Amed de panelê serê ziwanê dayîke 

2022-02-21 15:25:21


	 

	 

	AMED - Bi minasebetê 21ê Sibate, bi rayberîya Torra Ziwan û Kulturê Kurdî û Platformê Ziwanê Kurdî panelêk serê ziwanî de ame kerdiş. Panel de qalê tedayê serê ziwanî ame kerdiş.

	 

	Bi rayberîya Torra Ziwan û Kulturê Kurdî û Platformê Ziwanê Kurdî (PZK), bi minasebetê 21ê Roja Ziwanê Dayîke ya Dinya otelêke qezaya Sûrê Amedî de panel ame organîzekerdiş. Pêwa pêameyîşê torre, Partîya Demokratîke ya Şaran (HDP), Partîya Herêmê Demokratîke (DBP), Kongreya Komela Demokratîke (KCD), Partîya Komunîst a Kurdîstanî (KKP) û Partîya Azadî û rêxistinê sîvîl beşdarê panelî bî.

	 

	‘Ganî ma ziwanê kurdî bikerê rojeva xo ya sereyîn‘

	 

	Serê nameyê Torra Ziwan û Kulturê Kurdî, Hemsereka Komeleya Cigêrayîşê ya Kultur û Ziwanê Mezopotamyayî (MED DER) Şîlan Elmas Kan qisey kerd û vat: "Ma sey torre û platformê seba girîngîyê ziwan kom bîyê. Ganî ma ziwanê kurdkî bikerê rojeva xo ya sereke. Têkoşînê ma yê seba ziwan do her tim dewam bikero.”

	 

	Hemserekê KCDyî Berdan Ozturk zî dîyar kerd ke seba şar û netewêk ziwan babeta tewr girîng o û ard ziwan ke hemverê hêrîşê vera ziwanî têkoşînê înan do her wext dewam bikero.

	 

	‘Lazim o ke her netew bi ziwanê xo biciwîyo’

	 

	Hemsereka Pêroyî ya DBPyî Salîha Aydenîz zî panel de qisey kerd û vat: “Ewro sîstem wazeno tena ziwanê îqtîdaran aver şêro û mende bikero. Coka Tirkîya de ziwanê dayîke yê xêrcê ziwanê tirkî polîtîkayê asîmlasîyonî rî bi rî manenê. Ziwan seba netewêke lazimîyê sey awe û nan o. Lazim o ke her netew bi ziwanê xo biciwîyo, perwerdeyî bivînê û bi ziwanê xo dayîşûgirewtiş bikerê. Ewro her çiqas astengî û qedexekerdiş serê ziwanî de bibo zî vera nê têkoşîn û wayîrvejîyayîşêk esto. Heta ke ziwanê kurdkî bibo ziwanê fermî û perwerdeyî do têkoşînê seba ziwanî dewam bikero. Ma nêwazenê ziwanê kurdkî bi dersê weçînayîşî dir bi sînordar bibo. Ganî ziwanê kurdkî vera dersê weçînaye bibo ziwanê perwerdeyî.”

	 

	Panel çapemenî rê girewte dewam kerd.