kerdiş do meydanan de bê. Ma do bi reng û xemlê xo 8ê Adare bi coşêke pîl pêşwazî bikerê. Emsar ma mintiqa de bi sloganê 'Wext wextê azadîya cinîyan a'  Kerboranê Mêrdînî de startê xebatanê xo da. Dimayê Mêrdîn û Amedî ma Riha de zî startê xebatanê xo da."

	 

	'Xebatê ma yê 8ê Adare do bêmabên bidomê'

	 

	Çigdeme bale ante serê plansazîyê xebatanê xo yê 8ê Adare û wina qiseyê xo  dewam kerd: "Ma do di çerçewaya xebatanê xo de merkezê Rihayî de şayîya cinîyan organîze bikerê. Cinîyanê tepişteyan rê kartan bişawê. Sewbîna ma do qezaya Xelfetîyî de zî pêwa erbaneyî rayîrşîyayîş organîze bikerê û peynîyê programê xo de ma do bi şayîyêke girseyî 8ê Adare pîroz bikerê. Yanê xebatê ma, do di na  çerçewayî de, do heta 8ê Adare bêmabên bidomo. 8ê Adare de seba ke ma destqezencê xo bipawê, ma do bi reng û coşê xo meydanê 8ê Adare bixemilnê."

	 

	'Ma do bibê vengê cigêrayîşê edaletî ya Emîne'

	 

	Çigdeme, ard ziwan ke ê do bibê vengê cigêrayîşê edaletî ya Emîne Şenyaşar, do bibê vengê tepişteyanê nêweşan û do qetilkerdişê cinîyan rê vajê êdî bes o. Çîgdeme wina dewam kerd: "Cinîyî do 8ê Adare de duştê tehdayî û qetilkerdişê cinîyan de û seba bibê vengê cigêrayîşê edaletî ya Emîne Şenyaşare meydanan de bê. Şexsê Aysel Tûglûke de, do bibê vengê tepişteyanê nêweşan û heme tepişteyê sîyasî. Her roje bêkemanî cinîyî yenê qetilkerdiş û tehda ro cinîyan yeno kerdiş. Eke ma nêvejîyê meydanan ke do qirkerdişê cinîyan dewam bikero."

	 

	'Do no îqtîdar bi têkoşîna cinîyan apey şêro'

	 

	Çîgdeme, peynîyê qiseyanê xo de no veng kerd: "Seba munasebeta 8ê Adare  ez venga cinîyan kena û vana ke, eke ma 8ê Adare de meydanan de bê,  ma do bibê tersê îqtîdarî. Do no îqtîdar bi têkoşîna ma apey şêro. Ganî ma xo zereyê keyeyî ra bixelesnê û duştê binpaykerdişê heqan de têkoşîne bidê. Bi têkoşîne û xoverdayîşî ma eşkenê peynî ro nê zilmî ke yeno kerdiş bidê. Vera nê yewî ma 8ê Adare de heme cinîyan dawet kenê şayîya ke ma do Organîze bikerê."