Cinî hemverê qirkerdiş û şerê taybetî vejîyê wareyan 

2022-03-04 13:37:43


	 

	Sema Çaglak

	 

	AMED - Cinîyê sîyasetmedarî dîyar kerdî ke ê do 8ê Adare de seba Garîbe Gezer, Denîz Poyraz û Aysel Tûglûk wareyan de bê û hemverê şîdet, kiştiş û polîtîkayê şerê taybetî vajê, "Dem demê azadîya cinîyan o."

	 

	Bi nêzdbîyayîşê 8ê Adare Roja Cinîyan ê Dinya rê amadekarîyê cinîyan zî dest pêkerd. Cinîyan emsar startê xebatanê xo qezaya Kerboranî ya Mêrdînî de bi sloganê, "Dem demê azadîya cinîyan o" da. Do emsar cinî hemverê şîdetê cinîyan, kiştişê cinîyan, binpaykerdişê heqan û hemverê  polîtîkayê şerê taybetî wareyan de bê û xebatê xo yê 8ê Adare na çarçewa de bikerê. Cinîyê Amedî zî derheqê 8ê Adare de mesajê xo pare kerdî.

	 

	'Ma do destkewtişê xo bipawê'

	 

	Îdarekara Partîya Herêman ê Demokratîke (DBP) ya Amedî Hasîbe Yazdik, dîyar kerd ke 8ê Adare seba heme cinîyanê dinya destkewtişêk pîl o. Yewîya cinîyan ê seba a roje hêz û bawerîyêk pîl dano. Hêrişê hemverê destkewtişê cinîyan de şîdet û kiştişê cinîyan her ke şino tewr zêde beno. Hemverê nê caardişê bêmerdimayî ma do têkoşînê xo tewr pîl bikerê û nê 8ê Adare de zî ma do bi reng û vengê xo vejîyê wareyan. 8ê Adare seba ma tena manaya têkoşînê hemverê serdestîyê camêrdan nîyo, eynî wextî de hawayêk têduşt têkoşînê hemverê hişmendîyê îqtîdarî yo. Ma do seba ke zorê nê hişmendî berê û cuyêka têduşt awan bikerê bi sloganê, "Dem demê azadîya cinîyan o" wareyan de bê. Ma do destkewtişê xo bipawê û dima ra  game peyser nêerzê."

	 

	'Cinî, roj bi roje ver bi azadîye de şinê'

	 

	Aktîvîsta Tevgerê Cinîyan ê Azadan (TJA)' Melîha Gurlûk zî wina vat: "8ê Adare seba ma rojêka zaf girîng a. Seba ke a roje sey roja azadîya cinîyan yena nasnayîş. Cinî bi se serre yo seba cuyêka  azad û komelêke azad têkoşîn dana û nê wareyî de xeylêk berdelê pîlî dana. La nika cinî a roje tewr zêde bi qîmet kenê. Roj bi roje, saet bi saete cinî ver bi azadîye şinê. Cinîyê ke seba cuya xo bi endîşeyîn ê wa 8ê Adare de heme nê çîyan ra vaj ê bes o û bi vengêke berz vejîyê wareyan."

	 

	'Do cinî hemverê polîtîkayê şerê taybetî vejîyê meydanan'

	 

	Melîha dewam de wina vat: "Roje çin a ke cinî nîna kiştiş. No verê ra heta nika wina bîyo. Wa cinî hemverê nê caardişan bêveng nêmanê. Sîstem tim camêrdan paweno, bi zanabîyayîş polîtîkayê hemverê cinî aver beno û hemverê cinîyan şerêko taybet keno. Gama ke ma ci ra ewnîyenê, fihûş û tiryakî bi destê sîstemî mîyanê komelî de yeno vilakerdiş. Tewr zêde hemverê keyeyê welatparêzan nê polîtîka kenê ke rûmetê înan bişikinê û kultur û tarîxê cinîyan bêro rijnayîş. La bêguman cinî hemverê nê  polîtîkayanê lêşinan wayîrê hişmendî yê û hemverê polîtîkayê şerê taybetî vejîyê meydanan."

	 

	'Eke cinî azad nêbo komel zî azad nêbeno'

	 

	Hemsereka Partîya Demokratîke ya Şaran a qezaya Yenîşehîrî Remziye Sizici zî wina vat: "Gama ke ma vanê eke cinî azad nêbo, komel zî azad nêbeno. Ganî cinî yewîya xo awan bikerê. Cinîyê ke yewîya xo awan bikerê, ganî hemverê zîhnîyetê camêrdan û zîhnîyetê  faşîst têkoşînêk bê hempa bidê. Ganî 8ê Adare de zî ma do cinî, kiştoxê cinîyan ra bigêrê. Kiştoxê Garîbe Gezer û kiştoxê Denîz Poyraz bigêrê. Ma do kiştoxan heme cinîyan ra bidê cezakerdiş. Ma do seba Garîbe, Gezer, seba Denîz Poyraz, seba Aysel Tûglûk û seba heme cinîyan vejîyê wareyan û vengê xo berz bikerê."