'Wa berê Îmralî abo û aştîyêke daîmî bêro ca' 

2022-01-14 13:10:51


	 

	 

	Sema Çaglak

	 

	AMED -  Cinîyan îşaret kerd ke tena bi şikitişê  tecrîdî ciwîyayîşêk azadî û aramî mimkun o û wina vat: "Wa tecrîdo ke serê Abdullah Ocalanî de yo peynî bikerê. Heta ke tecrîd serê ey de nêro peynîkerdiş ma do heme binê tecrîdî de bimanê. Ma aştî wazenê û êdî wa gonî nêro rijnayîş."

	 

	Tecrîdê serê Rayberê PKKyî  Abdullah Ocalanî her roja ke derbas beno tewr giran beno. Qerarê neweyê derheqê pêvînayîşê keyeyî û avûkatan dir sewîyeyê tecrîdî nîşan dano. Hemverê tecrîdî de reaksîyonî û razînêbîyayîşê şarî zafêr benê. Sewbîna tecrîdo ke Tirkîya û herême de xo sey metodêk duştê şarî dano nîşandayîş, her ke şino rewşa komelî xirabêr keno. Xusûsî zî krîzê ekonomî û polîtîkayê îqtîdarîyê AKP-MHPyî ke yenê kerdiş, beno sebebê razînêbîyayîşê şarî. Cinîyan dîyar kerd ke tecrîd her meydanê ciwîyayîşî de xo dano ramojnayîş.

	 

	Îdarekara Komeleyê Paştdayîş û Hetkarîya Keyeyan ke merdimê xo Dergûşê Şaristanîyê Mezopotamyayî yê Vindîkerdişî (MEBYA-DER) ke eynî wextî de yew merdima tepişteyan ra ya Helîme Topuz û merdima tepişteyan ra Meryem Tûrhan û Fevzîye Kolakan derheqê binpaykerdişê heqan û tecrîdê girankerde yo ke Îmralî de yeno kerdiş ser o qisey kerd.

	 

	'Mîyanê tecrîdî de tecrîd esto'

	 

	Halîme Topuz îşaret kerd ke, tehda û tehdîdê dewlete tim serê komele de zafêr ê û wina vat: "Destpêk de tecrîdê serê brêz Ocalanî de yo şermezar kena. Tecrîd şexsê brêz Ocalanî de destpêkerd û nika zî serê goristanan, zîndanan û pêro serê komeleyî de esto. Mîyanê mengêke de 7 cenazeyî zîndanan ra vejîyayî.  Zîndanan de mîyanê  tecrîdî de tecrîd esto. No tecrîd tewr zafêr serê Şarê Kurdî de yeno kerdiş. Kes nêeşkeno fikr û fehmê xo bi tewirêke azad bîyaro ziwan. Serê komele de tehda û tehdîdê dewlete estê. Tirkîya bi xo mîyanê kaosî de ya la no kaos zî serê Kurdan de ana ca. Do heta key wina şêro?  La êdî şar aya yo û hayî înan û polîtîkayê  înan ê çewtî ra estê û duştê înan de têkoşîne danê."

	 

	'Dewleta Tirkî hawayêko eşkera neyarîya Kurdan kena'

	 

	Helîme, dewamkerdişê qiseyanê xo de bale ante serê qeneatê Komîteyê Astengkerdişê Îşkenceyî yê Konseyê Ewrûpayî (CPT) û nizdîbîyayîşê Ewrûpayî yê hemverê tecrîdî û dîyar kerd ke dewletê mîyanneteweyî bi bêvengîyê xo hemkarîyê nê sûcê tecrîdî kenê. Halîme, wina vat: "Seranserê dinya de yeno zanayene ke tecrîd sûcêke merdimîye yo. Labelê Îmralî de 23 serrî yo  tecrîdêke verê çiman de esto. Sewbîna no nizdî 8 aşmî yo, brêz Ocalanî ra tu malûmatêke çinî yo. Heqê heme tepişteyan esto ke bi avûkat û keyeyê xo dir têkilî virazê. Wa qanûnê xo bîyarê ca. Dewleta Tirkî bi hawayêke eşkera neyarîya Kurdan kena. Çirê ê zilm û nêheqî Kurdan rê kenê? Ma caardişê huqûq û edaletî wazenê! Sewbîna xusûsî zî ma venga CPTyî  rê kenê. CPT ganî wezîfeyê  xo bîyaro ca û wayîrê nameyê xo vejîyo."

	 

	'Wa berê Îmralî abibo û aştîyêke daîmî bêro ca'

	 

	Yew merdima tepişteyan ra Meryem Tûrhan zî qisey kerd û îşaret kerd ke tenî bi şikitişê tecrîdî ciwîyayîşêk azad û aramî mimkun o. Meryeme, dîyar kerd ke ê tecrîdî her meydanê ciwîyayîşî de hîs kenê û qiseyê xo wina dewam kerd: "Wa no tecrîd serê tepişteyan û şaran ra wurzo we. Tecrîdê zîndanan her ke şino giranêr beno. Ma zereyê keyeyê xo de zî binê tecrîdî de yê. Ma hawayêke azad nêeşkenê ziwanê xo zî qisey bikerê. Ma wazenê wa berê Îmralî abibo û prosesê aştîye bêro destpêkerdiş. Tenî şikitişê tecrîdî ra hizûr mimkun o. No 40 serrî yo ma tenî aştî  wazenê. Seba na aştîye ma xeylêk bedelê giranî dayî. Ma şer nêwazenê. Wa tecrîd biqedênê û no şer wa biqedîyo!  Ma ciwîyayîşêke aştîyane û azad wazenê."

	 

	'Wa tepişteyî serbest bêrê veradayîş'

	 

	Tewr peynî zî yew merdima tepişteyan ra Fevzîye Kolakan qisey kerd û dîqet ant serê rewşa tepişteyan. Fevzîye ard ziwan ke girankerdişê tecrîdî ewro zîndanan de xo dano asayene û wina qisey kerd: "Ewilî ra heta nika zî zilm serê ma de esto. Ma tenî dewayê heqê xo û bîyayîşê xo kenê. Kam ci wextî Kurdan sereyê xo kerdo ra,  înan hewl dawo ke têkoşînê înan sernêkewo. Tu reyêk zilmo duştê bîyayîşê ma rê nêqedîyayo. Demê ke ma behsê tecrîdî kenê ganî ma rewşa zîndanan û ê tepişteyan zî biewnê. Her rojî heqêke înan yeno binpaykerdişî û têkilîyê înan tever ra yeno birnayîş.  Nika tutê ma binê zilm û tecrîdê dewlete de xo ver danê. Ma zî tever de xo ver danê û ma wazenê bibê vengê înan. Ma wazenê no tecrîd peynî bêro û tepişteyê ma serbest bêrê veradayîş. Ma tenî aştîye û hizûr wazenê."