Serra 1999ine de grevê vêşanîye de bî: Şar sere nêtewêneno 

2022-02-05 13:15:10


	 

	 

	 

	Rojda Aydin  

	 

	ŞIRNEX - Cinîyê ke 15ê Sibata 1999 de hemverê komployê mîyanneteweyî dest bi grevê vêşanîye kerdî û vatî: "Ma hem şîn de bî û hem zî serewedaritişî de bî. Şar meydanan de bi çalakîyê xo hêrsê xo ard ziwan û wayîrê dewaya xo vejîyayî."

	 

	Rayberê PKKyî Abdullah Ocalan 9ê teşrîna verêne 1998 de Sûrîye ra ame vetene. 15ê Sibata 1999 de teslîmê Tirkîya ame kerdiş. Dimayê ke Abdullah Ocalan teslîmê Tirkîya ame kerdiş, her cayê dinya de çalakîyê tewir bi tewir ame kerdiş. Xeylêk çalakî bi rayberîya cinîyan ame kerdiş. Cinîyê ke o wext kewtibî grevê vêşanîye ser o ajansê ma rê qisey kerdî.

	 

	‘Cizîra Botanî îxanetî rê bêveng nêmend’

	 

	Medîne Aksoy, bi rayîrê televîzyonî xebera esîrgirewtişê Abdullah Ocalanî eşnawita û wina vat: "Serek dimayê hetê dewletanê teberî ra teslîmê Tirkîya ame kerdiş, destûr nîno dayîş ke pêvînayîş bêrê kerdiş.  Ne keye û ne zî avûkatanê ci  nêeşkenê pêvînayîş bikerê. Dimayê ke serek ame tepiştiş tepya Tirkîya de her çî xirab bi."

	 

	'Sey laser vejîyayê meydanan'

	 

	Medîne dewam de wina vat: "Hemverê komployî her cayê dinya şar rawuşto serê lingan û nêrazîbîyayîşê xo ramojnayî. Cizîra Botan zî hemverê nê îxanetî bêveng nêmend û wurzê serê lingan. Ma taxan de çadirê xo dayî ro û dest bi grevê vêşanîye kerdî. O wext xeylêk kesî paştdayîş da grevê vêşanîye. Polîsan bi şîdet hêrişê çalakîya ma kerdêne. Pêwa her tewirê hêrişan ma grevê xo yê vêşanîye keyand de dewam kerd û her roje ma şîne keyeyêke. Her taxe de şar ameyîne serdayîşê grevê vêşanîye. Kîşte şîngirewtişê de şarî çalakîyê xo zî kerdêne. Grevê vêşanîye bi rayberîya cinîyan ame destpêkerdiş, nêzdîyê serrêke dewam kerd. La seba heme çalakîyan wayîrê vejîyayîşê pîl bi. Seba şarî destbendkerdiş û tepiştiş xem nêbi. Şarê Cizîrî sey laser vejîyabi meydanan."

	 

	‘Şar vejîya meydanan'

	 

	Hatîce Dûrmûş zî dîyar kerd ke wexto eşnawita Abdullah Ocalan ameyo tepiştiş ci ra bawer nêkerdo û wina vat: "Demê serek ame tepiştiş, şar o wext zêde qehirya. Şar hemverê tepiştişê serek wuşto serê lingan û dest bi çalakîyan kerd. O wext xeylêk kesî dest bi grevê vêşanîye kerdî. Cinî, tutî û ciwan bi şewe û roje mîyanê çalakîyan de bî. Xeylêk kesî bedenê xo dayî verê adirî."

	 

	‘Hemverê tecrîdî de wayîrê tepişteyan vejîyê'

	 

	Hatîce tewr peyîn wina vat: "Seba wedaritişê tecrîdî û azadîya serekî her cayî de çalakî û grevê vêşanîye ameyî kerdiş û heta ewro zî çalakî yena kerdiş. Seba ke tutê ma zîndanan de hemverê tecrîdî vejîyayî, nika bi zor û zilmî dir rî bi rî yê. Ganî bêro zanayîş ke ma tu wext fek dewaya xo ra vera nêdanê. Heta peynîya emrê xo zî ez o serê nê rayîrî de bî. Ez veng dana her kesî ke hemverê tecrîdî ganî ma wayîrê tepişteyan vejîyê."