'Her hêriş û komplo xo dir serewedaritişo newe ano meydan' 

2022-02-15 13:15:23


	 

	 

	Medya Uren

	 

	AMED - Sîyasetmedarê Kurdan ê cinî Komployê Mîyanneteweyî yê hemverê Rayberê PKKyî Abdullah Ocalanî seke roja sîya name kerdî û vatî: "Tarîx do heme hetkarê komployî bi nameyêke lêşin bîyaro vîr. 15ê Sibate de şarê Kurdî serewedaritişêk pîl û verpersêke xurt da. Ma zanenê vera ke komplo ser de nêkewt bi metodê tecrîdî dewam keno. La wa baş bêro zanayene, do her heriş û komplo xo dir serewedartişêko newe bîyaro meydan."

	 

	15ê Sibate ya serra 1999î de hemverê Rayberê PKKyî Abdullah Ocalanî de Komployê Mîyanneteweyî ame avêrfînayîş û teslîmê Tirkîya ame kerdiş. Eynî wextî de Girawe ya Îmralî bi tewirêke ke komele ra û cayo bêro îzolekerdiş ame cakerdiş. Komplo bi metodê tecrîdî 23 serrî yo dewam keno.

	 

	Serewextê 23yînê Komployê Mîyanneteweyî de cinîyê ke bîyê şahidê ê prosesî û roja ewro de zî mîyanê sîyasetê Kurdan de ca gênê, ma rê komplo erjna. Cinîyan dîyar kerd ke Kurdistan de bêvengîyêka pîlî û pêwa nê zî serewedaritişêke pîl ê şarî ra amebî ca. No serewedaritiş tesîrêke serê cinîyan de û komele de kerd."

	 

	'Hetêke ra bêvengî û hetêke ra serewedaritiş'

	 

	Aktîvîsta TJAyî û hemsereka HDPyî ya wextê verî yê Êlihî Fatma Ablay a ke wextê komployî de 8 serrî bî çîyê a roje ra vîrê aye de mendo wina ma dir pare kerd: "Roja ke komplo ame ca, seke hewn yeno vîrê mi. Keye de televîzyon nêameyêne akerdiş dikanî nêameyêne akerdiş, veyveyî nêameyêne kerdiş, rewşe sey verî nêbî û heta her kes pabeyê xeberêke bî. Bêvengîya ê wextî xeylêke vîrê mi de mend. Bêşik tena nê, na bêvengî hakîm bî, serewedaritişêk pîlî yê şarî zî bîbî. Çîyoke seke tutîyî xeylêke tesîr ro mi kerd û vîrê mi de ca girewt, no bî. Keye de no behs ameyê kerdiş; xeylêk kesan bedenê xo dayêne verê adirî û xeylêk kesî wuştîbî serewedaritiş. Nê yewî ra her tim  wareyê hîsê kurdewarî de mi xurîn kerdêne û ver bi sîyasetê Kurdan ra antêne."

	 

	'Komplo û tecrîd beramberê aştîye de asteng o'

	 

	Fatma bale ante serê sebebê caardişê komployî û wina vat: "Projeyê ke serekîya Birêz Abdullah Ocalanî ameya avêrfînayîş seba azadîya heme şaran û seyyewbînîya heme cînsan û heme nîjadan bî. Her çiqas komplo ca amebo û o mîyanê girawêke de amebo tecrîdkerdiş zî Birêz Ocalanî fek nê fikrî ra û fehmanê xo ra vera nêda. Lazim o ke ma prosesê aştîye baş bierjinê û bîyarê verê çiman. Pêvînayîşêke qij de zî gamê xeylêk pîlî ameyî eştiş. Wedaritişê tecrîdî û azadîya Birêz Abdullah  Ocalanî de do tena nê Meseleya Kurdan, do meseleyê heme Rojhelatê  Mîyanîn î zî bêro  çareserkerdiş. Ma na bawerîye de yê. Komplo û tecrîdo ke seke dewamîya ci domnena, beramberî  aştîya heme şaran rê asteng a."

	 

	'Do têkoşîna ma pîl bibo'

	 

	Fatma behs kerd ke sebebê weçînayîşê înan ê sîyasetê Kurdan asasê xo nê netîceyan ra gêno û peynîyê vatişê xo ard: "Ma ê prosesan ra vîyarîyayî û do komplo û serewedaritişê ma ver bi sîyasetî ra dehf bikero. Seba çarevînayîşê meselayê Kurdan û heme şaran ma zî xo verpersîyar vîna. Amancê ma zî aştî û seyyewbînî yo. Coka hemverê a têkoşînê ma de her tim benê asteng. Duştê sîyaseta Kurdan de tepiştiş, tecrîd û polîtîkayê pelçiqnayîşî bê mabên dewam kenê. La senîn ke duştê komployî de bi milyonan Kurdî bîyî yew, duştê heme hêrişan de zî do no quwetê xo bimojno ra. Her hêriş xo dir do serewedaritişêke  newe awan bikero."

	 

	'Ma ro umîdê xo gêrayêne'

	 

	Hemsereke ya HDPyî ya qezaya Xelfetî ya Rihayî Fatma Korkmaz wextê komployî de 23 serrî bî, destpêke de behsê prosesê komployî kerd û wina vat: "Ma sere ra a roja sîya şermezar kenê. Înan waşt ke tepiştişê rayberîye dir Kurdan çinî bikerê û rêxistinê Kurdan bieşkawnê. Seba rîbayê xo hêrişê têkoşîna azadîye û herdê Kurdan kerdî. Amancê înan pîl bî. Labelê serewedaritişê şarî dir no amancê înan ser de nêkewt. Bi seyan merdimî ganê xo da verê adirî û bi hezaran merdimî vejîyayî meydanan. Serewedaritişê şarî yê duştê komployî de pêl bi pêl pîl bîyê. Şar bi umîdêke pîl Birêz Ocalanî dir girêdaye bî. Ciwanî, cinî, tûtî û kokimî rayîrşîyayîşî tertîb kerdî, her meydanî de adir pê fînayî. Ê rojî vîrê ma ra nêşinê. Mîyanê xembarîyêke pîl de ma ro umîdê xo gêrayêne."

	 

	'Umîdê ma  azadîya rayberî ya'

	 

	Fatma dîyar kerd ke, her çiqas ke bi tewirêke fîzîkî Abdullah Ocalanî bifînê mîyanê çar dêsan û girawêke zî,  o hetê fikrî de merdimo tewr azad bî. Fatma wina dewam kerd: "Vindertişê ey ma heminan rê bî fînak. Coka vernî ke bêro destbendkerdişî zî bi fikrê xo tesîrêka pîl e serê şarê Kurdî de kerdbî.  Nê yewî rayberî û ma zî azad kerdê. Bi nê quwetî zî kes nêeşkeno bi ma. La belê  lazim o ke şarê Rojhelatê Mîyanînî pêro bizanê ke azadîya Birêz Abdullah Ocalanî do înan rê zî azadî bîyaro. Projeyê ey seba heme şaranê bindestan bî. Tecrîdkerdiş û tepiştişê ey do heme Rojhelatê Mîyanênî rê tesîr bikero. Vera nê yewî ma vanê tecrîd dewamîyê komployî yo. Azadîya rayberî azadîya ma heminan a."

	 

	'Waştî roje xeylêk sîya bikerê'

	 

	Endamê Meclîsa Dadîyanê Aştîye Emine Denîz a ke wextê komployî de 37 serrî bî û çîyo ke bîya şahid wina pare kerd: "15ê Sibatî  seba ma Kurdan û heme şaran zî rojêka sîya ya. Bi destê welatê mîyanneteweyî rayberê şarêke ame tepiştiş û teslîmê Tirkîyayî ame kerdiş. Nê dir waştî ke rojanê şarêke sîya bikerê. Bêşik kesêke bi wijdan û bi hîsê azadîyî ciwîyayo, do bikewo xemê komployî. Ma vera nê semedî zî seke rojêka sîya şîrove kenê. Amanc bêvengkerdişê şarêke yo û tasfîyekerdişê projeyê azadîye bî.  Coka bi serewedaritişê şarî virazîyayo ra komplo tal ame tevervetiş. Ma xeylêk xemgîn bîyî la serewedaritişî dir zerrîya ma germ bî û ma nişka ra vat Kurdî çinî nêbîyê û çinî nêbenê. Ê hîsê ma yê azadîye newe ra girêyayî. No zî bî verpersêke xurt."

	 

	'Komplo bi tecrîdî dewam keno'

	 

	Emîne da zanayene ke, komplo tepiştişê  Abdullah Ocalanî dir peynî nêbî, ewro tecrîdî dir dewam keno. Emîne wina dewam kerd: "Cayo Abdullah Ocalan ci de yeno tepiştişî ra heta şert û mercê ci de yeno verdayîş binpaykerdişê heqê merdiman o. Mîyanê girawêke de bi astengkerdişê  pêvînayîşê avûkatî û keyeyê xo dir û qisakerdiş, o komele ra yeno îzolekerdiş. No çend serrî yo derbas bî û heta ameyo ê sewîyeyî ke bi serran o  xebere nêgînê. Nînan dir şar yeno eciqnayîş û yeno waştişî ke bikewê mîyanê psîkolojîyê mexlûbkerdişî. Ez Kurdistan de bi tewirêke azad nêeşkena bi ziwanê xo û kulturê xo biciwîyî. Ez seke Kurdêke nêeşkena mîyanê herra xo de bi tewirêke azad bigêrî. Çar hetê ma  mîyanê ablûkayê polîsan û panzêran de yo. No tecrîd o. La senîn ke komplo tal ame tevervetişî do tecrîd zî bêro şikitiş. Bi yewîyîye ma do bieşkê aştî û her serkewtişî dest bifînê."