Keyeyê tepişteyê nêweşî: Binê zulmî de do senîn bêrê tedawîkerdiş? 

2022-02-22 13:09:41


	 

	Rojda Aydin

	 

	ŞIRNEX - Tepişteyo nêweş Nûrettîn Başaran ke se ra 78 astengdar o pêwa raporo ke 'Nêeşkeno zîndan de bimano' esto zî nîno veradayîş. Cinîya ci Kanîya Başaran wina vat: "Gelo tepişteyî do senîn bêrê tedawîkerdiş? Tepişteyanê nêweşan ra çi wazenê? Eke çîyêke înan ra bibo, verpersîyar hukmat bi xo yo. Ma waştişê veradayîşê tepişteyanê nêweşan kenê." 

	 

	Tepişteyo nêweş Nûrettîn Başaran qezaya Cizîrî ya Şirnexî de wextê qedexeyê tevervejîyayîşê kuçeyan ê mabênê serra 2015-2016î de bi îdîayê 'Endamîya Rêxistine' û 'Propagandayê Rêxistine' ame tepiştiş, îfadeyê 'Şahidanê nimitkî' cezaya mueebetî ci rê ame birnayîş. Verîya ke bêro tepiştiş, qezaya trafîkî derbas kerd û paşta xo ra birîndar bi. Dimayê ke ame tepiştişî tedawîya ci nîmcet mend. Nûrettîn se ra 78 astengdarbi û rewşa ey her ke şîyêne giranêrî bîne. Pêwa raporo ke 'Nêeşkeno zîndan de bimano' esto zî nîno veradayîş. Nûrettîn Başaran nika Zîndanê Tîpê Tyî yê Girê Sûrî yê  Rihayî de tepişte yo. Dimayê ke anjû bî zî nika nêeşkeno serê payanê xo de vindero. Nûrettîn bi sendelîya tekeline şino û yeno. 10ê Çeleyî de seba tedawîya ey sewqê Nêweşxaneyê Perwerdeyîyî û Cigêrayîşî yê Mehmet Akîf Înan o ke Rihayî de amebî kerdiş, la Nûrettînî, tedawî red kerd. 

	 

	Derheqê rewşa ey de cinîya ey Kanîya Başaran qisey kerd û bale ante serê zîndanî. 

	 

	‘Roj bi roje rewşa ey xirab bena’

	 

	Kanîya, ard ziwan ke Nûrettîn no 6 serrî yo tepişteyo û wina dest bi qiseyanê xo kerd: "Verîya ke bêro tepiştiş, qezaya trafîkî derbas kerd û platîn fînayî paşta ci. Vera nêvînayîşê tedawîya fîzîkî rewşa ey zafêr xirab bî. Verî bi gampole şîyêne û ameyêne la nika bi sendelîya tekeline şino û yeno. Rewşa ey her ke şina giran bena. Bêşik vanê ganî ma nigê ey ci ra bikerê. La belê o no çî qebûl nêkeno. O nêeşkeno biewno xo ra. Ez wazena bêro veradayîş ke tedawîya ey teber de bêro kerdiş." 

	 

	‘Bi hetkarîya embazanê xo cuya xo domneno’

	 

	Kanîya, dîyar kerd ke 30 serrî ro ci ceza ameya birnayîş û dosya nika Dadgeha Berze de ya û wina behs kerd: "Pêwa nêweşîya ey ameyo zanayene zî ceza ci rê amî birnayîş. Sebebê rewşa ey hukmat bi xo yo. Eke tedawîyêka raşt e biameyêne kerdiş, na rewşe nêvejîyayêne meydan. Ez tewr peynî şîya pêvînayîşê ey, la rewşa ey baş nêbî. Lingê ey ameyîbî pêşinayîş û serê sendelîya tekeline de bi. Merdimo nêweş zîndan de rewşa ey do senîn başe bo? Mêrdeyê mi seba nêweşîya xo nêeşkeno lazimîyanê xo bîyaro ca. Vera nê yewî embazê ey hetkarîya ci kenê. Vera ke bi sendelîya tekeline yo, nêeşkeno şêro qatanê corî û qawişe. Vera nê yewî o cêr de maneno. Eke embazê ey nêbê, o nêeşkeno ciwîya xo bidomno." 

	 

	‘Waştişnameyê ma bêcawab verdayî’

	 

	Kanîya, wina bale ante serê hewldayîşê ke seba veradayîşê ey ameyî kerdiş: "Seba serbest bêro veradayîş xeylêke waştişnameyî ameyê nuştuşî, la heta nika cewabêke nêameyo dayîş. La belê ma do muracatanê xo dewam bikerê. Wextêke yo derg o dosyaya ey Dadgeha Berze de ya. Vera nêweşîya ey ma mîyanê endîşeyan de yê. Her roje ez ey fikirêna. Verîya ke çîyêke nêro sereyê ey, wa bêro veradayîş û ma tedawîya ey bikerê." 

	 

	‘Wa pêro tepişteyê nêweşan vera bidê’

	 

	Kanîya, dîyar kerd ke heqê tepişteyan bi her tewirî yeno binpaykerdiş û wina qisey kerd: "Heme tepişteyê nêweşî nê zilmî dir rî bi rî manenê. No wexto dimayî de cenazeyî zîndanan ra vejîyayî. Ma coka na rewşe ra bi endîşe yê. Ma nêwazenê çîyêke bêro sereyê tepişteyan. Ma nêwazenê êdî  cinî û dadî bibermê. Dewlete çimî û goşê xo girewtê û tu çîyêke nêkena." 

	 

	‘Tepişteyê nêweşan ra çi wazenê?’

	 

	Kanîya, bi hewarîye peynîyê qiseyanê xo ard û vat: "Ma waştişê veradayîşê ey û heme tepişteyanê nêweşan kenê. Verîyê ke çîyêkê bi ey bêro, wa bêro veradayîş. Eke çîyêke bi ey bêro verpersîyar hukmat bi xo yo. Gelo tepişteyî binê zilmî de senîn do bêrê tedawîkerdiş? Tepişteyanê nêweşan ra çi wazenê? Ê benê sebebê tepişteyanê nêweşan ke rewşa înan giran bibo.  Waştişê ma no yo ke sere ra tepişteyê nêweşî lezkî bêrê veradayîş."