Zîndanê Amedî de 'Qiseykerdişê bi dîmen' kewt dewre: Faturayê aşmî 150 TL yo 

2022-01-08 14:53:34


	 

	ENQERE - Caardişê cigêrayîşê bi dîmen yê zîndanan ke demêk derg bi rojeve de bi, zîndanê sey herêmê pîlot ameyî weçînayîş, dest pêkerd. Yew herêma pîlot ke ame weçînayîş zîndanê Cinîyan ê Amedî bi. Ozlem Seyhan ke zîndan de tepişte bî wina vat: “Bi  kabînê ameyê bicakerdiş, amanc kenê koxuşê tepişteyan bi pêroyî tecrîd bikerê, îzolasyon zêde bikerê. Koxuşê ma de kamera estê, xora ma 24 saetan yenê temaşekerdiş.”

	 

	Zîndanan de binpaykerdişê heqan ke yenê ciwîyayîş, yew bîn zî kerdî zêde û ‘Caardişê cigêrayîşê bi dîmen’ ê demêk derg bi rojeve de bi, herêmê pîlot yê ke ameyî weçînayîş dest bi caardişî ame kerdiş. Zîndanê Cinîyan ê Amedî zî yew ci ra yo. Ozlem Seyhan ke zîndanê Cinîyan ê Amedî de tepişte ya, bi mektubêke binpaykerdişê heqan û caardişê ke yeno kerdiş, neql kerd.

	 

	 ‘Amanc zêdekerdişê îzolasyonî yo’

	 

	Ozleme derheqê caardişî de wina vat: “Hewteyê vîyarte de koxuşê ma  kabînê pîlî yê nê sîstemî (qiseykerdişê bidîmen) ameyî montekerdiş. Pêwa heme îtîrazan vatî, talîmatê wezaretî yo û kerdî koxuşan. Ma musayî ke nê kabînî tena seba qiseykerdişê bi dîmen nîyê, wezîfeyê xeylêk çî vînenê, nimûne, nuştişê faksan, nuştişê waştişname, dayîşûgirewtişê kantînî, revîr, hûmartiş, bi veng telefonkerdiş û sewbîna bêrê kerdiş. Bi nê kabînan amanc kenê ke tepişteyan bi pêroyî koxuşan de tecrîd bikerê, îzolasyon zêde bikerê. Hewl danê kes koxuş ra nêvejîyo. Lazimîyê sey korîdor, revîr û sewbîna werte ra wedarnê."

	 

	‘Faturayê telefonî yê aşmî 150 TL yo’

	 

	Ozleme wina dewam kerd: “Xebitnayîşê telefonî yê bi veng, seba xeylêk problem o. Tena numareya telefonê cêbî yeno qeydkerdiş. Di xetê bîn yê telefonî sey xetê sabît ameyê viraştiş. Xêrcê  xetê sabît dayeyê xebitnayîşî werte de yo. Reyna xeylêk tepişteyî wayîrê heqî ke hîrê numarayê telefonî bixebitnê yê. Wexto ke caardişê bi qertî yê telefonî çinbo, no xeylêk vay o. 10 deqe qiseykerdiş 5,5 lîra yo. Xebitnayîşê ci zî seba sereyê kesî 150 TL yo. Werte de yo ke no caardiş yeno ferzkerdiş. Eke bikewo faliyet do netîceyê ci bêro vînayîş."

	 

	‘Do heme zîndanan de bi ca bîyarê'

	 

	Ozleme vat, Tîpê Tyê û awankerdişê ci yê fîzîkî xeylêk qij o û koxuşan de 16 kesî manenê. Ozleme wina vat: "Kabînê pêvînayîşê bidîmen, liqadê hempar ê katê cêr de ameyê bicakerdiş. Cayê ke ma werd biewrê nêmend. Cayê ma koxuş de bigêrê nêmand. No sîstem do heme zîndanan de bi ca bêro. Sere de wezaret, heme sazgehê ma ci rê nuştê, netîceyêk nêdanê. Zîndan ardê sewîyeyêka merdimî nêeşkenê ci de biciwîyê."

	 

	‘24 saetan ma yenê taqîbkerdiş'

	 

	Ozleme tewr peyîn wina vat: “Heta keye û tepişteyî pers kenê, dem qedêno. Keyeyan bi hawayêke hîra cigêrayîş kenê. Ma ra zî vanê solanê xo vejê û roşanê. Kamera xora koxuşê ma de estê. Ma 24 saetan yenê taqîbkerdiş. Eke ma solan nêvejê ma nêbenê pêvînayîş. Serê israrê keyeyan ma vejîyayî pêvînayîş. Yanî bi kilmî çîyê ke merdimî danê zorî yê. Aşmêke verê Rêziknameyê Înfazî ame newekerdiş. Her çiqas îbareyê ‘zitî’ bêro vurnayîş zî xeylêk qerarê neweyî estê. Do heme pey yewbînan vejîyê vernîya ma. Ma her roje bi çîyêk newe aya benê. Ka ma biewnê çi pabeyê ma yo."