'Ganî berê Îmraliyî bêro akerdiş'  

2022-02-08 13:28:46


	 

	Sema Çaglak-Şîrîn Çinar

	 

	AMED / MÊRDÎN - Cinîyan bale ant serê tecrîdî û dîyar kerdî ke heta Rayberê PKKyî Abdullah Ocalan azad nêbo, do şar zî azad nêbo. Sewbîna cinîyan dîyar kerdî ke komployê mîyanneteweyî û tecrîd girêdayê yewbînan ê û seba çareserkerdişê probleman ganî berê Îmraliyî abibo.

	 

	Tecrîdê hemverê Rayberê PKKyî Abdullah Ocalanî her roja ke derbas beno tewr giran beno. Qerarê newe yê sey qedexeyê pêvînayîşê bi keye û avûkatan dir sewîyeya tecrîdî nîşan dano. Abdullah Ocalan bi 10 mengî yo tu zanayîş nîno girewtiş. Hemverê tecrîdî de reaksîyon û nêrazîbîyayîşê şarî zêde beno. Sewbîna tecrîdo ke Tirkîya û herême de xo sey metodêk şîdetê vera şarî ramojneno, her ke şino rewşa komelî tewr xidar bena. Bi taybetî zî krîzê ekonomî û polîtîkayê îqtîdarê AKP-MHPyî ke yenê kerdiş, beno sebebê nêrazîbîyayîşê şarî. Tecrîdo ke xo tewr zêde serê tepişteyan de ramojneno, teda û hêrişê hemverê tepişteyan zî her ke şino zêde keno.

	 

	Cinîyê ke reaksîyon vera tecrîdî û binpaykerdişê heqan yê zîndanan dayî ajansê ma rê erjnayîş kerdî.

	 

	‘Her roje bi binpaykerdişêk newe dir ma çimê xo akenê'

	 

	Merdima tepişteyan ra Ayşe Akin, vat ke lajê ci 8 serrî yo zîndanê Amedî yê Tîpê Fyî de tepişte yo. Ayşe, wina qal kerd: “Rewşa înan qet baş nîya. Bi seyan tepişteyê nêweşî zîndanan de estê. Înan nêbenê tedawî nêkenê. Awa germ nêdanê û cayê înan serd o. Tepişteyê ke mîyanê çar dêsan de yê zulmêko pîl înan rê yeno kerdiş. Ma goreyê lazimîyê înan, hacetan înan rê şawenê. Labelê heta ke ê hacetî resenê înan tewr tay 7 rey cigêrayîş ra derbas benê. Reyna gama ma şinê pêvînayîş, 10 rey cigêrayîşê înan ra derbas benê. Erzenê serê qawîşê tepişteyan. Cigêrayîşê zitî înan rê yeno kerdiş û kêzik û parçeyê şûşeyan kenê mîyanê werdê înan. No bêmerdimayî yo û bi tu hawayî ma nê qebûl nêkenê. Seba rewşa tepişteyan kezeba ma veşena."

	 

	‘Heta birêz Ocalan azad nêbo ma zî nêeşkenê azad bibê’

	 

	Ayşe, dewam de wina bale ant serê tecrîdî: “Birêz Ocalan binê zilmêko pîl de xo ver dano. Tecrîdê serê ey, girêdayê tecrîdê serê ma yo. Heta ke birêz Ocalan azad nêbo ma zî nêeşkenê azad bibê. Çîyo ke ey kerdo, seba azadîya şaran kerdo. Seba nê zî ma wazenê birêz Ocalan û heme tepişteyî azad bibê. Çareserkerdişê alozîyê Tirkîya û rewşa şerî bi wedaritişê tecrîdî mumkun o." 

	 

	‘Komplo û tecrîd girêdayê yewbînan ê'

	 

	Îdarekara qezaya Artûklû ya Mêrdînî ya Partîya Demokratîke ya Şaran (HDP) Makbule Okmen zî dîyar kerd ke tecrîd sûcê merdimayî yo û wina vat: “Ma wazenê no tecrîd serê heme tepişteyan ra wurzo. Ma vînenê ke êdî zîndanan ra her ke şino cenazeyê ke vejênê zêde benê. No çîyêk rêze ra nîyo û ganî hemverê nê tu kes bêveng nêmano. Seba nê alozî û kaosî rê çareserî wedaritişê tecrîdî yo û ganî berê Îmraliyî abibê. Eke berê Îmraliyî abibo, do no şer zî biqedîyo. Komplo û tecrîd girêdayê yewbînan ê. Lazim o ke ma nika seba wedaritişê tecrîdî têkoşîn bikerê."

	 

	‘Wa berê Îmralî abibê’

	 

	Makbûle, wina vat: “Ez eynî wextî de sey dayîkêke veng dana ke wa êdî no şer biqedîyo, aştîyêke mende bêro û tepişteyê nêweşî serbest bêrê veradayîş. Wa reyna prosesê aştîye dest pêbikero û berê Îmraliyî abibê. Seba ma xoverdayîşê yewîye lazim o. Lazim o ke heme dayîkî destê xo bidê yewbînan û hemerê nê şerî de vinderê. Wa bes êdî gonî bêro rijnayîş. Waştişê ma tena aştîyêke mende ya. Bi şer tu çîyêk nîno safîkerdiş. Na rewşa şerî mîyanê Tirkîya de seba tecrîdê bîyaye yo. Heta ke ma aştî bîyarê nê welatî ma do xo ver bidê."