'Seba safîkerdişê probleman ganî tecrîd bêro peynîkerdiş' 

2022-02-25 13:46:41


	 

	 

	Sema Çaglak

	 

	AMED - Tecrîdê giran ê serê Rayberê PKKyî Abdullah Ocalanî de dewam keno û 10 mengî yo tu xebere ci ra nîna girewtiş. Cinîyan  bale ant serê tecrîdî û dîyar kerdî ke seba problemê mîyanê Tirkîya bêrê safîkerdiş, ganî rayîrê dîyalogî bêro akerdiş û tecrîd peynî bibo.

	 

	Tecrîdê giran ê serê Rayberê PKKyî  Abdullah Ocalanî dewam keno û bi 10 mengî yo tu xebere ci ra nîna girewtiş. Muracatê avûkat û keyeyî seba pêvînayîşî bêmehna yenê redkerdiş yan zî cewab nîno dayîş. Polîtîkayê tecrîdî yê giran ê serê Rayberê PKKyî Abdullah Ocalanî de dewam keno û pêwa nê binpaykerdişê heqan zîndanan de her ke şino zêde beno.

	 

	‘Ma keyeyê xo de zî binê tecrîdî de yê'

	 

	Derheqê babete de Îdarekara  Partîya Demokratîke ya Şaran (HDP) ya Bîsmîlî Xanim Tanriverdî qisey kerd û vat: “Xêrcê dewleta tirkî tu kes tecrîd û zilmêko wina nêkeno. Ma keyeyê xo de zî binê tecrîdî de yê." Endama Meclîsê HDPyî yê îdarekara Amedî Edîbe Dogrî zî vat, netîceyê polîtîkayê AKP û MHPyî yê faşist de tecrîd her ke şino tewr giran beno, tepişteyî binê şert û mercê xirab de manenê û tepişteyê nêweşî nînê tedawîkerdiş. Sere de Aysel Tûglûk û heme tepişteyê nêweşî ganî serbest bêrê veradayîş.

	 

	‘Ganî rayîrê dîyalogî bêro akerdiş'

	 

	Xanim Tanriverdî, bale ant serê xebernêgirewtişê Abdullah Ocalanî û vat: “Birêz Ocalan mîyanê şert û mercê giranî de xo ver dano. No nêzdîyê serrêke yo xebere ci ra nîna girewtiş. Pêvînayîşê bi keye û avûkatan dir heqê unîversal ê heme tepişteyan o. Ganî lezabez xebere Brêz Ocalanî ra bêro girewtiş. Seba ke problemê mîyanê Tirkîya bêrê safîkerdiş, ganî rayîrê dîyalogî bêro akerdiş. Ma her wext vanê, mifteyê aştîyeû pêkerdişî Îmralî de yo. Aştîyêke mende û demokrasî bi qiseykerdişê birêz Ocalanî mimkun o. Labelê îqtîdarî seba ke şer de israr kenê û polîtîkayê yewperestî pawenê nê rayîrî anêkenê."

	 

	‘Vera safîkerdişî şer de israr kenê'

	 

	Xanime dewam de wina vat: “Êdî şar polîtîkayanê înan ra haydar o. Şar rewşa bîyaye vîneno û nêrazîbîyayîşê xo ano ziwan. Nê  polîtîkayî bi xususî krîzê ekonomî, kaos û alozî zêdeyêr kenê. Komel mîyanê krîzî de yo û îqtîdar vera ke probleman safî bikero, şer de israr keno. Çira pere seba şerî fisneno? seba ciwanan nêfisneno. Eke bi ê  pereyan fabrîka bêrê akerdiş, do ciwanî zî nêkewê rayîro xirab. Îqtîdar şer de israr keno. Bi hezaran kurdî zindanan de yê. Sebeb zî dewaya heqê xo kerdê. Îqtîdar bi polîtikayê xo yê hemverê kurdan mîyanê komelî de bêtêduştî û nefret vila keno."

	 

	‘Wa êdî tecrîd wedarnê'

	 

	Endama Meclîsê HDPyî ya îdarekarîya Amedî Edîbe Dogrî zî wina vat: “Netîceyê polîtîkayê AKP û MHPyî yê faşist de tecrîd her ke şino tewr giran beno. Sewbîna tepişteyî binê şert û mercê xirabî de manenê û tepişteyê nêweşî yê giranî nînê tedawîkerdiş. Coka zîndanan ra cenazeyî vejênê. Pêwa ke raporê tepişteyê ke nêeşkenê zîndan de bimanê zî ATK yo ke binê kontrolê îqtîdarî de xebityeno, reyna şaweno zîndan. Ma êdî nêwazenê zîndanan ra cenazeyî vejîyê. Sere de Aysel Tûglûk û heme tepişteyê nêweşî wa ganî bêrê veradayîş. Êdî bila binpaykerdişê heqan peynî bikerê û tecrîd peynî bikerê."